ކުށްކުރުމަށް މަގުފަހިވާ ގޮތަށްހުރި 3000 އަށްވުރެ ގިނަތަންތަން ބަލައި ފާސްކޮށްފި

ވޭތުވެ ދިޔަ ހަފްތާގެ ތެރޭގައި މާލޭގައި "ޖިނާއީ ކުށްތަކަށް މަގުފަހިވާ" ގޮތަށްހުރި 3103 ތަންތަންބަލައި ފާސްކޮށްފައިވާ ކަމަށް މޯލްޑިވިސް ޕޮލިސް ސާވިސް އިން ހާމަކޮށްފިއެވެ.

ފުލުހުން ބުނީ އެތަންތަން ބަލައި ފާސްކޮށްފައިވަނީ ރައްޔިތުންނަށް އަމާން ރައްކާތެރި މުޖުތަމައެއް ގާއިމް ކޮށްދިނުމަށް ފުލުހުން ކުރަމުންދާ މަސައްކަތުގެތެރެއިން ކަމަށެވެ.

އެ މުއްދަތުގެ ތެރޭގައި އެފަދަ ސަރަހައްދުތަކުން 500 މީހަކު ހިފަހައްޓައި ފާސްކުރެވިފައިވާ ކަމަށް ފުލުހުން ބުނެއެވެ. އަދި 1721 މީހަކަށް ނަސޭހަތް ދީފައިވާނެކަމަށް ވެސް ފުލުހުން ހާމަކުރެއެވެ.

މަގުމަތީގެ ރައްކާތެރިކަން ޤާއިމުކޮށް، މަގުތަކުގެ އަމާންކަން ދެމެހެއްޓުމަށް ކުރަމުންދާ މަސައްކަތުގެ ތެރެއިން މާލޭގެ އެކި ހިސާބުތަކުގައި ޓްރެފިކް ޗެކް ޕޮއިންޓްތައް ޤާއިމްކޮށްފައިވާ ކަމަށް ވެސް ފުލުހުން ހާމަކުރެއެވެ.

މީގެއިތުރަށް މާލޭގައި ދުއްވާ އިންޖީނުލީ އުޅަނދުފަހަރަކީ އެއްގަމު ދަތުރުފަތުރުގެ ޤާނޫނާއި އެއްގޮތަށް ހުރި އުޅަނދުފަހަރުތޯ ބެލުމަށް ޚާއްސަ އަހައްމިޔަތުކަމެއް ދީގެން މަސައްކަތް ކުރެވިފައިވާކަމަށް ބުނެއެވެ. މިގޮތުން 2903 އުޅަނދެއް ހުއްޓުވައި ބަލާ ފާސްކުރެވިފައިވާކަމަށް ވެސް ފުލުހުންގެ ވެބްސައިޓުގައި ހާމަކޮށްފައިވެއެވެ.

ފުލުހުންގެ އެކި ޑިޕާޓުމަންޓުތައް ގުޅިގެން މާލޭގައި ހިންގަމުންދާ އޮޕަރޭޝަންތައް އަދިވެސް ކުރިއަށްދާކަމަށް ފުލުހުން ބުނެއެވެ.

މާލެގެ މަގުތައްމަތީގައި "ކަމެއްނެތި އުޅޭ ފަރާތްތަކާއި" ސުވާލުކޮށް ބަލައި ފާސްކުރަންޖެހޭ ތަންތަނާއި ވެހިކަލްތައް ބަލައި ފާސްކުރުމުގެ މަސައްކަތް ކުރަމުން އަންނަކަމަށް ފުލުހުން ބުނެއެވެ.