އެއްބަސްވުންތައް އުވާލަން ސަރުކާރުން ނިންމި ނިންމުމަކީ ޒާތީކަމެއް: ގާސިމް
16 އޯގަސްޓް 2014 8:34
ވިލާގެ ކުންފިތަކާއިއެކު ވެފައިވާ ތިން އެއްބަސްވުމެއް އުވާލުމަށް ސަރުކާރުން ނިންމި ނިންމުމަކީ ޒާތީ ކަމެއް ކަމަށް ވިލާ ކުންފުނީގެ ޗެއަރމަން ގާސިމް އިބްރާހިމް ވިދާޅުވެއްޖެއެވެ.
ގާސިމް އިބްރާހިމް ހިންގަވާ "ވީ މީޑިއާއަށް" ދެއްވާފައިވާ އިންޓަވިއުއެއްގައި ވިދާޅުވެފައިވަނީ އޭނާގެ ކުންފުނިތަކާއިމެދު ވެފަިއވާ އެއްބަސްވުންތައް އުވާލީ ސްޕެޝަލް އިކޮނޮމިކް ޒޯނުގެ ބިލަށް މުއައްސަސާތަކުން ދީފައިވާ ރިކޮމަންޑޭޝަންތަކާއި އެއްގޮތަށް އަމަލުކުރުމަށް މަސައްކަތްކުރުމުންކަމަށެވެ.
"މިކަހަލަ ކަންކަމުގައި އުޅޭއިރު ރާޅު އަންނާނެ، މިއީ އޭގެ ރާޅު މި ކަންކަން ކުއްލި ގޮތަކަށް އައުން މިއީ ސިޔާސީ ކަމެއް. މިއީ މަޖިލީހުގައި ކުރާ މަސައްކަތުގެ ތެރޭގައި މިހާރު އޮތް ސްޕެޝަލް އިކްނޮމިކް ޒޯންތައް ކަނޑައެޅުމުގެ ބިލަށް މުއްސަސާތަކުން ދީފައިހުރި ރިކޮމެންޑޭޝަންތައް ހިމަނައި ދެފުށް ފެންނަ ގޮތަށް އެކަން ކުރުމަށް ވާހަކަ ދެއްކުމުން ޒާތީގޮތުން އައިކަމެއް. ވަރަށް ބޮޑަށް އޮޅުވާލާފައިވާ މައުލޫމާތަކެއްގެ މައްޗަށް ފިޔަވަޅު އަޅައިގެން ދިން ގެއްލުމެއް،"
ގާސިމް ވިދާޅުވީ އޭނާ އެދިލައްވަނީ ކޮމިޓީގެ ގައިވާއިދާ އެއްގޮތައް ކަން ކުރިއަށް ގެންދިއުމަށް ކަމަށެވެ. އަދި ކަމާއިގުޅޭ މުއައްސަސާތަކުން ބިލަށް ހުށަހަޅާފައިވާ ކަންކަމަށް ބަލައިގެން ބިލުގެ ކަންކަން ކުރިއަށް ގެންދިއުމަށް އޭނާ އެދިލައްވާކަމަށް ވެސް ގާސިމް ވިދާޅުވިއެވެ.
"އަޅުގަނޑު މިއެދެނީ ކޮމެޓީއާއި މަޖިލީހުގެ ގަވައިދާ އެއްގޮތަށް ކަންކަން ގެންދަން. ފުލުހުންނާއި ކަސްޓަމާއި އެލްޖީއޭ އާއި އަދިވެސް ކަމާ ގުޅޭ މުއައްސަސާތަކުން އެބިލަށް ހުށަހަޅާފައިހުރި އިސްލާހުތަކަށް ބެލުމަށް. އޭގެ ތެރެއިން އެއްކަމަކީ ޒޯންތަކުގެ އިމަކާ ބޮޑުމިނެއް ކަނޑައަޅާފައި އޮތުން. ދެން އިނާޔާތްތައް ބިލުގައި ކަނޑައެޅި ބަޔާންވުން. ކުއްޔަށްދެވޭ މުއްދަތުވެސް ގާނޫނުން ކަނޑައެޅުން،"
ޒޯނުތައް ކުއްޔަދޭ މުއްދަތުވެސް އިންވެސްޓަރުންނަށް އޮޅުންފިލުވައި ދޭން އެދިލައްވާކަމަށް ގާސިމް ވިދާޅުވެފައިވެއެވެ.
"90 އަހަރަށް ދެންޏާ ސީދާކޮށް އެހެން ވެސް ބުނާށޭ. އެހެން ހެދީމާ ބާރަށް އިންވެސްޓަރުން އަނާނެޔޭ. މިކަހަލަ އެތެރެ ފެންނަ ނުކުތާތަކެއް އަޅުގަނޑު ފާހަގަ ކުރީ އަދި އެކަންކަން ގާނޫނުގައި ލިޔަން އެދުނީ. އަޅުގަނޑުގެ މައްސަލައެއް ނެތޭ. މިކަންކަން ޕޮޒިޓިވް ކޮށް ހުރިއްޔާ،"
މިދިޔަ ބުރާސްފަތި ދުވަހު ސަރުކާރުން އުވާލާފައިވަނީ ވިލާ ޓްރޭޑަށް ދަނޑުވެރިކަން ކުރުމަށް ދީފައިވާ ލ. ބަރެސްދޫގެ އެއްބަސްވުމާ، ގދ ކާޑެއްދޫ އެއާޕޯޓް ހިންގުމަށް ވިލާ އެއާލައިނާއެކު ސަރުކާރުން ވެފައިވާ އެއްބަސްވުމާ، ގދ ހޯޑެއްދޫގައި މަސްފެކްޓްރީއެއް އެޅުމަށް ހޮރައިޒަން ފިޝަރީޒް އާއިއެކު ވެފައިވާ އެއްބަސްވުމެވެ.
ނަމަވެސް ރައީސުލް ޖުމްހޫރިއްޔާ އަބްދުﷲ ޔާމިން ވިދާޅުވެފައިވަނީ އެއްބަސްވުންތައް އުވައިލުމަށް ސަރުކާރުން ނިންމާފައިވަނީ އެތަންތަނަކީ ގާސިމްގެ ތަންތަންކަމަށްވުމުން ނޫންކަމަށެވެ. އެއްބަސްވުމާ ހިލާފުވާ އެހެން ރަށްރަށްވެސް ސަރުކާރަށް ނަގަމުން އަންނާނެކަމަށެވެ.
ކިޔުންތެރިންގެ ހިޔާލު