ފަޅުގޯތި ތަކުގެ މައްސަލަ ހައްލުކޮށް މުހުތާދު ވެރިންނަށް ގޯތި ލިބެންޖެހޭ- މޭޔަރ ސާދިގު

ރަށްރަށުގައި ހުރި ފަޅުގޯތި ތަކުގެ މައްސަލަތައް ހައްކުރުމަށް އަމަލީ މަސައްކަތް ކުރަންޖެހިފައިވާ ކަމަށް އައްޑޫސިޓީގެ މޭޔަރު ޢަބްދުﷲ ސާދިގު ވިދާޅުވެއްޖެއެވެ.

އޭނާ ވިދާޅުވީ މިމައްސަލަ ހައްލުވާނީ ބިމާބެހޭ ގާނޫނު ރަނގަޅަށް ތަންފީޒު ކުރެވިގެން ކަމަށެވެ. ގޯތި ދުކުރާތާ 5 އަހަރުވާއިރު އިމާރާތް ނުކުރެވޭ ކަމަށްވާނަމަ ގޯތި ވަކިކުރުމުގެ އިޚްތިޔާރު ނުވަތަ ބާރު ސަރުކާރަށް ލިބިގެންވާ ކަމަށް ގާނޫނުގައި ލިޔެފައިވެއެވެ. ނަމަވެސް މިކަމަށް އަމަލީ ސިފައެއް އެންމެ ފުރިހަމައަށް އައިސްފައި ނުވާ ކަމަށް ސާދިގު ވިދާޅުވިއެވެ.

އޭނާ ވިދާޅުވީ އައްޑޫ ސިޓީ ހިތަދުއަށް އެކަނި ބެލިކަމަށްވިޔަސް މީހުން ނޫޅޭ 4000 ވަރަކަށް ގެއާއި، ގޯތި އޮނާނެ ކަމަށް އަންތާޒާ ކުރެވޭ ކަމަށެވެ. ނަމަވެސް މިއީ މާބޮޑު މައްސަލައަކަށް ވެފައިނުވާ ކަމަށެވެ.

"ދެހާސް އެގާރަވަނަ އަހަރުން ފެށިގެން މިހާތަނަށް ތިންފަހަރެއްގެ މަތިން އަޅުގަނޑުމެންވާނީ އެފަދަ ގޯތި ވަކިކުރާނެ ކަމަށް އިޢުލާންވެސް ކޮށްފައި. ބައެއް ގޯތި ވަކިވެސް ކުރެވިފައިވާނެ. ގޯތި ވަކިކުރުމުން ބައެއްމައްސަލަ ކޯޓަށްވެސް ވައްދާފައިވޭ. ގޯތި ވަކިކުރުމުން ނުވަތަ ވަކިކުރާނެކަން އިޢުލާން ކުރުމުން ބައެއް މީހުންގެ ޝަކުވާ ހައުސިން މިނިސްޓްރީއަށް ހުށަހަޅައިގެން އެމިނިސްޓްރީން ބައްލަވަން ޖެހޭ ކަންކަން ބައްލަވަމުންދާތީ އެކަން އިތުރަށް ކުރިއަށް ނުދޭ. އެހެން ނަމަވެސް މިއީ ހައްލުވާން ޖެހޭ މައްސަލައެއް،" އޭނާ ވިދާޅުވިއެވެ.

ޢަބްދުﷲ ސާދިގު ވިދާޅުވީ ހިތަދޫގައި ފަޅުގެއާއި، ގޯތި އެހާ ގިނަވިޔަސް ގޯއްޗަށް އެދޭ މީހުންގެ އަދަދުވެސް އިތުރުވަމުން އަންނަކަމަށެވެ. އެއަދަދުވެސް މިހާރު 2000 އަށްވުރެ އިތުރުވާނެ ކަމަށް ވިދާޅުވިއެވެ.

"އެތައްހާސް ގެއާއި ފަޅުގޯތި އޮތްއިރު އެތަންތާގައި މީހުން ނޫޅޭ. އެތަންތަން ވަކިކުރެވޭނެ ގޮތެއް ނުވި. އިތުރަށް ގޯއްޗަށް އެދޭ މީހުންގެ އަދަދު އެހާގިނަ. އެހެން ކަމުން ގާނޫނާ އެއްގޮތަށް އަމަލުކޮށް ފަޅުގޯތިތައް އޭގެ ވެރިންގެ ކިބައިން ވަކިކޮށް ގޯއްޗަށް ބޭނުންވެގެން އެދިފައިވާ މުހުތާދު ވެރިންނަށް ލިބޭނެ ގޮތެއް އޮންނަން އެބަޖެހޭ. އެހެން ނޫނީ އިޖުތިމާއީ މައްސަލަތައް އުފެދުމުގެ ފުރުސަތުވެސް އޮވެދާނެ،" އޭނާ ވިދާޅުވިއެވެ.

އޭނާ ވިދާޅުވީ ގޯތި ދޫކުރާތާ ފަސްއަހަރު ތެރޭގައި އިމާރާތް ނުކުރެވެންވީ ސަބަބެއް މިހާރުނެތް ކަމަށެވެ. އެއީ ސަރުކާރާއި، ބޭންކުތަކުން މިހާރު އެދަނީ "ހައުސިން ފައިނޭންސް ލޯންތައް ދެމުން. އެހެން ކަމަށްވާނަމަ އެފަދަ ލޯނެއް ނަގައިގެންވެސް އިމާރާތް ކުރުމުގެ ފުރުސަތު އެބައޮތް. އެފަދަ ފުރުސަތު ނެތްއިރު ފައިސާ ނުލިބިގެން އިމާރާތް ނުކުރެވިދާނެ. ނަމަވެސް އެހުރަސް މިހާރަކުނެތް،" އޭނާ ވިދާޅުވިއެވެ.

އޭނާ ވިދާޅުވީ އައްޑޫސިޓީގެ އާބާދީއަކީ ބައްތިރީސް ހާސް ކަމަށެވެ. އެހެން ކަމުން އެތައްހާސް ބައެއް ގޯތި ބޭނުންވެގެން އަލަށް ކައުންސިލްތަކަށް ހުށަހަޅާ ކަމަށެވެ. އެހެން ކަމުން އާބާދީއަށް ބެލިކަމަށްވިޔަސް މިކަންކަން ހައްލުކުރުމަށް ސަރުކާރުންވެސް ފިޔަވަޅުތަކެއް އަޅަންޖެހޭ ކަމަށެވެ. އެގޮތުން ދަނޑުވެރިކަމާއި، ވިޔަފާރިއާއި އެހެނިހެން ސިނާއީ ކަންކަމަށް ބޭނުންވާ ބިން ސަރުކާރުން ކަނޑައެޅުމަކީ މުހިންމު ކަމެއް ކަމަށެވެ.

"ދެން ރައްޔިތުން ދިރިއުޅެން ފްލެޓް އަޅައިދޭންވީ. އޭގެ ތެރޭގައި ވިއްކާ ފްލެޓްވެސް ހަދަންވީ. ދިގުމުއްދަތެއްގައި ފައިސާ ދައްކައުިގެން މިލްކްވާ ގޮތަށްވެސް ދޭންވީ،" އޭނާ ވިދާޅުވިއެވެ.