ގާސިމްގެ ކުންފުނިތަކާއެކު ސަރުކާރުން ވެފައިވާ ތިން އެއްބަސްވުމެއް އުވާލައިފި
15 އޯގަސްޓް 2014 12:01
ޖުމްހޫރީ ޕާޓީގެ ލީޑަރ ގާސިމް އިބްރާހިމް
ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ކުންފުނިތަކާއެކު ސަރުކާރުން ވެފައިވާ ތިން އެއްބަސްވުމެއް ސަރުކާރުން އުވައިލައިފިއެވެ.
ސަރުކާރުން އުވާލާފައިވަނީ ވިލާ ޓްރޭޑަށް ދަނޑުވެރިކަން ކުރުމަށް ދީފައިވާ ލ. ބަރެސްދޫގެ އެއްބަސްވުމާ، ގދ ކާޑެއްދޫ އެއާޕޯޓް ހިންގުމަށް ވިލާ އެއާލައިނާއެކު ސަރުކާރުން ވެފައިވާ އެއްބަސްވުމާ، ގދ ހޯޑެއްދޫގައި މަސްފެކްޓްރީއެއް އެޅުމަށް ހޮރައިޒަން ފިޝަރީޒް އާއިއެކު ވެފައިވާ އެއްބަސްވުމެވެ.
ހައްދުންމަތީ ބަރެސްދޫ ވިލާ ކުންފުނީގެ އަތުން ނަގައި އެ ރަށް ޓޫރިޒަމް މިނިސްޓްރީގެ ދަށަށް ބަދަލު ކުރަން ނިންމައިފައިވަނީ އެރަށް ތަރައްގީ ކުރުމަށް ވިލާއާއި އެކު ވެފައިވާ އެއްބަސްވުމާއި އެއްގޮތަށް އަމަލު ނުކުރާތީކަމަށް ސަރުކާރުން ހާމަކުރެއެވެ.
ކާޑެއްދޫ އެއާޕޯޓް ހިންގުމަށް ވިލާ އެއާ އާ އެކު ސަރުކާރުން ހަދާފައިވާ އެއްބަސްވުން ބާތިލް ކޮށްފައިވަނީ ވެސް ވިލާ އެއާއިން އެގްރިމަންޓާ ހިލާފުވެފައިވާތީކަމަށް ބުނެއެވެ.
ހޯޑެއްދޫގައި މަސްފެކްޓްރީއެއް އެޅުމަށް ހޮރައިޒަން ފިޝަރީޒް އާއިއެކު ވެފައިވާ އެއްބަސްވު އުވާލައި އެބިން ހުސްކުރުމަށް 30 ދުވަހުގެ ނޯޓިސްއެއް އިއްޔެ ވަނީ ދީފައިއެވެ. ފިޝަރީޒް މިނިސްޓްރީން ހޮރައިޒަން އަށް އިއްޔެ ފޮނުވާފައިވާ ސިޓީގައި ބުނެފައިވަނީ ހޯނޑެއްދޫގެ އެއްބަސްވުން ބާތިލުކުރީ އެއްބަސްވުމާ އެއްގޮތަށް އަމަލު ނުކުރާތީ ކަމަށެވެ.
މި ތިން އެއްބަސްވުން ވެސް އުވައިލައިފައި ވަނީ ސްޕެޝަލް އިކޮނޮމިކް ޒޯންގެ ބިލުގެެ ކަންކަން ޕީޕީއެމް މެޖޯރިޓީން ބޭނުންވާ ގޮތަކަށް ނިންމުމުގެ ފުރުސަތު ނުދެއްވާނެ ކަމަށް ގާސިމް އިބްރާހީމް ވިދާޅުވެފައިވަނިކޮށެވެ.
ނަމަވެސް ރައީސުލް ޖުމްހޫރިއްޔާ އަބްދުﷲ ޔާމިން ރޭ ވިދާޅުވެފައިވަނީ އެއްބަސްވުންތައް އުވައިލުމަށް ސަރުކާރުން ނިންމާފައިވަނީ އެތަންތަނަކީ ގާސިމްގެ ތަންތަންކަމަށްވުމުން ނޫންކަމަށެވެ. އެއްބަސްވުމާ ހިލާފުވާ އެހެން ރަށްރަށްވެސް ސަރުކާރަށް ނަގަމުން އަންނާނެކަމަށެވެ.
ކިޔުންތެރިންގެ ހިޔާލު