ޣައްޒާ ފަންޑުގެ ފައިސާ ޙަވާލުކުރުމަށް ރެޑްކްރެސެންޓުން ފީއެއް ނުނަގާނެ
17 އޯގަސްޓް 2014 20:02
ޣައްޒާ ފަންޑަށް އެހީވުމަށްޓަކައި ބަހައްޓާފައިވާ ފޮށްޓަކަށް މީހަކު ފައިސާ އަޅަނީ: ފޮޓޯ-އައްޑޫ ލައިވް
"ހެލްޕް ޣައްޒާ ޓެލެތޯން" އަށް ލިބިފައިވާ ފައިސާ ފަލަސްތީނުގެ ރައްޔިތުންނާ ހަވާލު ކުރުމަށް ޖާމިނުވާ ގަތަރުގެ ރެޑްކްރެސެންޓުން އެކަން ކޮށްދެނީ އެއްވެސް ފީއެއް ނުނަގައި ކަމަށް ޓެލެތޯންގެ މީޑިއާ ކޯޑިނޭޓަރ އަޙުމަދު ޒާހިރު (ހިރިގާ) ވިދާޅުވެއްޖެއެވެ.
އޭނާ މިހެން ވިދާޅުވީ ރެޑްކްރެސެންޓުން އެކަން ކޮށްދެނީ ޖުމްލަ ފައިސާގެ 5 އިންސައްތައިގެ ފީއެއް ނަގައިގެން ކަމަށް ވާހަކަ ދެކެވުމުންދާތީ "ދުވަސް" އިން ދެންނެވި ސުވާލަކަށް ޖަވާބު ދެއްވަމުންނެވެ.
އޭނާ ވިދާޅުވީ މިފަންޑަކީ ޣައްޒާގެ ރައްޔިތުންނަށް ދިމާވެފައިވާ މައްސަލަތައް ހައްލު ކުރުމަށް ދިވެހި މީޑިއާއިން އިސްނަގައިގެން ރައްޔިތުން އެއްކޮށްފައިވާ ފައިސާ ކަމަށެވެ. އެފައިސާ ހަވާލު ކޮށް ދިނުމަށް ޖާމިނުވަނީ ގަތަރުގެ ރެޑްކްރެސެންޓުން ކަމަށެވެ.
"މިހާރު ވާހަކަ ދައްކަމުން ގެންދަނީ ބޭސް ފަރުވާ އާއި ކާބޯތަކެތި ފޯރުކޮށްދީގެން ޣައްޒާއަށް އެހީތެރިކަން ފޯރު ކޮށްދޭން. މިފަންޑަކީ ބޮޑަށް ރިލީފް ފަންޑެއްގެ ގޮތުގައި ކުރިއަށް ގެންދާ ފަންޑެއް" ޒާހިރު ވިދާޅުވިއެވެ.
ޣައްޒާ ފަންޑަށް މިހާތަނަށް ވަނީ 22.5 މިލިޔަން ރުފިޔާ ލިބިފައި ކަމަށްވެސް ޒާހިރު ވިދާޅުވިއެވެ. އަދި ނުލިބި 2.7 މިލިޔަން ރުފިޔާ އެބަހުރި ކަމަށްވެސް ވިދާޅުވިއެވެ. ޣައްޒާ ފަންޑު ހުޅުވިފައި ހުންނާނީ މި ހަފްތާގެ ބުރާސްފަތި ދުވަހުގެ ބޭންކް ބަންދު ވުމާހަމައަށް ކަމަށް ވެސް އޭނާ ވިދާޅުވިއެވެ.
ކިޔުންތެރިންގެ ހިޔާލު