ކަނޑު ދަތުރުފަތުރު ކުރާ ފަރާތްތަކުން ސަމާލުވުމަށް އިލްތިމާސްކޮށްފި

ކަނޑު ދަތުރު ފަތުރު ކުރާ ފަރާތްތަކުން ސަމާލުވުމަށް މެޓް އޮފީހުންނާއި މޯލްޑިވްސް ޕޮލިސް ސާވިސް އިން އިލްތިމާސް ކޮށްފިއެވެ.

ކުރިޔަށް އޮތް ހަތަރު ދުވަހު ރާއްޖޭގެ އެކި ހިސާބުތަކަށް ގުގުރުމާއި އެކު ބޯ ކޮށް ވާރޭ ވެހޭނެ ކަމަށް މެޓުން ލަފާކުރެއެވެ. މެޓް އޮފީހުން ބުނީ މާދަމާ ހެނދުނު 10:00 އާއި ހަމައަށް ހުޅަނގު ދެކުން ގަޑިޔަކު 5 މޭލާއި 15 މޭލަށް ވައި ގަދަ ވާނެ ކަމަށް ލަފާކުރެވޭކަމަށެވެ. އަދި އެވަގުތުގައި ވައި ހުޅަނގު އުތުރަށް ބަދަލުވެއްޖެނަމަ އުތުރުން ގަޑިޔަކު 13 މޭލާއި 23 މޭލު ބާރު މިނުގައި ވައި ގަދަ ވާނެ ކަަމަށް ލަފާ ކުރެއެވޭކަމަށެވެ. އަދި ވިލާ ގަނޑުގައި 45 މޭލަށް ވައި ގަދަ ވާނެ ކަމަށް ވެސް ލަފާ ކުރެއެވޭކަމަށް ވެސް އެޑިޕާޓުމަންޓުން ބުނެއެވެ.

"މިދުވަސްވަރު ކަނޑު ގަދަވެ ވިލާގަނޑުގައި އިތުރަށް ގަދަވާނެކަމަށް ލަފާކުރެވޭތީ ކަނޑުދަތުރު ފަތުރުކުރައްވާ ބޭފުޅުން ސަމާލުމަށް އަޅުގަޑުމެން އިލްތިމާސްކުރަން،" މެޓް އޮފީހުން ވާހަކަދެއްކެވި އިސް ބޭފުޅަކު ވިދާޅުވިއެވެ.

މޯލްޑިވްސް ޕޮލިސް ސާވިސް އިން ވެސް ވަނީ ކަނޑު ދަތުރުފަތުރުކުރައްވާ ބޭފުޅުން މޫސުމަށް ސަމާލުވުމަށް އިލްތިމާސްކޮށްފައިވެއެވެ. އަދި ދަތުރު ކުރުމުގެ ކުރިން މެޓް އޮފީހަށް ގުޅައި މައުލޫމާތު ސާފުކުރުމަށްފަހު ނޫނީ ދަތުރު ނުކުރުމަށް ވެސް ފުލުހުން ވަނީ އިލްތިމާސް ކޮށްފައިއެވެ.

"އަޅުގަނޑުމެންގެ އިލްތިމާސްއަކީ ކަނޑު ދަތުރު ފަތުރު ކުރަށްވާ ބޭފުޅުން މެޓް އޮފީހުން ރަނގަޅަށް މައުލޫމާތު ސާފުކޮށްގެން ދަތުރު ފެށުން. ދަތުރު ފެއްޓެވުމުގެ ކުރަން ސަލާމަތީ ކަންކަން ހުރީ ރަނގަޅަށްތޯ ބަލައި ދަތުރުފެށުމަށް އަޅުގަނޑުމެން އިލްތިމާސްކުރަން،" ފުލުހުންގެ މީޑިއާ ޑިޕާޓުމަންޓުން "ދުވަސް" ނޫހާއި ވާހަކަދެއްކެވި ބޭފުޅަކު ވިދާޅުވިއެވެ.

ކަނޑުމަތީގެ ހާދިސާ އެއް ދިމާވެއްޖެ ނަމަ ލަސް ނުކޮށް އެކަން އެންގުމަށް ފުލުހުން ވަނީ އިލްތިމާސްކޮށްފައެވެ.