ރައީސް ޔާމިން ދިރިއުޅުއްވާ ގެކޮޅު ކައިރިއަށް އެއްވެ ޝުއޫރު ފާޅުކުރުމަށް މަސައްކަތްކޮށްފި

ރައީސް ޔާމީން ދިރިއުޅުއްވާ ގެކޮޅު ގ. ދޫވެހި ކައިރިއަށް އެމްޑީޕީ ބަޔަކު އެއްވެ ޝުއޫރު ފާޅުކުރުމަށް މަސައްކަތްކޮށްފިއެވެ.

ރައީސް ޔާމިން ދިރިއުޅުއްވާ ގެކޮޅު ކައިރިއަށް އެއްވެ އެމްޑީޕީން ޝުއޫރު ފާޅުކުރުމަށް މަސައްކަތްކޮށްފައިވަނީ "ފާޅުގައި ގައުމު ވިއްކާލަނީ" ނަމުގައި އެޕާޓީން ބާއްވަމުން ގެންދާ ސިލްސިލާ ޖަލްސާތަކުގެ ތެރެއިން އެޕާޓީގެ ހަރުގޭގައި މިރޭ ބޭއްވި ޖަލްސާއަށް ފަހުއެވެ.

ފުލުހުން ބުނީ ރައީސް ޔާމިން ދިރިއުޅުއްވާ ގެ ކޮޅުކައިރިއަށް އެއްވުމަށް ބަޔަކު މަސައްކަތް ކުރި ނަމަވެސް، ބޮޑު ރަސްގެފާނު މަގާއި، އަލިކިލެއްގެފާނު މަގު ގުޅޭ ޖަންގުޝަން ސަރަހައްދުން އެމީހުން ހުއްޓުވާފައިވާ ކަމަށެވެ. އަދި މިހާރު އެ ސަރަހައްދުގައި ތިބި މީހުން ފޮނުވާލާފައިވާ ކަމަށެވެ.ރައީސް ޔާމީނު މިވަގުތު މާލޭގައި ނޫޅުއްވައެވެ. އެމަނިކުފާނު ހުންނެވީ "ދެވަނަ ޔޫތު އޮލިމްޕިކް ގޭމްސް" ހުޅުވުމުގެ ރަސްމިއްޔާތުގައި ބައިވެރިވެ ވަޑައިގެންނެވުމަށް ޗައިނާގައެވެ.

އެމްޑީޕީ ހަރުގޭގައި މިރޭ ބޭއްވި ބައްދަލުވުމަކީ ސްޕެޝަލް އިކޮނޮމިކް ޒޯން (އެސްއީޒެޑް) ބިލުގައި ހުރި ބައެއް ކަންކަމާއިމެދު ނުރުހުން ފާޅުކުރުމުގެ ގޮތުން ބޭއްވި ބައްދަލުވުމެކެވެ. އެމްޑީޕީން ބުނީ އެބިލު އޮތް ގޮތުން ކައުންސިލުތަކުގެ ބާރު ކެނޑިގެންދާނެ ކަމަށެވެ. އަދި ބިލުގެ ސަބަބުން ރާއްޖޭގެ ބާޒާރަށް "ކަޅު ފައިސާ" ވެއްދުމުގެ ފުރުސަތު ވެސް އެބައޮތްކަމަށެވެ.

މިކަމާ ގުޅިގެން ޕީޕީއެމުން ބުނަނީ އެސްއީޒެޑް ބިލަކީ ރާއްޖޭގެ އިގްތިސާދު ފުޅާކޮށް ހަރުދަނާ ކުރުމަށް މުހިންމު ބިލެއް ކަމަށެވެ. އަދި ބިލު ފާސްކުރުމުގެ ބާރު އެ ޕާޓީއަށް އޮތް ނަމަވެސް އިދިކޮޅު ޕާޓީތަކުގެ މަޝްވަރާއާ ނުލައި ބިލު ފާސްކުރަން ބޭނުން ނުވާކަމަށެވެ.

އެސްއީޒެޑް ބިލުގެ މަސައްކަތްކުރާ މާލިއްޔަތު ކޮމެޓީގެ ބައްދަލުވުންތައް ހަފްތާއަކު ހަ ދުވަހު ކުރިއަށް ގެންދިއުމަށް މިއަދު އެކޮމެޓީން ވަނީ ނިންމައިފައިއެވެ. އެގޮތަށް ނިންމާފައިވަނީ ޕީޕީއެމާއި އެމްޑީއޭގެ މެމްބަރުންެ ވޯޓުދެއްވައިގެނެވެ. އެމްޑީޕީގެ މެމްބަރުން މިއަދުގެ ކޮމެޓީ ބައްދަލުވުމުގައި ބައިވެރިއެއްނުވެއެވެ. އެހެން ނަމަވެސް ޖުމްހޫރީ ޕާޓީގެ ލީޑަރު ގާސިމް އިބްރާހީމާއި، އެ ޕާޓީގެ ޕާލިމެންޓަރީ ގުރޫޕުގެ ނައިބު ރައީސް އަބްދުﷲ ރިޔާޒު ކޮމެޓީގައި ބައިވެރިވެ ވަޑައިގެންނެވިއެވެ. އެ ބޭފުޅުން އެއްވެސް ކޮޅަކަށް ވޯޓެއް ނުދެއްވައެވެ.