ރިޟްވާން ގެއްލުނު މައްސަލައިގައި ނޫސްތަކުން ކަންބޮޑުވުން ފާޅުކޮށްފި

"މިނިވަން" ނޫހުގެ ނޫސްވެރިއާ އަހުމަދު ރިޟްވާން އަބްދުﷲ ގެއްލުމާއި ގުޅިގެން ދިވެހި ނޫސްތަކުން ކަންބޮޑުވުން ފާޅުކޮށްފިއެވެ.

މިއަދު މީޑިއާތަކުގެ އިދާރާތަކުން ނެރެފައިވާ ބަޔާނުގައި ބުނެފައިވަނީ، "މިނިވަން ނިއުސްގެ" ނޫސްވެރިޔާ، ރިޟްވާން ގެއްލުމަކީ ހުރިހާ ނޫސްވެރިން އިންތިހާއަށް ކަންބޮޑުވާ ކަމެއްކަމަށެވެ. އަދި މީހުން ވަގަށް ނެގުމާއި ވީނުވީ ގޮތެއް ނޭނގި ގެއްލުން ފަދަ ނުރައްކާތެރިކަމާއި ބިރުވެރިކަން ގޮސް ހުއްޓެނީ ހަމައެކަނި ނޫސްވެރިންނާ ހަމައެއްގައެއް ނޫންކަމަށެވެ، މިއީ ކޮންމެ ދިވެހި ދަރިޔަކަށް، ކޮންމެ އާއިލާއަކަށް އަދި މުޅި މުޖުތަމައަށް ކުރިމަތިވެފައިވާ ނުރައްކަލެއްކަމަށް ބަޔާނުގައި ބުނެފައިވެއެވެ.

"ގާނޫނު އަސާސީގެ 27 ވަނަ މާއްދާ އާއި 28 ވަނަ މާއްދާ އިން، ހިޔާލު ފާޅުކުރުމާއި ނޫސްވެރިކަމުގެ މިނިވަންކަމުގެ ހައްގު ކަށަވަރުކޮށްދެ އެވެ. އެހެންވެ މީހަކު ބުނާ ބަހަކުން، ފާޅުކުރާ ހިޔާލަކުން، ލިޔާ ލިޔުމަކުން އަދި ކުރާ އިޝާރާތަކުން އޭނާ އަށް އިންޒާރު ދިނުމާއި ހަމަލާ ދިނުމަކީ ކުރަންޖެހޭނެ ކަމެއް ކަމަށް އަޅުގަނޑުމެން ގަބޫލެއް ނުކުރަމެވެ،" ނޫސް ބަޔާނުގައި ބުނެފައިވެއެވެ.

"ނޫސްވެރިންގެ ގަލަން ހުއްޓުވުމަށާއި ދޫ ބަންދުކުރުމަށް" އެކި ފަރާތްތަކުން އަބަދުވެސް މަސައްކަތް ކުރަމުންދާކަމަށް އެ ބަޔާނުގައި ބުނެފައިވެއެވެ. މިގޮތުން ކޮށްފައިވާ މަސައްކަތްތަކުގެ ތެރޭގައި އެތައް ނޫސްވެރިޔަކަށް ހަމަލާ ދީފައިވާކަން ފާހަގަކޮށްފައިވެއެވެ. ޓީވީއެމް އާއި ދިޓީވީއަށް ގެއްލުން ދިން ކަންވެސް ފާހަގަ ކޮށްފައިވެއެވެ. ވީޓީވީ އާއި ރާއްޖެ ޓިވީ ރޯކޮށްލި ކަން ވެސް އެ ބަޔާނުގައި ފާހަގަކޮށްފައިވެއެވެ.

"އެންމެ ފަހުން ވީނުވީއެއް ނޭނގި ނޫސްވެރިޔަކު މި ގެއްލުނީ އެވެ. މިހާތަނަށް އަޅުގަނޑުމެންނަށް އެއްކުރެވިފައިވާ މައުލޫމާތުތަކަށް ބަލާއިރު، ބަޔަކު މީހުން، ރިލްވާން ވަގަށް ނެގީ ކަމަށް ގަބޫލު ކުރުމުގެ ޖާގަ ވަރަށް ބޮޑު،" ކަމަށް ނޫސް އިދާރާތަކުން ނެރެފައިވާ ބަޔާނުގައި ބުނެފައިވެއެވެ.

ނޫސްވެރިންނަށް އޮތް ނުރައްކަލާއި ބިރުވެރިކަން ބޮޑުވަމުންދާއިރު، ނޫސްވެރިންނާއި ނޫސް އިދާރާތަކަށާއި ނޫސްވެރިންގެ ތަކެއްޗަށް ގެއްލުން ދެމުންދާ ފަރާތްތަކަށް ހައްގު އަދަބު ދިނުން ލަސްވުމަކީ ނޫސްވެރިން ނުހަނު ކަންބޮޑުވާ ކަމެއްކަމަށް ބަޔާނުގައި ބުނެފައިވެއެވެ. ރިޟްވާންގެ މައްސަލާގައި ތަހްގީގު ދިގުލައި، އަދި މައްސަލައާ ބެހޭ މައުލޫމާތު މީޑިއާ އަށާއި އާންމުނަށް އެކަށީގެންވާ ގޮތުގައި މިހާތަނަށް ހާމަކޮށްފައި ނުވާކަން ފާހަގަކޮށްފައިވެއެވެ.

ދިރިއުޅުމުގެ ހައްގާއި މަސައްކަތް ކުރުމުގެ ހައްގަކީ އެއްވެސް ބިރުވެރިކަމެއް އަދި ބިރު ދެއްކުމެއް ނެތި ކަށަވަރުވެފައި އޮންނަންޖެހޭނެ ހައްގެއްކަމަށް ނޫސްވެރިން ނެރެފައިވާ ބަޔާނުގައި ބުނެފައިވެއެވެ. އެ ހައްގު ކޮންމެ ދިވެހި ރައްޔިތަކަށް ފުރިހަމައަށް ލިބިދިނުމަށް ހަދަންޖެހޭ ގާނޫނުތަކާއި ސިޔާސަތުތަކާއި އަޅަން ޖެހޭ ފިޔަވަޅުތައް އެޅުމަކީ ދައުލަތުގެ ޒިންމާއެއްކަން ފާހަގަކޮށްފައިވެއެވެ.

"ނަމަވެސް ހިތާމައަކީ މުޖުތަމައުގައި ހުރި ނުބައިވަމުންދާ "ފާރުގަނޑުތަކަށް" އެއްވެސް ފަރުވާއެއް ނުލިބި އިތުރަށް ގޯސްވަމުން ދިއުމެވެ. އެކަމުގެ ސަބަބުން ހަރުކަށި ފިކުރުތަކުގެ ހަރުކަށިކަން ވަރުގަދަވެއެވެ. ގޭންގުތަކުގެ ނުރައްކާ ބޮޑުވެއެވެ،" ނޫސްބަޔާނުގައި ބުނެފައިވެއެވެ.

ނޫސްވެރިކަމުގައި އެކި އިދާރާތަކުގެ އެޑިޓޯރިއަލް ސިޔާސަތު ތަފާތު ވިޔަސް، ހުރިހާ ނޫސްވެރިންނަކީ އެއް އާއިލާއެއް ކަމަށް ބަޔާނުގައި ބުނެފައިވެއެވެ.

"ހަރުކަށިކަމުގައި ހައްދު ފަހަނަ އަޅާފައިވާ ފިކުރުތަކާއި ގްރޫޕްތަކުގެ ނުރައްކާ އަޅުގަނޑުމެންނަށް ކުރިމަތިވަމުން ދިޔަސް، މިއީ އަޅުގަނޑުމެންނަށް އެކަނި އޮތް ނުރައްކަލެއް ނޫނެވެ. އަދި އަޅުގަނޑުމެން މިތިބީ ދައްކަމުންދާ ބިރުތަކަށް ފަހަތަށް ޖެހި، ގަލަން ދޫކޮށްލާ ގޮތަކަށް ނޫއެވެ. އަދި އަޅުގަނޑުމެން ފިކުރާއި ދޫ ބަންދުކުރުމަކަށް ވެސް ނޫނެވެ. އަޅުގަނޑުމެންގެ ހައްގު ހޯދުމަށް ކުރަންޖެހޭ ހުރިހާ ކަމެއް ކުރާނަމެވެ،"