ޣައްޒާ ފަންޑަށް ފަރެސްމާތޮޑާއިން އަށްޑިހަހާހަށްވުރެ ގިނަރުފިޔާ ޖަމާ ކޮށްފި

ޣައްޒާގެ ރައްޔިތުންނަށް އެހީވުމަށްޓަކައި ގދ. ފަރެސްމާތޮޑާ ރައްޔިތުން ކުރި މަސައްކަތުން އެއްކޮށްފައިވާ ފައިސާ މިއަދު އެފަންޑަށް ޖަމާ ކޮށްފި ކަމަށް އެރަށު ކައުންސިލުން ހާމަކުރައްވައިފިއެވެ.

ފަރެސްމާތޮޑާ ކައުންސިލްގެ ނާއިބު ރައީސް އަޙުމަދު ޒާހިރު ވިދާޅުވީ އެރަށުން މިއަދު ޖަމާ ކޮށްފައިވަނީ 88.888،88 (އަށްޑިހަ އަށްހާސް އަށްސަތޭކަ އަށްޑިހަ އަށްރުފިޔާ އަށްޑިހަ ލާރި) އާއި، 33 ޑޮލަރު ކަމަށެވެ. އެފައިސާ ފަންޑަށް ޖަމާ ކޮށްފައިވަނީ ސީދާ ކައުންސިލުގެ ބެލުމުގެ ދަށުން ކަމަސްވެސް އޭނާ ވިދާޅުވިއެވެ.

އެރަށުގެ ރައްޔިތުން މިފައިސާ އެއްކޮށްފައިވަނީ "ޣައްޒާއާއެކު 33 ގަޑިއިރު ފަރެސްމާތޮޑާ" ގެ ނަމުގައި ހިންގި ހަރަކާތްތަކެއްގެ ތެރެއިންނެވެ. އެހަރަކާތުގައިވަނީ ފަރުމަސްވެރިކަމާއި، އޭތިމީތި ސޭލާއި، ހެދިކާ ވިއްކުމާއި، އައިސް ކޯން ވިއްކުމާއި، ޕޮޕްކޯން ވިއްކުމާއި، ވަގުތީ ކޮފީ ޝޮޕެއް ހިންގާފައެވެ. މީގެ އިތުރަށް ފަންޑު ފޮށްޓެއް ބަހައްޓައިގެންވެސް ފައިސާ ހޯދާފައިވާ ކަމަށް އަހުމަދު ޒާހިރު ވިދާޅުވިއެވެ. އޭނާ ވިދާޅުވީ މި ހަރަކާތަށް ރަށުގެ ރައްޔިތުންނާއި، ހުރިހާ މުއައްސަސާތަކާއި، ވިޔަފާރި ވެރިންގެ އިތުރަށް މަސްވެރިންގެ ފަރާތުންވެސް ވަރަށް ބޮޑު ތަރުހީބެއް ލިބިފައިވާ ކަމަށެވެ.

"ފަރެސްމާތޮޑާ ރައްޔިތުން ބޭނުންވަނީ ޣައްޒާގެ ރައްޔިތުންނާއެކު ތިބިކަން ހާމަކުރަން. އަދި ހުރިހާ ދިވެހިންވެސް މުޅި ފަލަސްތީނާއެކީ ތިބިކަން ހާމަކުރަން. ފައިސާތަކެއް ދިނުމުގެ އިތުރަށް ހުރިހާ ދިވެހިންގެ ހެޔޮދުޢާތައްވެސް ފަލަސްތީނުގެ ރައްޔިތުންނާ އެކުގައި ވާކަން ހާމަކުރަން ބޭނުންވޭ،" އަޙުމަދު ޒާހިރު ވިދާޅުވިއެވެ.