ޔޫތް އޮލިމްޕިކް ގޭމްސް ހުޅުވުމުގެ ރަސްމިއްޔާތައް ރައީސް ޔާމިން ޗައިނާއަށް ވަޑައިގެންފި

އަންނަ ހޮނިހިރުދުވަހު ޗައިނާގައި ބާއްވާ ދެވަނަ ޔޫތު އޮލިމްޕިކްސް ގޭމްސް ހުޅުވުމުގެ ރަސްމިއްޔާތުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، ރޭ ޗައިނާއަށް ފުރާވަޑައިގެންފިއެވެ.

ރައީސުލްޖުމްހޫރިއްޔާ ޗައިނާއަށް ވަޑައިގަތީ އެގައުމުގެ ސަރުކާރުން އެރުވި ދަޢުވަތަކަށް ކަމަށް ރައީސް އޮފީހުން ހާމަކުރެއެވެ.

ރައީސުލްޖުމްހޫރިއްޔާގެ މި ދަތުރުފުޅުގައި، ޗައިނާގެ ރައީސާއި، ޗައިނާގެ ސޫޖައު ސިޓީގެ މޭޔަރާއި، އެޤައުމުގެ ބޮޑެތި ވިޔަފާރި ކުންފުނިތަކުގެ އިސްވެރިންނާ ބައްދަލުކުރެއްވުމަށް ވަނީ ހަމަޖެހިފައިވާކަމަށް ވެސް އެ އޮފީހުން ބުނެއެވެ. ދިވެހިރާއްޖެއާއި، ޗައިނާއާ ދެޤައުމުގެ ދެމެދުގައި ރަސްމީ ވަހަކަފުޅުތައް ބޭއްވުމަށާއި، ދެޤައުމުގެ ދެމެދުގައި ވިޔަފާރިއާއި، އިޤްތިޞާދުގެ ރޮނގުން ވެވޭ މުހިންމު އެއްބަސްވުންތަކެއްގައި ސޮއިކުރެއްވުމަށްވެސް ވަނީ ހަމަޖެހިފައިވާކަމަށް ވެސް ރައީސް އޮފީހުގެ ވެބްސައިޓުގައި ބުނެފައިވެއެވެ.

މި ދަތުރުފުޅުގެ އަނެއް މަޤްޞަދަކީ ދިވެހިރާއްޖެއަށް އިންވެސްޓްމަންޓް ހޯއްދެވުމާއި، ސަރުކާރުން ރައްޔިތުންނަށް ހޯއްދަވައިދެއްވަން ބޭނުންފުޅުވާ ތަރައްޤީއަށް މުހިންމުވާ މަޝްރޫޢުތަކަށް ޗައިނާގެ އެހީތެރިކަން ހޯއްދުމަށް މަސައްކަތް ކުރައްވާނެކަމަށް ރައީސް ޔާމިން ރޭ ވަނީ ވިދާޅުވެފައިއެވެ.

މާލެ-ހުޅުމާލޭގެ ބްރިޖްގެ މަޝްރޫއާ ގުޅޭގޮތުން ވެސް ޗައިނާ ސަރުކާރާއި މަޝްވަރާކުރައްވާނެކަމަށް އެމަނިކުފާނު ވަނީ ވިދާޅުވެފައެވެ. ޗައިނާ ހިލޭ އެހީގެ ދަށުން ބުރިޖްއެޅުމަށް މަސައްކަތް ކުރައްވާނެކަމަށް ވެސް އެމަނިކުފާނު ވަނީ ވިދާޅުވެފައެވެ.

މީގެ އިތުރުންވެސް، ރާއްޖޭގެ ތަރައްޤީއަށްޓަކައި ސަރުކާރުން ރާއްވަވާފައިވާ މުހިންމު އެކިއެކި މަޝްރޫޢުތަކާ ބެހޭގޮތުން، ޗައިނާގެ ކަމާބެހޭ ފަރާތްތަކާ މަޝްވަރާ ކުރައްވާނެ ކަމުގައި ރައީސުލްޖުމްހޫރިއްޔާ ވިދާޅުވި ކަމަށް ރައީސް އޮފީހުން ހާމަކުރެއެވެ.މިގޮތުން، އިބްރާހީމް ނާޞިރު އިންޓަރނޭޝަނަލް އެއާޕޯޓް ތަރައްޤީކުރުމުގެ މަޝްރޫޢާއި، އިޔާދަކުރަނިވި ހަކަތަ އުފެއްދުމުގެ މަޝްރޫޢާއި، އިހަވަންދިއްޕޮޅުގައި ތަރައްޤީ ކުރެވޭ "އައިހޭވަން" މަޝްރޫޢާއި، އަދި ރާއްޖޭގެ މުއާޞަލާތީ ތަރައްޤީއަށް ޤާއިމްކުރެވޭ "ސްމާޓް މޯލްޑިވްސް" މަޝްރޫޢު، ރައީސުލްޖުމްހޫރިއްޔާ ފާހަގަ ކުރެއްވިކަމަށް އެ އޮފީހުން ބުނެއެވެ.

ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ޗައިނާއަށް ކުރައްވާ މި ދަތުރުފުޅުގައި، އެމަނިކުފާނުގެ އަރިހުގައި، މިނިސްޓަރ އޮފް ފޮރިން އެފެއާޒް ދުންޔާ މައުމޫނާއި، މިނިސްޓަރ އޮފް ޓޫރިޒަމް އަޙްމަދު އަދީބު ޢަބްދުލްޣަފޫރާއި، މިނިސްޓަރ އޮފް އިކޮނޮމިކް ޑިވެލޮޕްމަންޓް މުޙަންމަދު ސަޢީދާއި، މިނިސްޓަރ އޮފް ޔޫތު އެންޑް ސްޕޯޓްސް މުޙަންމަދު މަލީޙު ޖަމާލާއި، ރައީސުލްޖުމްހޫރިއްޔާގެ އޮފީހުގެ މިނިސްޓަރ މުޙަންމަދު ޙުސައިން ޝަރީފު ބައިވެރިވެވަޑައިގަންނަވާކަމަށް ރައީސް އޮފީހުން ބުނެއެވެ.