އިންސާނީ ހައްގުތަކަށް މަސައްކަތްކުރާ ދުވަސް ފާހަގަކުރުމަށް ކުޑަކުދިންގެ ހަވީރުތަކެއް ބާއްވައިފި

"ދިވެހިރެޑް ކްރެސެންޓުންގެ" އަހަރީ ދުވަސް އާއި ބައިނަލް އަގްވާމީ އިންސާނީ ހައްގުތަކަށް މަސައްކަތްކުރާ ދުވަސް ފާހަގަ ކުރުމަށް ހިޔުމަނިޓޭރިއަން ފެސްޓިވަލްގެ ނަމުގައި މާލެއާއި ރާއްޖޭގެ އެކި ކަންކޮޅުތައި ކުޑަކުދިންގެ ހަވީރުތަކެއް މިއަދު ބާއްވާއިފިއެވެ.

މާލޭ ރާޅުގަނޑު ސަރަހައްދުގައި މިއަދު ހަވީރު 4:00 ގައި ބޭއްވި ހަވީރުގައި ގިނަ އަދަދެއްގެ ކުޑަކުދިންނާއި އާމުން ބައިވެރިވިއެވެ.

ދިވެހި ރެޑް ކްރެސެންޓުން މައުލޫމާތު ދެއްވި އެ ޖަމިއްޔާގެ އިސްބޭފުޅަކު ވިދާޅުވީ، ފެސްޓިވަލް ގައި މާލޭގެ 6 ޖަމިއްޔާއަކުން ބައިވެރިވެފައިވާކަމަށެވެ. އޭގެ ތެރޭގައި ދި ޔޫތް މޫވްމެންޓް، ޝީ ޖަމިއްޔާ، މޯލްޑިވިސް ގާލްގައިޑް އެސޯސިއޭސަން، ފެމެލީ ޕްރެޓެކްޝަން އެތޯރިޓީ، ބިއުޓްފުލް އައިސް އަދި ޑައިބެޓިކް އެޝޯސިއޭޝަން އޮފް މޯލްޑިވިސް ހިމެނެއެވެ.

މާލޭ ރާޅުގަނޑު ސަރަހައްދުގައި ބޭއްވި ފެސްޓިވަލުގައި ކުޑަކުދިންނަށް ހާއްސަ ސްޓޯލްތަކެއް ގާއިމް ކޮށްފައިހުއްޓެވެ. ކުޑަކުދިންގެ ހަރަކާތް ތަކުގެ އިތުރުން ދިވެހި ރެޑް ކްރެޝެންޓާއި ގުޅޭ މައުލޫމާތް ފެސްޓިވަލްގެ ބައިވެރިންނަން ދިވެހި ރެޑް ކްރެޝެންޓުންގެ ސުޓޯލްތަކުން ފޯރުކޮށްދިނެވެ. ޑައިބެޓިކް އެޝޯސިއޭޝަން އޮފް މޯލްޑިވިސްގެ ސްޓޯލުން ހަކުރު ޓެސްޓްކުރުމުގެ ހިދުމަތް ދީފައިވެއެވެ. އެހެން ސްޓޯލުތަކުގައި ވެސް ކުޑަކުދިންނާ ގުޅޭ ތަފާތް ކުޅިވަރުތަކުގެ އިތުރުން، އާމުންނަން އެކިކަހަލަ މެސެޖް ރައްދުކޮށްދީފައިވެއެވެ.

މާލޭގެ އިތުރުން ރާއްޖޭގެ އިތުރު 10 ސަރަހައްދެއްގައި  މިއަދު ވަނީ ދިވެހި ރެޑްކްރެސެންޓުގެ ފަރާތުން ކުޑަކުދިންގެ ހަވީރުތަކެއް ބާއްވައިފައެވެ. އެ ސަރަހައްދުތަކުގައި ބޭއްވި ހަވީރުތައްވެސް ކުރިއަށް ގެންދިޔައީ މާލޭގެ ހަވީރާއި ދާދިއެއްގޮތަކަށް ކަމަށް ރެޑްކްރެސެންޓުން ބުނެއެވެ.