ރާއްޖޭގައި އެންމެ ބޮޑަށް ފަގީރުކަން ތަހައްމަލުކުރަން ޖެހިފައިވާ ބަޔަކީ ޒުވާނުން: ބަންޑާރަނައިބު
24 އޯގަސްޓް 2014 14:39
ރާއްޖޭގައި އެންމެ ބޮޑަށް ފަގީރުކަން ތަހައްމަލު ކުރަން ޖެހިފައިވަނީ ޒުވާން އުމުރުފުރައިގެ ކުދިންނަށްކަމަށް ބަންޑާރަ ނައިބު މުހައްމަދު އަނިލް ވިދާޅުވެއްޖެއެވެ.
ބަންޑާރަނައިބު މިހެން ވިދާޅުވީ، އިންސާނީ ހައްގުތަކާމެދު ޒުވާނުން އަހުލުވެރިކުރުވުމަށް ހިއުމަން ރައިޓްސް ކޮމިޝަން އޮފްދަ މޯލްޑިވިސް (އެޗްއާރުސީއެމް) އިން ގިރިފުށީގައި ބާއްވާ ފަސްދުވަހުގެ ކޭމްޕު އިފްތިތާހު ކުރުމުގެ ރަސްމިއްޔާތުގައި މިއަދު ވާހަކަ ދައްކަވަމުންނެވެ.
އަނިލް ވިދާޅުވީ، ވަޒީފާ އަދާކުރުމުގެ ހައްގުފަދަ އެތައް ބައިވަރު ހައްގުތަކަކުން ޒުވާނުން މަހުރޫމުވުމުގެ ސަަބަބުން ރާއްޖޭގައި އެންމެ ބޮޑަށް ފަގީރުކަމާ ކުރިމަތިލާން ޖެހިފައިވާ ބަޔަކީ ޒުވާނުންކަމަށެވެ.
"އަދާކުރާނެ ވަޒީފާއެއް ނެތް އެންމެ ގިނަބަޔަކު ތިބި އުމުުރުފުއަކީ ޒުވާނުން. މިހެން ކަމުން އެންމެ ބޮޑަށް ފަގީރުކަމާއި އެކި އެކި ގޯނާތައް ތަހައްމަލު ކުރަންޖެހޭ އުމުރު ފުރައަކީ ވެސް ޒުވާން އުމުރުފުރާ،" އަނިލް ވިދާޅުވިއެވެ.
ބަންޑާރަ ނައިބު ވިދާޅުވީ އިންސާނީ ހައްގުތައް ހޯދުމަކީ ޤާނޫނު އަސާސީގައި ވެސް ކަނޑައަޅާފައިވާ ކަމެއް ކަމަށެވެ. އެހެން ކަމުން އެފަދަ ހައްގުތައް ހޯދުމަށް ޒުވާނުން މަސައްކަތް ކުރަން ޖެހޭނެ ކަމަށެވެ. އަދި އެފަދަ ހައްގުތަކުން މަހުރޫމް ވެފައިވާ މީހުންނަށް އެ ހައްގުތައް ހޯދައިދިނުމަށް ޒުވާނުން ނުކުންނަން ޖެހޭކަމަށެވެ.
"ހައްގުތައް ހޯދަން މަސައްކަތް ކުރުމަކީ ޤާނޫނު އަސާސީގައި ވެސް ކަނޑައަޅާފައިވާ ކަމެއް. މިހެން ކަމުން އެފަދަ ހައްގުތައް ހޯދަން ނުކުންނަންއެބަޖެހޭ. އެފަދަ ހައްގުތައް ގެއްލިފައިވާ މީހުންގެ ހައްގުތައް ހޯދައި ދިނުމަށް ޒުވާނުން މަސައްކަތް ކުރަންޖެހޭނެ،" އަނިލް ވިދާޅުވިއެވެ.
ކިޔުންތެރިންގެ ހިޔާލު