އާދަމް ޒާހިރު ނޫން ހުރިހާ ބޭފުޅުންނަށް ރުހުން ދީފީ

ޕޮލިސް އިންޓަރގްރިޓީ ކޮމިޝަން (ޕީއައިސީ) ގެ މެމްބަރުކަމަށް ރައީސުލް ޖުމްހޫރިއްޔާ އަބްދުﷲ ޔާމިން ހުށަހެޅުއްވި ނަންފުޅުތަކުގެ ތެރެއިން މ. ކުރޮޅި، އާދަމް ޒާހިރުގެ ފިޔަވައި އެހެން ހުރިހާ ބޭފުޅުންނަށް ރައްޔިތުންގެ މަޖިލީހުން ރުހުން ދީފިއެވެ.

މަޖިލީހުން މިއަދު ރުހުން ދީފައިވަނީ ފާތިމަތު ސަރީރާ އަލީ ޝަރީފް, މުހައްމަދު ފަރުހާދު، އަލީ ނަދީމަށެވެ.

ނަދީމްގެ ނަން ފާސްވީ ވޯޓުގައި ބައިވެރިވި 73 މެމްބަރުންގެ އިއްތިފާގުންނެވެ. މުހައްމަދު ފަރުހާދުގެ ނަން ފާސްވީ ހާޒިރުވެ ތިއްބެވި 75 މެމްބަރުންގެ ތެރެއިން 56 މެމްބަރުންގެ ވޯޓުންނެވެ. އޭނާގެ ނަން ފާސްކުރަން ނުފެންނަ ކަމަށް 18 މެމްބަރުން ވޯޓު ދެއްވި އެވެ. ފާޠިމަތު ސަރީރާ ޢަލީ ޝަރީފްގެ އައްޔަނުކުރައްވަން ފެނިވަޑައިގަންނަވާކަމަށް ފާސްކުރައްވާފައިވަނީ 73 މެންބަރުންގެ އިއްތިފާޤުންނެވެ.

ރުހުން ދިނުމަށް މަޖިލީހުން ދެކޮޅު ހަދާފައިވަނީ އާދަމް ޒާހިރަށެވެ. އޭނާ ޕީއައިސީ އަށް އައްޔަންކުރަން ފެނޭތޯ ބެލުމަށް ވޯޓަށް އެހުމުން، ހާޒިރުވެ ތިއްބެވި 75 މެމްބަރުންގެ ތެރެއިން އޭނާ އަށް ތާއީދުކުރެއްވީ އެންމެ ފަސް މެމްބަރުންނެވެ. އޭނާ އެ ކޮމިޝަނަށް އައްޔަންކުރަން ނުފެންނަ ކަމަށް 61 މެމްބަރަކު ވޯޓު ދެއްވި އެވެ.