ޗައިނާގެ ބައެއް ވިޔަފާރި ކުންފުނިތަކާ ރައީސް ޔާމިން ބައްދަލުކުރައްވައިފި
17 އޯގަސްޓް 2014 9:38
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، ޗައިނާގެ ބައެއް ވިޔަފާރި ކުންފުނިތަކާ ބައްދަލުކުރައްވައިފި ކަމަށް ރައީސް އޮފީހުން ހާމަކޮށްފިއެވެ.
ރައީސް އޮފީހުން ބުނީ ރައީސުލްޖުމްހޫރިއްޔާ މިއަދު ބައްދަލުކުރެއްވި ބައެއް ފަރާތްތަކުގެ ތެރޭގައި، ޖިއާންގސޫ ޕްރޮވިންސްގެ ޓްރާންޕޯރޓޭޝަން އިންޖިނިއަރިންގ ގްރޫޕު، ޗައިނާ ސްޓޭޓް ކޮންސްޓްރަކްޝަން އިންޖިނިއަރިންގ ކޯޕަރޭޝަން، ހުއާވެއި ޓެކްނޮލޮޖީސް ކޯޕަރޭޝަންގެ އެންމެ އިސްވެރިން ހިމެނިވަޑައިގަންނަވާކަމަށެވެ.
ރައީސުލްޖުމްހޫރިއްޔާ ހުންނަވާ ހޮޓަލުގައި ވަކިވަކިން މިއަދު މެންދުރުފަހު ބޭއްވެވި ބައްދަލުކުރެއްވުންތަކުގައި މިކުންފުނިތަކުން ރާއްޖޭގެ ތަރައްޤީގެ މަޝްރޫޢުތަކަށް ހުރި ފުރުޞަތުތަކާއި އެފަރާތްތަކުގެ ޝައުޤުވެރިކަން ހުރި ދާއިރާތަކާ ބެހޭގޮތުން މަޝްވަރާ ކުރެއްވި ކަމަށްވެސް ރައީސް އޮފީހުން ހާމަރެއެވެ. މީގެ އިތުރުން ޗައިނާގެ އެންމެ ގިނަ ޢަދަދެއްގެ ފަތުރުވެރިން ރާއްޖެއަށް ގެނައުމުގައި ޙަރަކާތްތެރިވާ ޓްރެވަލް އޭޖެންސީއެއް ކަމުގައިވާ 'ތޫނިއާ' ގެ އިސްފަރާތްތަކާ ރައީސުލްޖުމްހޫރިއްޔާ ބައްދަލުކުރައްވައި، އެފަރާތުން އިންތިޒާމް ކުރެއްވި މެންދުރުގެ ފަރިއްކޮޅުގައި ރައީސުލްޖުމްހޫރިއްޔާ ބައިވެރިވެވަޑައިގެންނެވިއެވެ.
ދެވަނަ ޔޫތު އޮލިމްޕިކްސް ގޭމްސް ހުޅުވުމުގެ ރަސްމިއްޔާތުގައި ބައިވެރިވެވަޑައިގަތުމަށް ޗައިނާ ސަރުކާރުން އެރުވި ދަޢުވަތު ރައީސުލް ޖުމްހޫރިއްޔާ މިވަގުތު ހުންނެވީ ޗައިނާގައިއެވެ.
ކިޔުންތެރިންގެ ހިޔާލު