ޤިޔާމަތް ދުވަހާމެދު ޣާފިލު ނުވުމަށް އިލްތިމާސް ކުރައްވައިފި

ރާއްޖޭގެ މިސްކިތްތަކުގައި މިއަދު އިއްވި ހުކުރު ހުތުބާގައި ނާސޭހަތްތެރިވެފައިވަނީ ޤިޔާމަތް ދުވަހާމެދު ޣާފިލު ނުވުމަށެވެ.

އިސްލާމިކް މިނިސްޓްރީން އާންމުކޮށްފައިވާ ހުތުބާގައި ހަނދާން ކޮށްދީފައިވަނީ އާހިރަތް ދުވަހަށް އީމާން ވުމަކީ އީމާންތެރި ކަމުގެ ރުކުންތަކުގެ ތެރެއިން ރުކުނެއްކަމަށެވެ. ނަމަވެސް އެ މުހިންމު ދުވަހާމެދު މުސްލިމު ބައެއް އަހުން ހަނދާނެތޭކަމަށް ހުތުބާގައި ވިދާޅުވެފައިވެއެވެ. އެކަން އެގޮތަށް މެދުވެރިވަނީ މި ދުނިޔޭގެ އަރާމާއި އުފަލުގެ ސަބަބުންކަމަށް ވިދާޅުވެފައިވެއެވެ.

"އެބައި މީހުންނަށް ދެއްވާފައިވާ އުމުރުގެ އަގުބޮޑު ވަގުތު، ފައިދާއެއް ނެތް ކަންކަމުގައި ބޭކާރު ކޮށްލަނީ ކިހާގިނަބައެއްތޯ؟ ލައުނަތް ލެއްވިގެން ވާ ޝައިތާނާ ވަނީ އޭނާގެ ދަންތުރައިގައި އެމީހުން ޖައްސައި ދުންޔަވީ ލައްޛަތާއި ޝަހުވަތުގެ އަޅުވެތިކަމުގެ ކަސްދަޅުން އަޅުވާފައި،" ހުކުރު ހުތުބާގައި ވިދާޅުވެފައިވެއެވެ.

ޝައިތާނާގެ ދަންތުރައިން ސަލާމަތްވެވޭނީ "ޝައިތާނީ ވަސްވާހުން ކިލަނބުވެފައިވާ ހިތްތައް" އީމާންކަމުގެ ނޫރުން އަލިކުރެވިގެން ކަމަށް ވެސް ވިދާޅުވެފައިވެއެވެ. އީމާންކަން އިތުރު ކުރުމަށް "މި ފަނާވަނިވި ދުނިޔޭގެ މަގުސަދާއިމެދު ވިސްނައި، މި ދުނިޔެ ނިންމާލަންޖެހޭ އާހިރަތުގެ މަތިން ތާއަބަދު ހަދާންކުރުން،" މުހިންމުކަމަށް ވިދާޅުވެފައިވެއެވެ.

އިންސާނާ މަރުވެ ކަށްވަޅަށް ދާ ހިސާބުން ޤިޔާމަތުގެ މަރުހަލާ ފެށޭނެކަމަށް ކިރީތި ރަސޫލާ محمد صلى الله عليه وسلم ގެ ހަދީސުން ސާބިތު ވެފައިވާކަމަށް ހުތުބާގައި ވިދާޅުވެފައިވެއެވެ.

"ތަޔަބައި މީހުންގެ ތެރެއިން މީހަކު މަރުވެއްޖެނަމަ ފަހެ، އެމީހާގެ މައްޗަށް ޤިޔާމަތްވެއްޖެކަން ކަށަވަރެވެ،" މިފަދައިން محمد صلى الله عليه وسلم ހަދީސް ކުރައްވާފައިވާކަމަށް ވިދާޅުވެފައިވެއެވެ.

ކައްވަޅުގެ މަންޒިލު ގައި ދުވަސްތައް ހޭދަކުރަން ޖެހޭނީ އެކަނިވެރިކަމާއި އެކުމަށް ވިދާޅުވެފައިވެއެވެ. އެކަނިވެރިކަން ފިލުވައި ދޭނެ ހަމައެކަނި އެއްޗަކީ ދުނިޔޭގައި ކޮށްފައިވާ ހެޔޮ އަމަލުތައްކަން ހަނދާންކޮށްދެއްވައި ނަސޭހަތްތެރިވެފައިވެއެވެ. ނުބައި އަމުލުތައް ކުރާ މީހުންގެ ކަށްވަަޅުން އެމީހުންނާއި އެ އަމަލުތަކާއި ބައްދަލުވާންޖެހޭނެކަމަށް ވެސް ވިދާޅުވެފައިވެއެވެ.

"ނުބައި އަޅުންނަށް ކަށްވަޅު ވެގެންދާނީ ނަރަކައިގެ އަނދަވަޅަކަށް. އެއާއި ހިލާފަށް ހެޔޮ އަޅުންނަށް ވެގެން ދާނީ ސުވަރުގޭގެ ބަގީޗާއަކަށް،"