އުމަރު ނަސީރުގެ ސިޔާސަތުތަކާއި ދެކޮޅަށް ޒުވާނުން ނުރުހުން ފާޅުކޮށް ސައިކަލުބުރެއް ބާއްވައިފި

ހޯމް މިނިސްޓަރ އުމަރު ނަސީރު ގެންގުޅުއްވާ ސިޔާސަތުތަކާ ނުރުހުންފާޅުކޮށް މާލޭގައި ދިރިއިއުޅޭ ޒުވާނުންގެ ބަޔަކު މިއަދު ސައިކަލު ބުރެއް ބާއްވައިފިއެވެ.

ޝުއޫރުތައް ލިޔެފައިވާ ބޯޑުތަކެއް ހިފައިގެން ގިނަ އަދަދެއްގެ ޒުވާނުން ބައިވެރިވި މިސައިކަލު ބުރުގައި މާލޭގެ ބޮޑެތި މަގުތަކުގައި ވަނީ ދުއްވާފައެވެ. އަދި އެޒުވާނުންވަނީ މިނިސްޓަރ އުމަރާ ދެކޮޅަށް ޝުއޫރު ފާޅުކޮށްފައެވެ.

އެގޮތުން މުޒާހަރާގެ ބައިވެރިން ގޮވަމުން ދިޔައީ ޒުވާނުން ބޭކާރު ނުކުރުމަށާއި ޒުވާނުން ބާކީ ނުކުރުމަށެވެ. އަދި މާލޭގެ އެކި ސަރަހައްދުން ފުލުހުން ރޫޅާލާފައިވާ ޒުވާނުންގެ ހަޓް ތަކާއި އެތަންތަނުން ގެންދިޔަ ތަކެތި އަނބުރާ ދިނުމަށްވެސް މިމުޒާހަރާގައި ބައިވެރިން ގޮވަމުންދިޔައެވެ.

"އަޅުގަނޑުމެން މިމުޒާހަރާގެ ބޭނުމަކީ، މާލޭގެ އެކި ސަރަހައްދު ތަކުގައި ޒުވާނުން އަޅާފައިވާ ހަޓުތައް ފުލުހުން ނެގީމަ އެކަމާ ދެކޮޅަށް އަޑު އުފުލުމުގެ ގޮތުން ބާއްވާ މުޒާހަރާއެއް. އެތަންތަން ނެގުމުގެ ސަބަބުން ޒުވާނުން މިވަނީ އެކި ދިމަދިމާލަށް ވިއްސިވިހާލިވެފަ. ހަޓުތައް ހުރިއްޔާ އެތަނުގެ ތެރޭގައި އަޅުގަނޑުމެންނަށް ތިބެވޭ. ހަޓުތައް ނަގަމުން އެގެންދަނީީ މާރާމާރީ ހުއްޓުވާށޭކިޔާފަ. ހަޓުތައް ނެގިޔަސް މާރާމާރީއެއް ނުހުއްޓުވޭނެ. މާރާމާރީ ހުއްޓުވޭނީ މާރާމާރީ ހިންގާ މީހުން ހައްޔަރުކުރީމަ. މިސާލަކަށް އަޑިޕާކުގަ ހުރި ހަޓުތައް ނެގީމަ މާ އަނދިރިވާނެ. އެތަނަށް އައިސް މީހެއްގަޔަށް ވަޅިއެއް ޖަހާފަދާއިރުވެސް ނޭގޭނެ،" މުޒާހަރާގެ އިސްބައިވެރިއެއް "ދުވަސ"އަށް މައުލޫމާތު ދެމުން ބުންޏެވެ.

މީގެ އިތުރުން މުޒާހަރާގެ ބައިވެރިން ގޮވަމުން ދިޔައީ ޒުވާނުންނަކީވެސް އިހްތިރާމް ކުރަން ޖެހޭ ބައެއްކަމަށްށާއި، އެހެންކަމުން ފުލުހުން ޒުވާނުންނާއި މުޚާތަބުކޮށް މުއާމަލާތް ކުރާގޮތް ބަދަލުކުރުމަށްށެވެ.

މުޒާހަރާގައި އަމަލީ ގޮތުން ބައިވެރިވި އިސްފަރާތެއް ބުނީ މި މުޒާހަރާއަކީ ސިޔާސީ އެއްވެސް މަޤްސަދެއް ނެތް ސުލްހަވެރި މުޒާހަރާއެއް ކަމަށާއި ޒުވާނުންގެ ޑިމާންޑްތައް ސަރުކާރަށް އިއްވުމަށް ކުރާ މުޒާހަރާއެއްކަމަށްށެވެ.

މާލެތެރޭގައި ހިނގަމުންދާ މާރާމާރީ ކޮންޓްރޯލް ކުރުމަށް ކަމަށްބުނެ ފުލުހުންވަނީ މިދިޔަ ބުރާސްފަތި ދުވަހު މާލޭގެ އެކި ސަރަހައްދު ތަކުގައި ޒުވާނުން އަޅާފައިވާ ހަޓުތައް ނަގައި އެތާތެރޭގައި ގެންގުޅުނު ސާމާނުތައްވެސް ނަގާފައެވެ.