އިގްތިސާދީ ސަރަހައްދުތައް ކަނޑައެޅުމުގެ ބިލުގެ ކަންކަން ޕީޕީއެމް ބޭނުން ގޮތަކަށް ނިންމުމުގެ ފުރުސަތު ނުދޭނަން: ގާސިމް
13 އޯގަސްޓް 2014 20:07
މާމިގިލީ ދާއިރާގެ މެންބަރު އަދި ޖޭޕީގެ ލީޑަރު ޤާސިމް އިބްރާހީމް: ފޮޓޯ-މަޖިލިސް
ސްޕެޝަލް އިކޮނޮމިކް ޒޯންގެ ބިލުގެެ ކަންކަން ޕީޕީއެމް މެޖޯރިޓީން ބޭނުންވާ ގޮތަކަށް ނިންމުމުގެ ފުރުސަތު ނުދެއްވާނެ ކަމަށް މާމިގިލީ ދާއިރާގެ މެންބަރު އަދި ޖުމްހޫރީޕާޓީގެ ލީޑަރު ގާސިމް އިބްރާހީމް ވިދާޅު ވެއްޖެއެވެ.
އެމަނިކުފާނު މިހެން ވިދާޅުވީ އެބިލް ދިރާސާ ކުރުމަށް އިގްތިސާދީ ކޮމިޓީގައި މަޝްވަރާ ކުރައްވަމުން ގެންދަވަނިކޮށް މިއަދު ދިމާވި މައްސަލަތަކާ ގުޅިގެން، ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުންނެވެ. އެމައްސަލައާ ގުޅިގެން އެމްޑީޕީއާއި، ޖޭޕީން ވަނީ މިއަދުގެ ކޮމިޓީގެ ބައްދަލުވުން ބޮއިކޮޓް ކޮށްފައެވެ. އެދެޕާޓީގެ މެންބަރުންވަނީ މިއަދުގެ ކޮމިޓީ ދޫކުރައްވައި ނިކުމެ ވަޑައިގެންފައެވެ.
ކޮމިޓީ ދޫކުރެއްވުމަށްފަހު ވަޑައިގެން މަޖިލީހުގެ ޖަލްސާގައި ގާސިމް ވިދާޅުވީ ޕީޕީއެމްގެ މެޖޯރިޓީން ބޭނުން ވަނީ ސަރުކާރުގެ މުއައްސަސާތަކުން ދީފައި ހުރި ލަފަޔާއި، މެންބަރުން ދައްކާ ވާހަކަ އަށް ވެސް ބެލުމެއް ނެތި ބިލްގެ ކަންކަން ގެންގޮސް ނިންމާލުމަށް ކަމަށެވެ. ނަމަވެސް އެއީ ކުރެވޭނެ ކަމެއް ނޫންކަމަށާއި އެފުރުސަތު ނުދެއްވާނެ ކަމަށެވެ.
މިމައްސަލައާ ގުޅިގެން މަޖިލިހުގައި ޒިޒާމީ މައްސަލަތައް އިތުރުވެ ޖަލްސާވަނީ ހުއްޓާލައްވާފައެވެ. މަޖިލިސް މެދުކަނޑުއްވާ ލައްވަމުން ރައީސް ޢަބްދުﷲ މަސީޙް ވިދާޅުވީ މަޖިލީހަކީ މަޝްވަރާގެ އުޞޫލުން ކަންކަންކުރާ އަދި މަޝްވަރާގެ އުޞޫލުން ކަންކަން ނިންމާ ތަނެއް ކަމަށެވެ. އެހެން ކަމުން ޕާޓީތަކުގެ މެދުގައި މަޝްވަރާ ކުރައްވައިގެން މައްސަލަ ހައްލުކުރެއްވުމަށް ޖަލްސާ މެދުކަނޑުއްވާލެއްވީ ކަމަށެވެ.
މިއަދުގެ ޖަލްސާގައި ވާހަކަ ދައްކަވަމުން ގާސިމް އިބްރާހީމް ވިދާޅުވީ އިޤްޠިޞާދީ ސަރަހައްދުތައް ކަނޑައެޅުމުގެ ބިލާމެދު އިޤްޠިޞާދީ ކޮމިޓީން އަމަލުކުރަނީ މަޖިލީހުން އެކުލަވާލާފައިވާ ޤަވާއިދާ ޚިލާފަށް ކަމަށެވެ.
"އެތާނގެ (އިގްތިސާދީ ކޮމިޓީ) މުޤައްރިރު ކޮމިޓީ މި ގެންދަވަނީ މުޅި އިޤްތިޞާދީ ކޮމިޓީގެ ގަވާއިދާ ވެސް އަދި މަޖިލީހުގެ ގަވާއިދާ ވެސް ޚިލާފަށް. އަޅުގަނޑުމެން މި ވަނީ ޖޭ.ޕީންނާއި އެމް.ޑީ.ޕީން ބޮއިކޮޓު ކޮށްފައި އެ ކޮމިޓީން މިހާރު ކުރިއަށް ގެންދާ ބިލުގެ މަސައްކަތްތައް. އެއީ ކަނޑައެޅިގެން މަޖިލީހުގެ ގަވާއިދާ ޚިލާފަށް، އަދި ކޮމިޓީގެ ގަވާއިދާ ޚިލާފަށް ހުރިހާ ކަމެއް ކުރައްވަމުން އެތައް ފަހަރެއްގެ މަތީން ތަކުރާރުކޮށް ގެންދަވާތީ،" ގާސިމް ވިދާޅުވިއެވެ.
އެމަނިކުފާނު ވިދާޅުވީ އިޤްތިޞާދީ ސަރަހައްދު ތަކެއްގެ ނަމުގައި މުޅި ޤައުމު ވިއްކާލުމުގެ ބާރުވެރިކަން ރައީސުލްޖުމްހޫރިއްޔާ އެކުލަވައިލާ ބޯޑަކަށް ދެވޭގޮތަށް އެބައޮތް ކަމަށެވެ.
"އެ ބޯޑުން ކަނޑައަޅާ މިންވަރަކަށް ޤާނޫނުގައި އޮތް ކޮސްމެޓިކު 3 އަހަރު 2 އަހަރު ޖަހާފައި ހުރި މުއްދަތުތައް މާފްވާނެ ކަމަށް ބުނެފައި ހުރި ޑިއުޓީ، ނޫނީ ވިއްޔާ ޓެކްސްތައް މާފްކޮށްދޭނެ ކަމަށް ބުނެފައި ހުރި ހުރުން އިޚްތިޔާރީ ހާލަތްތަކަށް ދީފައި ހުރިއިރު، ސަރުކާރުގެ މުއައްސަސާތަކުން ފޮނުވާފައި ހުރި ފޮނުވުންތަކަށް ވެސް ރިޢާޔަތް ކޮށްނުލައި މެންބަރުން ދައްކަވާފައި ހުރި ވާހަކަފުޅުތަކަށް ވެސް މާ ބޮޑު އަޅާލުމެއް ނެތި ކުރިއަށް ގެންގޮސް ނިންމާލަން މި ބޭނުންވަނީ" ގާސިމް ވިދާޅުވިއެވެ. އެކަމަކު އެގޮތަށް ފުރުސަތު ދެވެން ނޯންނާނެ ކަމަށްވެސް އެމަނިކުފާނު ވިދާޅުވިއެވެ.
ކިޔުންތެރިންގެ ހިޔާލު