ރިޟްވާން ގެ ފޯން ސިގްނަލް އެންމެ ފަހުން ލިބިފައިވަނީ މާލެއިން -ޕޮލިސް

ވީނުވީއެއް ނޭގި ގެއްލިގެން ހޯދަމުން އަންނަ މިނިވަން ނޫހުގެ ނޫސްވެރިއާ ރިޟްވާން އަބްދުﷲ ގެ (28 އަހަރު) ފޯނު ސިގުނަލް އެންމެ ފަހުން ލިބިފައިވަނީ މާލެއިން ކަމަށް ފުލުހުންގެ އޮގަނައިޒްޑް ކްރައިމް އިންވެސްޓިގޭޝަން ޑިޕާޓުމަންޓުގެ ހެޑް ޗީފް އިންސްޕެކްޓަރ އޮފް ޕޮލިސް އަބްދުﷲ ސަތީހް މިރޭ ވިދާޅުވެއްޖެއެވެ.

ރިޟްވާނު ގެއްލުނު މައްސަލައިގެ މައުލޫމާތު ހާމަކުރުމަށް މިރޭ ބޭއްވި ނޫސްވެރިންގެ ބައްދަލުވުމެއްގައި ސަތީހް ވިދާޅުވީ މިހާތަނަށް ހޯދުނު ހޯދުންތަކުން ރިޟްވާނުގެ މޯބައިލް ޑާޓާ އެންމެ ފަހުން ބޭނުން ކޮށްފައިވަނީ މިމަހު 8 ވަނަ ދުވަހު މެންދަމު 2:30 އެހައިކަންހާއިރު މާލޭ ހެންވޭރު ސަރަހައްދުންކަމަށެވެ.

އެހެން ނަމަވެސް އޭނާ ހުޅުމާލެއަށް ދިއުމަށް ޓިކެޓުނަގަންހުރިތަން ސީސީޓީވީ ފުޓޭޖެއް ފުލުހުންނަށް ލިބިފައިވާކަމަށް އޭނާ ވިދާޅުވިއެވެ. އަދި އޭނާ އޭރު ލައިގެން ހުރީ ކަޅުކުލައިގެ ހެދުމެއް ކަމަށްވެސް ވިދާޅުވިއެވެ. އެ ފުޓޭޖަކީ އެރޭ މެންދަމު 00:45 ހާއިރު މާލޭގައި ހުންނަ ހުޅުމާލޭ ފެރީޓާމިނަލުގެ ސީސީޓީވީން ނަގާފައިވާ ފުޓޭޖެކެވެ.

"އެންމެ ފުރަތަމަ އާއިލާގެ ފަރާތުން ރިޕޯޓުކުރީ މަޑު ފެހިކުލައިގެ ޓީޝާޓެއްކަމަށް އޭނާ އެރޭލައިގެން ހުރީ. އެހެން ނަމަވެސް އަޅުގަނޑުމެންނަށް ލިބުނު ސީސީޓީވީ ފުޓޭޖުން ފެންނަ ގޮތުގައި ރިޟްވާން ލައިގެން ހުރީ ކަޅުކުލައިގެ ހެދުމެއް،"

ފުލުހުންނަށް ލިބިފައިވާ ސީސީޓީވީ ފުޓޭޖުތަކުން ފެންނަގޮތުން ރިޟްވާނު ގެއްލުނުރޭ 00:40 އެހައިކަންހާއިރު މާލޭ ހުކުރު މިސްކިތް ސަރަހައްދުން އޭނާ ފެނިފައިވެއެވެ. އަދިއެސަރަހައްދުން ރަހުމަތްތެރިއަކާ ވާހަކަ ދައްކާފައިވާ ކަމަށް ސަތީހު ވިދާޅުވިއެވެ. އޭނާގެ ރަހުމަތްތެރިއާއާ ވެސް ފުލުހުން ވަނީ ސުވާލުކޮށްފައެވެ. ނަމަވެސް ފުލުހުން ކުރި ސުވާލުތަކުގެ ތަފްސީލެއް ހާމައެއް ނުކުރައްވައެވެ.

އޭނާ ހޯދުމަށްޓަކައި ހުޅުމާލެ އެއްކޮށް ބަލައިފާސްކޮށްފައިވާ ކަމަށް ސަތީހު ވިދާޅުވިއެވެ. އަދި އޭގެއިތުރުން މާލެއާއި ރާއްޖޭގެ އަތޮޅުތަކުގެ ފޮލިސް ސްޓޭޝަންތަކަށް އަންގައިގެން އެކަން ކުރަމުން އަންނަކަމަށް ވެސް ވިދާޅުވިއެވެ. އޭނާގެ ފޯނު ކޯލު ލޮގް ގެ މައުލޫމާތުވެސް ހޯދައިގެން އެނާ އާއި ގުޅާފައިވަނީ ކޮންބައެއްތޯ ބަލައި އެނާއި ގުޅާފައިވާ މީހުންނާ ސުވާލުކުރުމުގެ މަސައްކަތްވެސް ފުލުހުން ވަނީ ކޮށްފައިއެވެ.

މިހާތަނަށް ފުލުހުންނަށް ލިބިފައިހުރި ހެކިތަކުގެ މައްޗަށް ބަލައި އޭނާ ގެއްލިފައިވަނީ ކޮންގޮތަކުންކަން ހާމަކުރަން އަދި މާ އަވަސްކަމަށް ސަތީހު ވިދާޅުވިއެވެ.

"އަޅުގަނޑުމެންގެ ތަހުގީގު ވަކި ގޮތަކަށްނޫން ހުރިހާ އޭންގަލަކުންވެސް މިގެންދަނީ ކުރަމުން. އެކަމުގައި ހޯދެން ހުރި ހެކިތަކެއް އަޅުގަނޑުމެން މިދަނީ އެއްކުރަމުން. ރިޟްވާން ގެއްލުމަކީ ވަކި ގޮތަކަށް ހިނގިކަމެއްކަމަށް ބަލައިގެން ހަމައެކަނި އެގޮތަކަށް ފޯކަސް ކުރުމުގެ ބަދަލުގައި ހުރިހާ ގޮތަކަށް އަޅުގަނޑުމެން ބަލަމުން މިގެންދަނީ،" ސަތީހު ވިދާޅުވިއެވެ.