ޣައްޒާ ފަންޑަށް 12 މިލިއަނަށްވުރެ ގިނަ ރުފިޔާ ހަދިޔާކޮށްފި

އިއްޔެ މެމްންދުރު 2:30 އިން ފަށައިގެން ދިވެހި މީޑިއާތަކުން އިސްނަގައިގެން ފަލަސްތީނަށް އެހީވުމަށް ކުރިއަށް ގެންދާ ޓެލެތޯންއަށް މިހާތަނަށް 12 މިލިއަނަށްވުރެ ގިނަ ރުފިޔާ ހަދިޔާކޮށްފައިވާކަމަށް އެ ފަންޑުގެ ކަންކަން ބަލަހައްޓާ ހެލްޕް ގާޒާ ޓެލެތޯން ސްޓެއަރިން ކޮމެޓީން ހާމަކޮށްފިއެވެ.

އެ ކޮމެޓީން މިއަދު ހަވީރުބުނީ ފަންޑަށް ޖަމާކޮށްފައިވާ ފައިސާގެ ތެރެއިން މިހާތަނަށް ގުނިފައިވަނީ 12,459,251.62 ރުފިޔާ ކަމަށެވެ. އަދި ޓެލެތޯން ނިމޭއިރު މި އަދަދު އެތައް ގުނައަކަށް އިތުރުވާނެކަމަށް ވެސް އެ ކޮމެޓީން ލަފާކުރެއެވެ. 

"ހެލްޕް ޣައްޒާ" ޓެލެތޯންގެ ފަންޑު ފަށާފައިވަނީ ވެސް އަދާލަތު ޕާޓީން އިސްނަގައިގެން ބެހެއްޓި ފަނޑު ފޮށީގެ ހަ މިލިއަން ރުފިޔާއާ އެކުއެވެ. 

ޓެލެތޯން ކުރިއަށް ގެންދިއުމަށް ނިންމާފައިވަނީ 33 ގަޑިއިރާއި 30 މިނިޓަށެވެ. ފަންޑަށް އެހީތެރިވުމުގެ ގޮތުން ބޭންކް އޮފް މޯލްޑިވްސް (ބީއެމްއެލް) ގެ މޭޒެއް ޓީވީއެއްގައި ވަނީ ބަހައްޓައިފައެވެ. އަދި ބީއެމްއެލްގެ ޕީއޯއެސް މެޝިންތައް މެދުވެރިކޮށް ވަގުތުން ކާޑުން ފައިސާ ދެއްކޭ ގޮތަށް ވަނީ ހަމަޖައްސާފައެވެ. މީގެއިތުރުން "ހެލްޕު ޣައްޒާ" ފަންޑަށް ޗެކުން ފައިސާ ޖަމާކުރެވޭނެ ގޮތް ވެސް ބީއެމްއެލުން ޓީވީއެމްގައި ބަހައްޓާފައިވާ މޭޒުގައި ވަނީ ހަމަޖައްސާފައެވެ. އަދިރާއްޖޭގެ އެކި ކަންކޮޅުތަކުގައިވެސް ވަނީ ފަންޑުފޮށިތައް ބަހައްޓައިފައެވެ. 

 ދިވެހި މީޑީއާއިން މިކަމުގައި އިސްނެގީ، މީޑީއާގެ ވަސީލަތްތައް ބޭނުންކޮށްގެން ވީހާވެސް ގިނަ ބަޔަކަަށް އިސްރާއީލުގެ އަނިޔާވެރި ލާއިންސާނީ އަމަލުތައް އަންގައިދީ އަދި މެދުވެރިއެއްގެ ބައި އަދާކުރުމަށް މަސައްކަތް ކުރެވިދާނެ އެއްފަރާތަކީ މީޑިއާ ކަމަށް ގަބޫލު ކުރެވޭތީ ކަމަށް "ހެލްޕް ޣައްޒާ" ޓެލެތޯން އިންތިޒާމްކުރާ ފަރާތްތަކުން ބުނެފައިވެއެވެ.

"ހެލްޕްޣައްޒާ"ގެ ނަމުގައި ކުރިއަށް ގެންދާ މި ޓެލެތޯންގެ ހޭޝް ޓެގެއްގެ ގޮތުގައި ބޭނުން ކުރާނީ، HelpGazaMv# އެވެ. އަދި ޓެގްލައިނެއްގެ ގޮތުގައި ބޭނުންކުރާނީ "މަވެސް އެހީވާނަން"އެވެ.