އިންސާނީ ހައްގުތައް ގެއްލޭ މައްސަލައަށް ޒުވާނުން ހޭލުންތެރި ކުރުމަށް ކޭމްޕެއް ބާއްވަނީ

ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން ޔޫތު ހިއުމަން ރައިޓްސް ޑިފެންޑާރސް ކޭމްޕެއް ބޭއްވުމަށް ނިންމައިފިއެވެ.

ޔޫތު ހިއުމަން ރައިޓްސް ޑިފެންޑާރސް ކޭމްޕް ކުރިއަށް ގެންދިއުމަށް ހަމަޖެހިފައިވަނީ މިހިނގާ އޯގަސްޓް 24 އިން 28 އަށެވެ. މިކޭމްޕް ބޭއްވުމަށް ހަމަޖެހިފައިވަނީ ގިރިފުށީގައެވެ. ރާއްޖޭގެ އެކި ކަންކޮޅުތަކުން 25 ކުދިން މިކޭމްޕްގައި ބައިވެރިވެފައިވާ ކަމަށް ހިޔުމަންރައިޓްސް ކޮމިޝަނުން މައުލޫމާތު ދެއްވާފައިވެއެވެ.

މި ކޭޕްގެ ކޯޑިނޭޓަރު މަރިޔަމް ލައިޒާ ވިދާޅުވީ މި ކޭމްޕް ބެއްވުމުގެ މައިގަނޑު މަގުސަދަކީ މުޖުތަމައުގައި ހިނގާ އިންސާނުންގެ ހައްގު ގެއްލޭފަދަ މައްސަލަތަކާމެދު ޒުވާނުން އަހުލުވެރި ކުރުވުމެވެ. އަދި ސުކޫލްތަކުގައި މިހާރު އޮންނަ ހިޔުމަން ރައިޓްސް ކޮމިޝަން ކުލަބްތަކުގެ ހަރަކާތްތައް ސުކޫލްތަކާ ގުޅިގެން ހިންގާނެ ވޮލަންޓިއަރ ޒުވާނުން މުޖުތަމައަށް ނެރުން ކަމަށްވެސް ލައިޒާ ވިދާޅުވިއެވެ.

މިގެ އިތުރަށް އިންސާނީ ހައްގުތަކަށް އާމުން ހޭލުންތެރި ކުރުމުގެ ގޮތުން މިހާރުވެސް ތަފާތު ޕްރޮގްރާމް އެ ކޮމިޝަނުން ކުރިއަށް ގެންދެއެވެ.

މި ގޮތުން "ދޯދި ފޮޓޯ ކޮންސެޓް" ގެ ނަމުގައި ތަފާތު ތީމަކަށް ބަހައިލައިގެން ފޮޓޯ ކޮންސެޓެއްވެސް ކުރިއަށް ގެންދެއެވެ. މި މުބާރާތްގައި ފޮޓޯ ނެގުންތެރިން ހުށައަޅާ ފޮޓޯތައް ސޯޝަލް މީޑިޔާގައި އަޕްލޯޑްކޮށް އާމުންގެ މެދުގައި ވޯޓްނަގާ ގޮތަށް ހަމަޖެހިފައިވެއެވެ. އާންމުންގެ ވޯޓުން އެއްވަނައަށް ދާ މީހަކަށް އެކޮމިޝަންގެ ފަރާތުން އިނާމެއް ދޭގޮތަށް ވަނީ ނިންމާފައެވެ. އަދި މީގެ އިތުރަށް އާންމުން ހޭލުންތެރި ކުރުމުގެ ގޮތުން ކޮމިޝަނުން ބާއްވާ އެހެނިހެން ފޯރަމްތަކުގައި މި ފޮޓޯތައް ބޭނުން ކުރާނެކަމަށް ކޮމިޝަނުން މައުލޫމާތު ދެއްވިއެވެ.