އިންޖީނު ނާޅާ އުޅަނދުފަހަރުވެސް ގަވާއިދާ ހިލާފުވާނަމަ ޖޫރިމަނާކުރަން ނިންމައިފި
21 އޯގަސްޓް 2014 10:45
އިންޖީނު ނުލާ އުޅަނދުތައްވެސް ޓްރެފިކް ގަވާއިދާ ހިލާފުވާނަމަ ފިޔަވަޅު އަޅާގޮތަށް މޯލްޑިވިސް ޕޮލިސް ސާވިސް އިން ނިންމައިފިއެވެ.
ފުލުހުން ބުނީ ޓްރެފިކު ނިޝާންތަކާއި ޚިލާފަށް ބައިސްކަލް، ދަމާގާޑިޔާ، ވީލްބަރޯ، ޓްރޮލީ ފަދަ އުޅަނދުފަހަރު ދުއްވާ ފަރާތްތައް ހުއްޓުވައި އެފަދަ އުޅަނދު ދުއްވާ ފަރާތްރައް ޖޫރިމަނާ ކުރަމުން ގެންދާނެކަމަށް ފުލުހުން ބުނެއެވެ. މިގޮތަށް ނިންމާފައިމިވަނީ މަގުމަތި އަމާންކޮށް ތަރުތީބު ކުރުމަށް ފުލުހުން ކުރަމުންދާ މަސައްކަތް އިތުރުކުރުމަށް ކަމަށް ފުލުހުންގެ ވެބްސައިޓުގައި ބުނެފައިވެއެވެ. އެފަދަ އުޅަނދު ޓްރެފިކު ނިޝާންތަކާ ޚިލާފަށް ދުއްވުމުގެ ނުވަތަ އެފަދަ ތަކެތި ގެންދިއުމުގެ ސަބަބުން މަގުތަކުގެ ކާރުބާރުބޮޑުވާކަމަށް ފުލުހުން ބުނެއެވެ. ހިނގާ މީހުންނަށާއި އެއްގަމުގައި ދުއްވާ އުޅަނދު ތަކަށް ދަތިތަކެއް ފޯރާކަމަށްވެސް ބުނެއެވެ. އެފަދަ ގިނަ ޝަކުވާތައް ޓްރެފިކު ފުލުހުންނަށް ހުށްހެޅެމުން ދާކަމަށް ވެސް ފުލުހުން ހާމަކުރެއެވެ. އެފަދަ އުޅަނދުތައް ދުއްވާ ފަރާތްތަކުން ގަވާއިދާ ހިލާފުވުމުގެ ސަބަބުން ބޮޑެތި އެކްސިޑެންޓުތައް ހިނގާފައިވާކަމަށް ވެސް ފުލުހުންގެ ވެބްސައިޓުގައި ބުނެފައިވެއެވެ.
އެއްގަމު ދަތުރު ފަތުރުގެ ޤާނުނުގައި ބައިސްކަލާއި ދަމާގާޑިޔާ، ވީލްބަރޯ، ޓްރޮލީފަދަ އުޅަނދުތައް ބޭނުންކުރުމުގައި ޓްރެފިކު ނިޝާންތަކާ ޚިލާފަށް ޢަމަލުކުރާނަމަ ޤާނޫނާއި ޤަވާއިދުތަކުގައި ބަޔާންކުރެވިގެންވާ ގޮތަށް ޖޫރިމަނާކޮށް ފިޔަވަޅު އަޅޭނެކަމަށް ބުނެފައިވެއެވެ.
ކިޔުންތެރިންގެ ހިޔާލު