ސާކުގެ ސެކެރެޓަރީ ޖެނެރަލް ރައީސް ޔާމިނާ ބައްދަލު ކުރައްވައިފި

‏ސާކް ‏‏ސެކްރެޓަރީ ‏ޖެނެރަލް މިސްޓަރ އަރްޖުން ބަހާދަރު ތާޕާ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމުގެ އަރިހަށް، އިޙްތިރާމުގެ ޒިޔާރަތެއް މިއަދު‏‏ކުރައްވައިފިއެވެ.

 ރައީސް އޮފީހުން ބުނީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި އޮތް މި ބައްދަލު ކުރެއްވުމުގައި ‏‏ރައީސުލްޖުމްހޫރިއްޔާ ދެއްކެވި ‏‏ވާހަކަފުޅުގައި، ސާކް ސެކްރެޓަރީ ޖެނެރަލްކަމާ މިސްޓަރ ތާޕާ ‏‏ޙަވާލުވެވަޑައިގަތުމާ ގުޅިގެން، އޭނާއަށް މަރްޙަބާ ‏‏ވިދާޅުވިކަމަށެވެ.‏

މިބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ސަރަޙައްދީ ‏‏ގުޅުންތައް ބަދަހިކޮށް، ޤައުމުތަކުގެ އިޖްތިމާޢީ އަދި އިޤްތިޞާދީ ޙާލަތު ރަނގަޅުކުރުމަށްޓަކައި ‏‏ސާކުން އަދާކުރައްވަމުން ގެންދަވާ މުހިންމު ދަޢުރުގެ މައްޗަށް އަލިއަޅުއްވާލައްވަމުން، ‏ސާކުގެ ‏‏ކަންތައްތަކަށް ރައީސުލްޖުމްހޫރިއްޔާ ދެއްވާ އަހަންމިއްޔަތު ފާހަގަކުރެއްވި ކަމަށް ވެސް އެ އޮފީހުން ބުނެއެވެ. ‏

‏ސާކުގެ ޙަރަކާތްތައް މިހާރަށްވުރެ ފުޅާކޮށް، ސާކުގެ ހިންގުން ‏‏އިތުރަށް ހަރުދަނާކުރެއްވުމަށްޓަކައި އެޅުއްވިދާނެ ފިޔަވަޅުތަކާ ބެހޭގޮތުންވެސް ‏‏މިބައްދަލުކުރެއްވުމުގައި ރައީސުލްޖުމްހޫރިއްޔާއާއި ސާކުގެ ސެކްރެޓެރީ ޖެނެރަލް މަޝްވަރާ ‏‏ކުރެއްވި ކަމަށް ރައީސުލްޖުމްހޫރިއްޔާގެ އޮފީހުން ހާމަކުރެއެވެ.

މިބައްދަލުކުރެއްވުމުގައި، މިނިސްޓަރ އޮފް ފޮރިން އެފެއާޒް ދުންޔާ މައުމޫނާއި، ‏‏ފޮރިން ސެކްރެޓެރީ ޑޮކްޓަރ ޢަލީ ނަޞީރު މުޙަންމަދު ބައިވެރިވެވަޑައިގެންނެވިއެވެ. ‏އަދި ސާކް ‏‏ސެކްރެޓޭރިއަޓަށް ރާއްޖެއިން ކަނޑައަޅުއްވާފައި ހުންނަ ޑިރެކްޓަރ އަލްފާޟިލާ ފާޠިމަތު ‏‏ނަޖުވާވެސް ބައިވެރިވެވަޑައިގަތްކަމަށް އެ އޮފީހުން ބުނެއެވެ.