އިގްތިސާދީ ކޮމެޓީ ހިންގަވަނީ ގަވާއިދާ ހިލާފަށް : ފައްޔާޒު

އިގްތިސާދީ ކޮމިޓީން ކަންކަން ނިންމެވުމުގައި އަމަލު ކުރައްވަމުން ގެންދަވަނީ ކޮމިޓިތަކުގެ ގާވާއިދާ ޚިލާފަށް ކަމަށް އެކޮމިޓީގެ މެމްބަރު ފައްޔާޒު އިސްމާއީލް ވިދާޅުވެއްޖެއެވެ.

"ދުވަސް" ނޫހުން ދެންނެވި ސުވާލަކަށް ޖަވާބުދެއްވަމުން ފައްޔާޒު ވިދާޅުވީ، މިއަދު ކުރިއަށް ދިޔަ ސްޕެޝަލް އިކޮނޮމިކް ޒޯންގެ ބިލުގެ ދިރާސާ މަރުހަލާގައި އެމްޑިޕީއާއި ޖޭޕީން ކޮމެޓީ ބޮއިކޮޓް ކުރަންޖެހުނު ސަބަބަކީވެސް އެއީ އެ ކޮމެޓީން ގަވާއިދާއި އެއްގޮތަށް ކަންކން ނުކުރުން ކަމަށެވެ. މީގެއިތުރުންވެސް ފައްޔާޒު ވިދާޅުވީ، މިބިލުގެ ވަކިވަކި މާއްދާތަކަށް ވޯޓައް އައްސަވަމުން ގެންދެވީވެސް ވަކި އުސޫލެއް ބެލުމެއް ނެތިކަމަށެވެ. އަދި ސަރުކާރުގެ ކަމާ ބެހޭ ފަރާތްތައް ކޮމެޓީ އަށް ހާޒިރުކޮށް، އެބޭފުޅުންގެ ޚިޔާލު ހޯދުމަށް ކޮމެޓީން މީގެ ކުރީން ފާސްކޮށްފައިވާ ކަމަށާއި، ނަމަވެސް ކޮމެޓީގެ ބައްދަލުވުން ކުރިއަށްގެންދަނީ އެ އުސޫލާ ޚިލާފަށް ކަމަށް ވެސް އެނާ ވިދާޅުވިއެވެ.

"މިބިލަކީ މުހިންމު ބިލަކަށް ވާއިރު، ކޮމެޓި މަރުހަލާގައި އަމަލު ކުރައްވަމުން ގެންދަވަނީ ގަވާއިދަށް ބެލުމެއްނެތި. ސަރުކާރު ނިސްބަތްވާ ޕާޓީގެ މެޖޯރިޓީ އޮތީމަ އެބޭފުލުން އަމަލު ކުރައްވަނީ ފެންނަ ގޮތަކަށް. އެހެންވެ މިއަދު އެމްޑީޕީއާއި ޖޭޕީން ކޮމެޓީ ބޮއިކަޓް ކޮށްފަ ނިކުންނަން ޖެހުނީ. އެމްޑީޕީ އާއި ޖޭޕީ ނުލާ ކަންކަން ނިންމެވުމުން އެއީ ރައްޔިތުންގެ މެޖޯރިޓީއަށް އިހުތިރާމް ނުކުރުން" ފައްޔާޒު ވިދާޅުވިއެވެ.

މިއަދު އިގްތިސޯދީ ކޮމިޓީގައި ކުރިއަށްދިޔަ ސްޕެޝަލް އެކޮނަމިކް ޒޯނުގެ ބިލާ ބެހޭ ގޮތުން ފައްޔާޒު ވިދާޅުވީ، މިބިލުގެ މަފްހޫމަށް ތާއީދު ކުރައްވާކަމަށާއި، ނަމަވެސް ރަނގަޅު ކުރަންޖެހޭ ވަރަށް ގިނަކަންތައްތަކެއް ހުރިކަމަށެވެ. އެގޮތުން މިބިލުގެ ސަބަބުން ލާމަރުކަޒީ ގާނޫނު އެއްކޮށްހަނިވެ ކައުންސިލްތަކުގެ ބާރު އެއްކޮށް ކެންޑޭނެ ކަމަށްވެސް އޭނާ ވިދާޅުވިއެވެ.