މިފަހަރުގެ އިންތިޚާބަކީ އެމްޑީޕީގެ ސްޓައިލުގައި ބޭއްވޭ އިންތިޚާބެއް ނޫން -ޝިފާޒު
18 އޯގަސްޓް 2014 3:39
އެމްޑީޕީގެ ނާއިބު ރައީސް ކަމަށް ކުރިމަތި ލައްވާފައިވާ ޝިފާޒު
މިފަހަރު ބާއްވާ އެމްޑީޕީގެ އެތެރޭގެ އިންތިޚާބަކީ އެޕާޓީގެ ސްޓައިލުގައި ބޭއްވޭ އިންތިޚާބެއް ނޫން ކަމަށް އެޕާޓީގެ ނާއިބު ރައީސް ކަމަށް ކުރިމަތި ލައްވާފައިިވާ، ބާރަށު ދާއިރާގެ ކުރީގެ މެންބަރު މުޙައްމަދު ޝިފާޒު ވިދާޅުވެއްޖެއެވެ.
އޭނާ ވިދާޅުވީ އެމްޑީޕީގެ ސްޓައިލަކީ އެތެރޭގެ އިންތިޚާބުވެސް ވަރަށް ވާދަވެރި ކަމާއެކު ޑިމޮކްރަސީގެ ހަމަތަކުގެ މަތިން ބޭއްވުން ކަމަށެވެ. ނަމަވެސް މިފަހަރުގެ އިންތިޚާބުގައި މަގާމުތަކަށް ކުރިމަތި ލައްވާފައިވާ މީހުން މަދު ކަމުން އެސްޓައިލެއް ނެތް ކަމަށެވެ.
"ޕާޓީގެ ނާއިބު ރައީސަކަށް އަޅުގަނޑު ކުރިމަތިލީ ވަރަށް ވާދަވެރި ކެންޕޭނެއް ކުރަން ޖެހޭނެ ކަމަށްވިސްނައިގެން. އަޅުގަނޑު އުންމީދު ކޮށްގެން ހުރީ ވަރަށް ބޮޑެތި ޗެލެންޖުތަކާ ކުރިމަތިލައިގެން އިންތިޚާބު ކާމިޔާބު ކުރަން. ނަަމަވެސް އެހެން ނުވި. ނާއިބު ރައީސަކަށް ވާދަކުރަން މިޖެހުނީ އަޅުގަނޑު އެކަނި. އެކަމާ ވަރަށް ދެރަވެފައި މިހުރީ،" އޭނާ ވިދާޅުވިއެވެ.
ޕާޓީގެ ނާއިބު ރައީސް ކަމަށް ޝިފާޒުގެ އިތުރަށް އެމްޑީޕީގެ ކުރީގެ ނާއިބު ރައީސް އަލްހާން ފަހުމީވެސް ކުރިމަތި ލެއްވިއެވެ. ނަމަވެސް އިންތިޚާބީ ކޮމިޓީން ވަނީ އޭނާ ގެ ޝަރުތު ފުރިހަމަ ނުވާ ކަމަށް ނިންމައި އިންތިޚާބުގައި ވާދަ ނުކުރެވޭނެކަން އޭނާއަށް އަންގާފައެވެ.
މިއިންތިޚާބުގައި ޕާޓީގެ ނާއިބު ރައީސް ގެ އިތުރަށް ރައީސާއި، ޗެއާޕާސަންގެ މަގާމަށްވެސް ބޭފުޅުން އިންތިޚާބު ކުރާނެއެވެ. ނަމަވެސް އެދެ މަގާމުންކުރެ ކޮންމެ މަގާމަކަށްވެސް ކުރިމަތި ލައްވާފައިވަނީ އެންމެ ބޭފުޅެކެވެ.
ރައީސް ކަމަށް ކުރިމަތި ލައްވާފައިވަނީ ރާއްޖޭގެ ކުރީގެ ރައީސުލްޖުމްހޫރިއްޔާ އަދި އެމްޑީޕީގެ ވަގުތީ ރައީސް މުހައްމަދު ނަޝީދެވެ. ޗެއާޕަސަނަކަށް ކުރިމަތި ލައްވާފައިވަނީ ތޮއްޑޫ ދާއިރާގެ ކުރީގެ މެންބަރު އަލީ ވަހީދެވެ. ޗެއަރޕާސަންގެ ނާއިބު (މާލީ) ކަމަށްވެސް ކުރިމަތި ލައްވާފައިވަނީ އެންމެ ބޭފުޅެކެވެ. އެއީ ޅ. ހިންނަވަރު، ނޫރާނީއާގޭ، ޢަލީ ނިޔާޒެވެ.
ޝިފާޒު ވިދާޅުވީ ވާދަކުރާނެ އިދިކޮޅު ކެންޑިޑޭޓެއް ނެތުމަކީ އިންތިޚާބުގެ ފޯރިވެސް ވަރަށް ކުޑަވާ ކަމެއް ކަމަށެވެ. ނަަމަވެސް މަގާމަށް އިންތިޚާބުވެ ވަޑައިގެންފި ކަމަށްވާނަމަ ޕާޓީ ވެރިންގެ ލަފައާއި، އިރުޝާދާއެކު ޕާޓީ ކުރިއެރުވުމުގެ މަސައްކަތް ކުރައްވާނެ ކަމަށެވެ. އޭނާ ވިދާޅުވީ ނާއިބު ރައީސަކަށް ހޮވި ވަޑައިގެންނެވުމަށް ފަހުވެސް މަސައްކަތް ކުރައްވާނީ ޕާޓީއަށް އެންމެ ފައިދާވާނެ ގޮތަށް ކަމަށެވެ.
މިއިން ކޮންމެ މަގާމަކަށް އެންމެ ބޭފުޅެއް ކުރިމަތި ލައްވާފައިވިޔަސް އިންތިޚާބު އޮންނާނެވެ. އިންތިޚާބަށް ފަހު މަގާމަށް ހޮވި ވަޑައިގަންނަވާނީ ވޯޓުލާ މީހުންގެ 10 އިންސައްތަ ލިބިގެން ކަމަށް އެމްޑީޕީގެ އިންތިޚާބީ ކޮމިޓީންވަނީ ހާމަ ކުރައްވާފައެވެ.
އެމްޑީޕީގެ ލީޑަރޝިޕުގެ މަގާމްތަކަށް މީހުން ހޮވުމަށް ބާއްވާ އިންތިޚާބު އޮންނާނީ މިހިނގާ އޮގަސްޓްމަހުގެ 29 ވަނަވާ ބުދަ ދުވަހުއެވެ.
ކިޔުންތެރިންގެ ހިޔާލު