ދުނިޔޭގެ ފުރަތަމަ ވާޗުއަލް ކެމްފަސް އެމްއެލްސީން ތަޢާރަފް ކޮށްފި

ދުނިޔޭގެ ފުރަތަމަ ވާޗުއަލް ކެމްޕަސް ރާއްޖޭގެ މަންދު ކޮލެޖު (އެމްއެލްސީ) އިން މިރޭ ތަޢާރަފް ކޮށްފިއެވެ.

މިއީ އެކޮލެޖުގެ ކުލާސް ރޫމުގައި ތިބެ ކިޔަވަމުންދާ ދަރިވަރުންނާ ބައިވެރިވެގެން ކިޔެވުމުގެ ފުރުސަތު ރަށްރަށުގައި ތިބޭކުދިންނާ ހަމައަށް ފޯރުކޮށް ދެއްވުމަށް ތަޢާރަފްކުރެއްވި ކެންޕަހެކެވެ.

މިކެޕްޕަސް މިރޭ ރަސްމީކޮށް ތަޢާރަފް ކުރި ކަމަށްވިޔަސް ތަޖުރިބާ ކުރުމުގެ ގޮތުން މިކެމްޕަހުގައިވަނީ އެއް ސެމިސްޓަރ ކިޔަވައި ދެއްވާފައެވެ.

އެމްއެލްސީން މިކެމްޕަސް ތަޢާރަފް ކޮށްފައިވަނީ އުރީދޫ މޯލްޑިވްސްގެ ވަރަށް ޚާއްސަ އެހީތެރި ކަމާއެކުގައެވެ. އުރީދޫ މޯލްޑިވްސްއިންވަނީ މިޚިދުމަތް ދިނުމަށްޓަކައި އެމްއެލްސީއަށް ޚާއްސަ ސިމްކާޑެއް އުފައްދައިފައެވެ. އެކާޑު މޮޑަމަކަށް ލައްވައިގެން އުރީދޫންވަނީ ޚާއްސަ "ކަނެކްޓިވިޓީ" އެއް އެމްއެލްސީއަށް ލިބޭނެ ގޮތް ހައްދަވައި ދެއްވާފައެވެ. މިއީ އިންޓަރނެޓުގެ އެހީއާ ނުލައި ބޭނުން ކުރެވޭ މޮޑަމެކެވެ.

 މިރޭގެ ރަސްމިއްޔާތުގައި ވާހަކަ ދައްކަވަމުން އެމްްއެލްސީގެ ޗެއާމަން އިބްރާހީމް އިސްމާއީލް ވިދާޅުވީ މިއީ 2006 ވަނަ އަހަރުން ފެށިގެން ކުރައްވަމުން ގެންދެވި މަސައްކަތުގެ ނަތީޖާ ކަމަށެވެ. އެތައް ގޮންޖެހުމެއްގެ ތެރެއިން މިކަން ހާސިލް ކުރެވިފައި މިވަނީ އުރީދޫގެ ވަރަށްބޮޑު އެހީތެރި ކަމާއެކުގައި ކަމަށް އޭނާ ވިދާޅުވިއެވެ.

އިބްރާ ވިދާޅުވީ ވާޗުއަލްކޮށް (މިގޮތަށް) ކިޔަވާދިނުމަށް، ދުނިޔޭގެ އެއްވެސް ގައުމެއްގައި ފަށައިފައި ނުވާކަމަށެވެ. "އަޅުގަނޑުމެން ބެލިބެލުމުގައި މިނޫނީ ދުނިޔޭގެ އެއްވެސް ގައުމެއްގައި މިގޮތަށް ކިޔަވައިދޭން ފަށާފައެއްނެތް. އެހެން ކަމުން މިއީ ދުނިޔޭގައިވެސް އެންމެ ފުރަތަމަ ހިންގޭ މިފަދަ ކްލާސްތައް،" އިބްރާ ވިދާޅުވިއެވެ.

އިބްރާ ވިދާޅުވީ ވާޗުއަލްކޮށް ކިޔަވައިދިނަސް ހުރިހާ ދަރިވަރުންނަށް އިހުސާސްވާނީ އެއްކުލާހެއްގައި ތިބެގެން ކިޔަވާހެން ކަމަށެވެ. ތަޖުރިބާއަށް ބަލާއިރު ވާޗުއަލްކޮށް ކިޔެވި ކުދިންގެ ނަތީޖާ ރަނގަޅުކަން ފާހަގަ ކުރެވިފައިވާ ކަމަށް އިބްރާ ވިދާޅުވިއެވެ.

އިބްރާ ވިދާޅުވީ ވާޗުއަލް ކެމްޕަސް ތަޢާރަފް ކުރެއްވުމަށްފަހު އެއާ ގުޅިގެން އިތުރު ކަންތައްތަކެއް ތަޢާރަފް ކުރައްވާނެ ކަމަށެވެ. ނަމަވެސް އެއީ ކޮންކަންތައްތަކެއް ކަމެއް އޭނާ ވިދާޅެއް ނުވެއެވެ. އެމްއެލްސީން ބުނެފައިވަނީ "މިކެމްޕަސްގެ ޒަރީއާއިން ރާއްޖޭގެ އެކި ހިސާބުގައި ދިރިއުޅޭ ދަރިވަރުންނާއި، ޓީޗަރުން އެމީހުން ދިރިއުޅޭ ރަށުގައި ތިއްބާ އެއް ކުލާސް ރޫމެއްގެ ތެރެއަށް ގެނެސްދޭ. ކުލާސްތައް ހިނގަމުންދާ ވަގުތު ވީޑިއޯ މެދުވެރި ކޮށްގެން އެކަކު އަނެކަކާ މުޢާމަލާތު ކުރެވޭނެ،" ކަމަށެވެ.

މިކެމްޕަހުގެ މަގުސަދަކީ ރަށްރަށުގައި ތިބެގެން މަތީތައުލީމަށް ކިޔެވުމުގެ ފުރުސަތު ހޯދައި ދިނުން ކަމަށް އެކޮލެޖުންވަނީ ހާމަ ކުރައްވާފައެވެ. އުރީދޫގެ އެހީތެރި ކަމާއެކު މިކެމްޕަހުގެ ޚިދުމަތް ފުޅާކޮށް ވަރުގަދަ ކުރާނެ ކަމަށްވެސް އެމްއެލްސީން ހާމަކުރެއްވިއެވެ.

މިރޭގެ ރަސްމިއްޔާތުގައި ވާހަކަ ދައްކަވަމުން އުރީދޫ މޯލްޑިވްސްގެ ސީއީއޯ ވިކްރާމް ސިންހާ ވިދާޅުވީ މިއީ ރާއްޖެއަށް ވަރަށް އެކަށީގެންވާ ވަސީލަތެއް ކަމަށެވެ. އެމްއެލްސީއަށް އެކަން ކޮށްދެއްވީ ވިޔަފާރީގެ ފައިދާއަކަށްވުރެ ބޮޑަށް އެކުންފުނީގެ އިޖުތިމާޢީ ޒިންމާގެ ދަށުން ކަމަށްވެސް އޭނާ ވިދާޅުވިއެވެ.