އައިޖީއެމް ހޮސްޕިޓަލުގެ ލެބޯޓަރީ އަޕްރޭޑް ކުރުމުގެ އެއްބަސް ވުމެއްގައި ސޮިއކުރައްވައިފި

އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ ލެބޯރަޓަރީ އަޕަގްރޭޑް ކުރުމަށް ތިން ފަރާތަކާއެކު އެއްބަސް ވުމެއްގައި ސޮއި ކޮށްފިއެވެ.

ހެލްތު މިނިސްޓްރީގައި އިއްޔެ ބޭއްވި ރަސްމިއްޔާތުގައި އައިޖީއެމްއެޗްގެ ލެބޯޓަރީއަށް ތަކެތި ގަތުމަށް ސޮއި ކޮށްފައިވަނީ މެޑްޓެކް ޕްރައިވެޓް ލިމިޓެޑާއި މެޑްބެލް ޑަޔަގްނޯސްޓިކްސް އާއި އަދި މެޑިކުއިޕް ޕްރައިވެޓް ލިމިޓެޑާ އެކުއެވެ. ސަރުކާރުގެ ފަރާތުން އެ ތިން އެއްބަސްވުމުގައި ވެސް ސޮއި ކުރެއްވީ ހެލްތު މިނިސްޓްރީ ވަގުތީ ގޮތުން ހިންގެވުމާއި ހަވާލުވެ ހުންނެވި ޑިފެންސް މިނިސްޓަރު ކާނަލް ރިޓަޔާޑް މުހައްމަދު ނާޒިމެވެ.

މިނިސްޓަރު ވިދާޅުވީ އިއްޔެ ސޮއިކޮށްފައިވާ ތިން އެއްބަސްވުމުގައި ގިނަ ބަލިތަކެއް ތަހުލީލު ކުރުމަށް ބޭނުންވާ ސާމާނު ހިމެނޭނެ ކަމަށެވެ. މިނިސްޓަރު ވިދާޅުވީ ލެބޯޓަރީއަށް ބޭނުންވާ ތަކެތި ވީހާވެސް އަވަހަށް ހޯދައި ދިނުމަށް އިއްޔެ ސޮއިކުރި ތިން ފަރާތާއެކު ވެސް އެއްބަސްވުމަކަށް އެދެވިފައިވާ ކަމަށެވެ.

ސަރުކާރުގެ މައި ހޮސްޕިޓަލުގެ ލެބޯޓަރީއަށް ހޯދާ ތަކެއްޗަކީ ގައިންގަޔަށް އަރާ ބަލިތަކުގެ ވައިރަސް ދެނަގަތުމާއި، ބަލިތަކުގެ ސާވައިލަންސް ތައާރަފް ކުރުމަށް ބޭނުންވާ މެޑިކަލް ކޮންސިއުބަލް އިކުއިޕްމަންޓާއި، ކެމިކަލްގެ އިތުރުން ސޭފްޓީ ގިޔަރާއި އަދި ޓެސްޓިން ރިއެޖެންޓްސް ކަމަށް ނާޒިމް ވިދާޅުވިއެވެ.

މިނިސްޓަރު ވިދާޅުވީ، އިކުއިޕްމަންޓްތައް ލިބުމުން ހެޕެޓައިޓިސް ބީ، އެޗްއައިވީ ފަދަ ވައިރަސްތަކަށް ޓެސްޓު ކުރެވޭނެ ކަމަށެވެ.

އެ ޕްރޮޖެކްޓަކީ އެމެރިކާގެ ސެންޓަ ފޯ ޑިޒީޒް ކޮންޓްރޯލުގެ ހިލޭ އެހީގެ ދަށުން ކުރިއަށްގެންދާ ޕްރޮޖެކްޓެކްޓެކެވެ.

މި ޕޮރޮޖެކްޓަށް ގާތްގަނޑަކަށް 6 މިލިޔަން ރުފިޔާ އަރާނެ ކަމަށް ހެލްތު މިނިސްޓަރ ވިދާޅުވިއެވެ. ނަމަވެސް އެއްބަސް ވުމުގައި ސޮއި ކުރެވިގެން ދިޔައީ 8.1 މިލިޔަން ރުފިޔާގެ ތަކެތި ގަތުމަށެވެ.