ޣައްޒާ ފަންޑަށް އެމްއެންޑީއެފް އިން އެއްމިލިއަން ރުފިޔާ ހަދިޔާ ކޮށްފި

ޣައްޒާގެ ހާލުގައި ޖެހިފައިވާ މުސްލިމް އަޚުންނަށް އެހީވުމުގެ ގޮތުން ދިވެހި މީޑިޔާއިން ކުރިއަށް ގެންދާ "ހެލްޕް ޣައްޒާ" ޓެލަތޯންނަށް އެމްއެންޑީއެފް އިން އެއްމިލިއަން ރުފިޔާ ހަދިޔާ ކޮށްފިއެވެ.

މިއީ މިހާތަނަށް ޓެލެތޯނަށް އެއް ފަރާތަކުން އެންމެ ގިނައިން ލިބުނު ފައިސާގެ އަދަދެވެ.

މިފައިސާ އެފަންޑާ ހަވާލު ކޮށްދެއްވީ އެމްއެންޑީއެފްގެ ޗީފްއޮފް ސްޓާފް މޭޖަރޖެނެރަލް އަޙުމަދު ޝިޔާމެވެ. މިފައިސާއާ ޙަވާލުވީ ޓެލެތޯން ސްޓިއަރިން ކޮމެޓީގެ ޗެއާމަން އިބްރާހީމް އުމަރު މަނިކެވެ. އުމަރު މަނިކުވަނީ މިފަދަ އެހީއެއް ވެދެއްވީތީ އެމްއެންޑީއެފްއަށް ޝުކުރު އަދާ ކުރައްވައިފައެވެ. މިއީ ދިވެހިން ހިންގާ މިފަދަ ކަންކަމުގައި ސިފައިން ދެއްވާ ސަމާލުކަން ހާމަވެގެންދާ ކަމެއް ކަމަށްވެސް އިބްރާހީމް މަނިކު ވިދާޅުވިއެވެ.

ރާއްޖޭގެ ޖަމިއެްޔާ ޖަމާއަތްތަކުންނާއި އަމިއްލަފަރުދުންގެ ފަރާތުން ބޮޑު އެހީތެރިކަމެއް މިފަންޑަށް މިބެމުން އަންނަ ކަމަށްވެސް އިބްރާހީމްމަނިކު ވިދާޅުވިއެވެ.

ހުކުރު ދުވަހުގެ 14:30އިން ފެށި ޓެލެތޯން ނިންމުމަށް މިހާރު ހަމަޖައްސާފައިވަނީ މިރޭ ދަންވަރު 3.00 ގައެވެ. މިވަގުތު ކުރާނެ މަސައްކަތަކީ އެކި ފަރާތްތަކުން ދެމުންގެންދާ ފައިސާއާ ހަވާލުވުން ކަމަށްވެސް އިންތިޒާމްކުރާ ފަރާތުންވަނީ ހާމަކުރައްވާފައެވެ. މިހާތަނަށްވަނީ މިފަންޑަށް 16 މިލިއަން ރުފިޔާއަށްވުރެ ގިނައިން ލިބިފައެވެ. އޭގެ ތެރޭގައި އަދާލަތުޕާޓީން ހުޅުވާފައިވާ ފަންޑަށް ލިބިފައިވާ 6.3 މިލިއަން ރުފިޔާ ހިމެނެއެވެ. އިޒުރޭލުން ފަލަސްތީނުގައި ހިންގަމުން ގެންދާ ޖަރީމާތަކުގެ ސަބަބުން ހާލުގައި ޖެހިފައިވާ ފަރާތްތަކަށް އެހީތެރިވުމަށް ދިވެހީން ކުރަމުން ގެންދާ މަސައްކަތްތަކަށް ފަލަސްތީނުން ރާއްޖެއާއި ސްރީލަންކާއަށް ކަނޑައަޅުއްވާފައިވާ ސަފީރު ޑރ. އަންވަރު އަލް އާޣާ ވަނީ ޝުކުރު އަދާކުރައްވާފައެވެ.