ޕީޕީއެމްގެ މެމްބަރުން އިތުރުކުރުން މުހިންމު: ރައީސް މައުމޫން

ޕީޕީއެމްގެ އާމްދަނީ ރަނގަޅު ކުރުމަށް މެމްބަރުން އިތުރުކުރުމަކީ މުހިންމުކަމެއް ކަމަށް ޕީޕީއެމްގެ ރައީސް މައުމޫނު އަބްދުލް ގައްޔޫމް ވިދާޅުވެއްޖެއެވެ.

ރައީސް މައުމޫނު މިހެން ވިދާޅުވީ، ޕީޕީއެމްގެ އަސާސީ ޤަވާއިދުގެ ދަށުން، އެ ޕާޓީގެ ގޮފިތައް ހިންގަން ހަވާލުކުރަންޖެހޭ ފައިސާ ހަވާލުކުރުމަށް މިރޭ ކުލުނުވެހީގައި ބޭއްވި ރަސްމިއްޔާތެއްގައި ވާހަކަ ދައްވަމުންނެވެ.

އެމަނިކުފާނު ވިދާޅުވީ ޕީޕީއެމްގެ އާމްދަނީ އިތުރުކުރުމަށް މެމްބަރުން އިތުރުކުރުމަކީ މުހިންމުކަމެއް ކަމަށެވެ. އަދި އެ ޕާޓީއަކީ ރައްޔިތުންނަށް ހިދުމަތްތަކެއް ކުރުމަށް ނުކުމެ އޮތް ޕާޓީއެއް ކަމުން އެ ޕާޓީއަށް ލިބޭ ކޮންމެ ފައިދާއަކީ ދިވެހި ރައްޔިތުންނަށް ލިބޭ ފައިދާއެއް ކަމަށެވެ. 

"އިލެކްޝަންސް ކޮމިޝަނުން ޕާޓީތަކަށް ދޭ ފައިސާ ދެނީ މެމްބަރުންގެ އަދަދަށް ބަލާފައި. މެމްބަރުން އިތުރުވާމިންވަރަކަށް ޕާޓީއަށް ލިބޭ އާމްދަނީ ވެސް ދާނީ އިތުރުވަމުން. އެކަމުގެ މަންފާ ކުރާނީ ދިވެހި ރައްޔިތުންނަށް،" ރައީސް މައުމޫނު ވިދާޅުވިއެވެ.

އެމަނިކުފާނު ވިދާޅުވީ ޕީޕީއެމަށް ސަރުކާރުގެ ބަޖެޓުން ލިބޭ ފައިސާގެ ފަންސާސް އިންސައްތަ ގޮފިތަކަށް ބެހުމަކީ އެ ޕާޓީގެ ކުރިއެރުމާއި މުސްތަގުބަލު އުޖާލާކުރުމަށް މުހިންމުކަމެއް ކަމަށެވެ. އެކަމުގެ ސަބަބުން ޕާޓީގެ މެމްބަރުންނަށް އިތުރު ހިއްވަރެއް ލިބިގެން ދާނެކަމަށެވެ.

"މިކަން ވެގެން ދާނީ ޕާޓީގެ މެމްބަރުން އިތުރު ހިއްވަރެއް ލިބޭ ކަމަކަށް. އަދި މަސައްކަތް ކުރުމަށް ފަސޭހަވެގެން ދާނެކަމަކަށް. ޕާޓީގެ އަސާސީ ގަވާއިދުގައި ވާގޮތަށް ބަޖެޓުގެ ފަންސާސް އިންތަ މާލެއާއި އަތޮޅުތަކުގެ ގޮފިތަކަށް ބެހުމަކީ މުހިންމެއްކަމަށް އަޅުގަނޑު ދެކެން،" ރައީސް މައުމޫނު ވިދާޅުވިއެވެ.

ޕީޕީއެމް އުފެދުނުފަހުން އެ ޕާޓީން ހޯދާފައިވާ ކާމިޔާބީތަކުގެ މައްޗަށް ވެސް މައުމޫނު އަލިއަޅުވައިލެއްވިއެވެ. އެމަނިކުފާނު ވިދާޅުވީ މިހާތަނަށް ރައްޔިތުންގެ މަޖިލީހުގެ ސާފު އަަގުލަބިއްޔަތު ހޯދި ހަމައެކަނި ޕާޓީ އަކީ އެއީކަމަށެވެ. އެންމެ ކުރު މުއްދަތެއްގެ ތެރޭގައި ޕާޓީ ރެޖިސްޓަރ ކުރުމަށް ބޭނުންވާ 3000 މެމްބަރުން ހޯދި ޕަޓީއަކީ ވެސް ޕީޕީއެމް ކަމަށް ވިދާޅުވިއެވެ. އެޕާޓީން މިހާތަނަށް ވާދަކުރި 24 އިންތިހާބުގެ ތެރެއިން 21 އިންތިހާބު ކާމިޔާބުކޮށްފައިވާކަމަށް ވެސް ރައީސް މައުމޫނު ވިދާޅުވިއެވެ. ޕަޓީ އުފެދުނުތާ ދެ އަހަރު ދުވަހުގެ ތެރޭގައި ރާއްޖޭގެ ވެރިކަމަށް އެ ޕާޓީގެ ކެނޑިޑޭޓަކު އައްޔަރު ކުރެވިފައިވާކަމީ ފަހުރުވެރިވާ ކަމެއް ކަމަށް ވެސް ވިދާޅުވިއެވެ.