މާލޭގައި މާރާމާރީ ހިންގައި ތިން ޒުވާނަކު ޒަހަމްކޮށްލައިފި
23 އޯގަސްޓް 2014 23:30
މާލޭގައި ހިންގި މާރާމާރީ އެއްގައި ތިން ޒުވާނަކު ޒަހަމްކޮށްލައިފިއެވެ.
މިރޭ އިރާކޮޅު ޗާންދަނީ މަގުގައި ހުންނަ ސްމާޓުފޯނު ގޯޅިގަނޑުތެރޭގައި ހިންގި މާރާމާރީގައި ޒަހަމްކޮށްލާފައިވަނީ 13 އަހަރުގެ ކުޑަ ކުއްޖަކާ، 19 އަހަރުގެ ޒުވާނަކާ، 20 އަހަރުގެ ޒުވާނެކެވެ.
މި ހަމަލާގައި 19 އަހަރުގެ ޒުވާނާގެ ބުރަކަށްޓަށް ތޫނުއެއްޗަކުން ހަމަލާދީފައިވާކަމަށް މައުލޫމާތު ލިބެއެވެ. އޭނާއަށް އައިޖީއެމް ހޮސްޕިޓަލުގައި އަންނަނީ ފަރުވާދެމުންނެވެ. އޭނާގެ ހާލު ސީރިއަސްއެވެ. އަނެއް ދެ މީހުންނަށް ވެސް ވަނީ އެކިވަރުގެ އަނިޔާވެފައެވެ.
ޖުލައި މަހުގެ 28 ވަނަ ދުވަހުން ފެށިގެން މާލެއާއި ރާއްޖޭގެ އެހެން ކަންކޮޅުތަކުގައި އަންނަނީ ސިލްސިލާ މާރާމާރީތަކެއް ހިންގަމުންނެވެ. އެ މާރާމާރީ ތަކުގައި ދެ މީހަކު ވަނީ މަރުވެފައެވެ. އެކަކު މަރުވެފައިވަނީ ކ. ތުލުސްދޫއިންނެވެ. އަނެއް މީހާ މަރުވެފައިވަނީ މާލެއިންނެވެ.
ފުލުހުން ގެންދަނީ މިމައްސަލަ ތަހުގީގު ކުރަމުންނެވެ. މާރާ މާރީތަކާ ގުޅިގެން ފުލުހުން ވަނީ ބައެއް ސަރަހައްދުތަކާ ގެތައް ތިންހާސް ފަހަރަށްވުރެ ގިނަ ފަހަރު ބަލައި ފާސްކޮށްފައެވެ. އަދި ބައެއް މީހުން ހައްޔަރުކޮށް އެމީހުންގެ ޝަރީއަތް މިހާރު ގެންދަނީ ކުރިމިނަލް ކޯޓުގައި ހިންގަމުންނެވެ.
ކިޔުންތެރިންގެ ހިޔާލު