ގަމުގެ ނަރުދަމާގެ މައްސަލަ ހަމަސް ދުވަހުގެ ތެރޭގައި ހައްލުކޮށްދޭނަށް: ތޯރިގް
13 އޯގަސްޓް 2014 14:59
ލ. ގަމުގައި އަލަށް އާބާދުވަމުންދާ ސަރަހައްދުގައި ނަރުދަމާއަށް ދިމާވެފައިވާ މައްސަލަ ކުރިއަށް އޮތް ހަ މަސް ދުވަސްތެރޭގައި ހައްލުކޮށްދޭނެކަމަށް މިނިސްޓަރ އޮފް އެންވަޔަރަންމަންޓް އެންޑް އެނާޖީ ތޯރިގު އިބްރާހީމް ވިދާޅުވެއްޖެ އެވެ.
މިނިސްޓަރ ތޯރިގު މިހެން ވިދާޅުވީ މިއަދު ކުރިއަށް ދިޔަ ރައްޔަތުންގެ މަޖިހީގެ ޖައްލާސާގައި ގަމުދާއިރާގެ މެންބަރ ފައްޔާޒް އިސްމާއިލް ކުރެއްވި ސުވާލްގެ ޖަވާބްގައިއެވެ. މެންބަރު ފައްޔާޒު ކުރެއްވި ސުވާލުގައި އަލިއަޅުވާލީ، ގަމުގެ އާބާދުވާ ސަރަހައްދުގެ ނަރުދަމާ ނިޒާމް ހަލާކުވެފައިވާތާ ގިނަ ދުވަސްތަކެއްވުމުގެ ސަބަބުން އެ މައްސަލަ ހައްލުކުރުމަށް ކުރެވެމުންދާ މަސައްކަތާއި ގުޅޭގޮތުންނެވެ.
މިކަމާ ގުޅޭގޮތުން މިނިސްޓަރ ތޯރިގް ވިދާޅުވީ އާބާދުވާ ސަރަހައްދުގެ ނަރުދަމާގެ މައްސަލަ ނިންމުމަށް މިހާރު ފެނަކަ ކޯޕަރޭޝަނާއި ހަވާލުކޮށްފައިވާކަމަށެވެ. އަދި އެމަސައްކަތް ނިންމުމަށް ހަމަޖައްސާފައި ވަނީ ފެނަކަ ކޯޕަރޭސަންނާއި ހަވާލްކުރެވުނު ތާރީހުން ފެށިގެން ހަމަސް ދުވަހުގެ ތެރެގައި ކަމަށްވެސް މިނިސްޓަރ ވިދާޅުވިއެވެ. ނަރުދަމާގެ ނިޒާމަށް ދިމާވެފައިވާ މައްސަލަތައް ހައްލުކޮށްދިނުމަށް ގަމު ކައުންސިލުން ކުރިންވެސް އެދިފައިވާކަން މިނިސްޓަރުގެ ވާހަކަފުޅުގައިވަނީ ވިދާޅުވެފައެވެ. އެގޮތުން މިހާރު އެމައްސަލައަށް ވަގުތީ ހައްލެއް ހޯދައިދެވިފައިވ ކަމަށްވެސް އޭނާ ވިދާޅުވިއެވެ.
"ފެނަކައާއި ގުޅިގެން މިހާރު ކުރެވެމުންދަނީ ދާއިމީ ހައްލެއް ހޯދުމުގެ މަސައްކަތް، އެގޮތުން އެކަމަށް ބޭނުންވާ ސާމާނު ހޯދުމުގެ މަސައްކަތް މިހާރު ފެށިފައިވާނީ،" ތޯރިގް ވިދާޅުވިއެވެ.
ގަމުގެ އާބާދުވާ ސަރަހައްދުގެ ނަރުދަމާގެ ޕަންޕު ސްޓޭޝަންތައް ފެއިލްވެ ނަޖިސް ފެން ރަށުތެރެއަށް ބޭރުވާތީ އެ އަވަށު ރައްޔަތުންވަނީ މިދިޔަ ބުރާސްފަތި ދުވަހު ފެނަކަ ކޯޕްރޭޝަން ކުރިމަތީގައި ވަނީ މުޒާހަރާކޮށްފައިވެސްވެއެވެ.
ކިޔުންތެރިންގެ ހިޔާލު