ބުރިޖު އެޅުމަށް ޗަައިނާއިން ރާއްޖެއަށް ފަންނީ އެހީތެރިކަން ދޭނެ: ރައީސް ޔާމިން

މާލެއާއި ހުޅުމާލެއާ ދެމެދުގައި ބުރިޖެއް އެޅުމަށް ސަރުކާރުން ހިންގުމަށް ރާވާފައިވާ ބްރިޖުގެ މަޝްރޫއަށް ޗައިނާ ސަރުކާރުން ފަންނީ އެހީތެރިކަން ފޯރުކޮށްދިނުމަށް އެއްބަސްވެފައިވާ ކަމަށް ރައީސުލްޖުމްހޫރިއްޔާ އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމިން މިހެން ވިދާޅުވީ "ދެވަނަ ޔޫތުއޮލިމް ޕިކްސް" ގޭން ހުޅުވުމުގެ ރަސްމިއްޔާތަށް ޗައިނާ ސަރުކާރުން ދެއްވި ދައުވަތަކަށް އެގައުމަށް ވަޑައިގެންނެވުމަށްފަހު މާލެ ވަޑައިގެން އިބްރާހިމް ނާސިރުއިންޓަނޭޝަނަލް އެއާޕޯޓުގައި ނޫސްވެރިންނާ ބައްދަލު ކުރައްވައި ވާހަކަފުޅު ދައްކަވަމުންނެވެ.

ރައީސް ވިދާޅުވީ ޗައިނާއަށް އެމަނިކުފާނު ވަޑައިގެންނެވީ ސަރުކާރުން ހިންގުމަށް ބޭނުންވާ ބޮޑު ހަތް މަޝްރޫއެއްގެ ވާހަކަ ދެއްކެވުމަށް ކަމަށެވެ. އެ މަޝްރޫއު ތަކުގެތެެރެއިން ސަރުކާރުން އެންމެ ބޮޑު އިސްކަމެއް ދެއްވައިގެން ދެއްކެވީ ބްރިޖް އެޅުމުގެ ވާހަކަ ކަމަށްވެސް ރައީސް ވިދާޅުވިއެވެ.

"ރާއްޖެއިން ޗައިނާއަށް ދިޔައީ ރާއްޖެއިންކުރަން ނިންމާފައި އޮތް ބޮޑު ހަތް މަޝްރޫއެއްގެ ވާހަކައެއް ދެއްކުމަށް. އޭގެތެރެއިން ވެސް އަޅުގަނޑުމެން އެންމެ އިސްކަން ދީގެން ދެއްކީ ބްރިޖުގެ ވާހަކަ. ދެން ބްރިޖުގެ ކަންތަކުގައި ޗައިނާ ސަރުކާރުން ވަރަށް ބޮޑަށް އެހީ ދެއްވާނެ ކަމަށްވިދާޅުވި. އޭގޮތުން ވިދާޅުވި އެކަމުގެ މަޝްވަރާތައް ކުރިއަށް ގެންދިއުމަށްމިހާރުން މިހާރަށް ކޮމެޓީއެއް ކަނޑައެޅުމަށް. އަދި އަޅުގަނޑުމެންގެ ފަރާތުން ކޮމެޓީގައި ތިއްބަވާނެ ބޭފުޅުން ކަނޑައެޅުމަށް،" ރައީސް ޔާމިން ވިދާޅުވިއެވެ.

ބްރިޖު އެޅުމަށް ބޭނުންވާ ލޯނުގެ ކަންކަމުގައިވެސް އެހީތެރިވެ ދޭނެ ކަމުގެ ޔަގީންކަން ޗައިނާ ސަރުކާރުން ދެއްވާފައިވާ ކަމަށް ވެސްރައީސް ޔާމިން ވިދާޅުވިއެވެ. ބުރިޖު އެޅުމަށް ބޭނުންވާ ފީސިބިލިޓީ ޓެސްޓު ހެދުމުގެ މަޝްރޫ ހިންގުމަށް މިއަހަރުގެ ތެރޭގައި ފަށާނެ ކަމަށްވެސް ވިދާޅުވިއެވެ.

"އަޅުގަނޑުމެން ދެން ހުރި ބޮޑެތި މަޝްރޫތަކުގެ ވާހަކަވެސް ދެއްކިން. އެ މަޝްރޫއު ތަކަކީ ޗައިނާގެ ކުންފުނިތަކުން ކޮންޓްރެކްޓަށް ނަގާނެ މަޝްރޫތަކަށް ވާނެ،"ބައިނަލް އަގުވާމީ ޑިޕްލޮމަސީގެ ގުޅުން އިތުރަށް ވަރުގަދަ ކުރުމަށް ޗައިނާއިން ރާއްޖެއަށް އެހީތެރިކަން ފޯރުކޮށްދޭނެ ކަމަށްވެސް ރައީސް ވިދާޅުވިއެވެ. އަދި ޗައިނާއިން ފެސިފިކް ސަރަހައްދާ ގުޅިގެން ކުރިއަށް ގެންދިއުމަށް މަސައްކަތްކުރާ އިގްތިސާދީ މަޝްރޫޢުތަކުގައި ރާއްޖެވެސް ބައިވެރިވުމުގެ ދައުވަތު ދީފައިވާ ކަމަށް ވެސް އެމަނިކުފާނު ވިދާޅުވިއެވެ.

"ޗައިނާ ސަރުކާރުން މިވަނީ އިގްތިސާދީ މަސައްކަތްތަކެއް ފަށްޓަވާފައި. ޗައިނާއާއި ފެސިފިކް ސަރަހައްދުތަކާ ދެމެދު އިގްތިސާދީ މަޝްރޫތަކެއް ހިންގެވުމަށް. ދެން އަޅުގަނޑުމެން އެދުނިން އެ މަޝްރޫގައި ބައިވެރިވުމުގެ ޖާގަލިބޭތޯ. ދެން ހަމަވަގުތުން އަޅުގަނޑުމެން އެކަމުގައި ބައިވެރިވުމުގެ ދައުވަތު ޗައިނާއިން ދެއްވި،"ރައީސް ވިދާޅުވިއެވެ.