ރިޟުވާން ގެއްލުނު މައްސަލާގައި ދިވެހި މީޑިއާއިން މަޝްވަރާ ކޮށްފި

ރާއްޖޭގެ ޒުވާން ނޫސްވެރިއެއް ކަމަށްވާ އަޙުމަދު ރިޟްވާން ގެއްލިފައިވާތީ އެކަމާ ބެހޭ ގޮތުން ރާއްޖޭގެ ބައެއް މީޑިއާތަކުން މިރޭ މަޝްވަރާ ކޮށްފިއެވެ.

މާލޭ ސިޓީ ހޯލްގައި ބޭއްވި މި ބައްދަލުވުމުގައި ރާއްޖޭގެ ބައެއް ޓީވީ ޗެނަލްތަކާއި، އޮންލައިން ނޫސްތަކުގެ އިސްވެރިންނާއި، ނޫސްވެރިން ބައިވެރިވެފައި ވެއެވެ. މިބައްދަލު ވުމުގައި ވާހަކަ ދެއްކެވި ބޭފުޅުން ވިދާޅުވެފައިވަނީ ރިޟްވާނަށް ވީގޮތެއް އެނގިފައިނުވުމަކީ ދިވެހި މީޑިއާއަށް ނުރައްކާ އޮތް މިންވަރު ހާމަވާ ކަމެއް ކަމަށެވެ. އެހެން ކަމުން އެއީ ކުރިއަށްއޮތްތާގައި ނޫސްވެރިން ވަރަށް ބޮޑަށް ވިސްނަންޖެހޭނެ ކަމެއް ކަމަށް ނޫސްވެރިން ފާހަގަ ކުރިއެވެ.

އެގޮތުން ނޫސްވެރި ކަމުގެ އިމުން ބޭރުނުވެ ގާނޫނާއި ގަވާއިދުގެ ތެރޭގައި މަސައްކަތް ކުރަމްޖެހޭކަން ފާހަގަ ކޮށްފައިވެއެވެ. އަދި ނޫސްވެރިންނަށް މިފަދަ ނުރައްކާ އެބައޮތްކަން ގަބޫލުކޮށް އެހަގީގަތުގެ މައްޗަށް ވިސްނައިގެން މަސައްކަތް ކުރުމަށްވެސް ބައެއް ނޫސްވެރިންވަނީ ވާހަކަ ދައްކައިފައެވެ.ނޫސްވެރިންނަށް މިހާރު ދިމާވަމުންދާ މައްސަލަތަކާއި، ދެމުންދާ އިންޒާރުތަކާއި، އެކަންކަމާ ގުޅިގެން ނޫސްވެރިންނަށް ކުރެވިދާނެ ކަންކަމާ ގުޅޭގޮތުންވެސް މިރޭވަނީ މަޝްވަރާ ކޮށްފައެވެ.

ރިޟްވާން ގެއްލުނު މައްސަލާގައި ވާހަކަ ދައްކަވަމުން މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)ގެ ރައީސް އަހުމަދު ޒާހިރު (ހިރިގާ) ވިދާޅުވީ ރިޟުވާން ގެއްލުނު މައްސަލާއާއި، ނޫސްވެރިންނަށް މިހާރު ދެމުންދާ އިންޒާރުތަކާއި، މައްސަލަތައް ދައުލަތުގެ ކަމާބެހޭ ފަރާތްތަކުގެ ސަމާލު ކަމަށް ގެންނަން ޖެހޭ ކަމަށެވެ. މިކަން ކުރުމަށްޓަކައި ނޫސްވެރިންގެ ތެރެއިން ކޮމިޓީއެއް އައްޔަންކޮށް އެފަދަ ފަރާތްތަކާ މަޝްވަރާ ކުރުމަށް ދިއުމަށް އޭނާ ވިދާޅުވިއެވެ.

ދިޓީވީގެ ސީއީއޯ، މިދުހަތު އާދަމް ވިދާޅުވީ ރިޟްވާން ފެނޭތޯ ނުވަތަ އޭނާގެ ޚަބަރެއްވޭތޯ އޭނާއަކީ ކާކުކަން އާންމުންނަށް އެނގޭ ގޮތަށް ޓިވީތަކާއި، އޮންލައިން ނޫސްތަކުގައި އޭނާއާ ބެހޭ ތަފްސީލީ މައުލުމާތާއި ފޮޓޯ ހިމަނުމަކީ ކުރަންޖެހޭ ކަމެއް ކަމަށެވެ.

ރިޟްވާނާ ބެހޭ މައުލޫމާތު ވީހާ ގިނައިން މީޑިއާއިން ގެނެސް އެވާހަކަ ފެތުރުމަކީވެސް މިހާރު ކުރަންޖެހޭ ކަމެއް ކަމަށް ބައެއް ނޫސްވެރިންވަނީ ވިދާޅުވެއެވެ. އަދި ރިޟްވާނުގެ މައްސަލާގައި ހުރިހާ ނޫސްވެރިންވެސްތިބީ އެއްރޫހެއްގައި އަތުގުޅައިގެންކަން އެނގެން އެބަޖެހޭ ކަމަށްވެސް ބައެއް ނޫސްވެރިން ވަނީ ބުނެފައެވެ. އަދި މަގުމައްޗަށް ނިކުމެ ނޫސްވެރިންގެ ޝުޢޫރު ކަމާބެހޭ ފަރާތްތަކާ ހަމައަށް ފޯރުކޮށްދޭންވީ ވަގުތު މިހާރު ޖެހިއްޖެ ކަމަށްވެސް ބައެއް ނޫސްވެރިން ބުންޏެވެ.

މި ރޭގެ ބައްދަލުވުމުގައިވަނީ މިމައްސަލަތަކާ ގުޅިގެން ކަންކަން ރޭވުމަށް ދެ ކޮމިޓީއެއް އެކުލަވާލުމަށް ނިންމާފައެވެ. އަދި އެދެކޮމިޓީގެ މަސައްކަތް މާދަމާ މެންދުރުފަހު ފެށުމަށްވެސް ނޫސްވެރިންވަނީ އެއްބަސްވެފައެވެ.