އެމްވީކޭން މާލެ ސިޓީ ބަހުގެ ހިދުމަތް ޓްރާންސްޕޯޓް އޮތޯރިޓީން ގެންގުޅޭ މިންގަނޑުތަކަކަށް ނުފެތޭ: ޗެއަރމަން
9 އޯގަސްޓް 2014 12:57
މާލޭ ސިޓީގައި ބަހުގެ ހިދުމަތް ދެމުން އަންނަ އެމްވީކޭއިން އެ ހިދުމަތް ދެމުން އަންނަ އުސޫލުތައް ޓްރާންސްޕޯޓް އޮތޯރިޓީން ގެންގުޅޭ މިންގަނޑުތަކަށް ނުފެތޭކަމަށް އެ އޮތޯރިޓީގެ ޗެއަރމަން އަބްދުއްރަޝީދު ނާފިޒް ވިދާޅުވެއްޖެއެވެ.
"ޓީވީއެމަށް" ދެއްވި ބަސްދީގަތުމެއްގައި ނާފިޒު ވިދާޅުވީ އެމްވީކޭގެ މިންގަނޑުތައް ޓްރާންޕޯޓު އޮތޯރިޓީގެ މިންގަނޑުތަކަށް ނުފެތުމުގެ ސަބަބުން އާންމުންގެ މެދުގައި ބަހުގެ ނިޒާމާމެދު އިތުބާރު ގެއްލިފައިވަކަމަށެވެ. ބަހުގެ ހިދުމަތް ދިނުމަށް އެމްވީކެން ބޭނުންކުރާ ބަސްތައް ދުއްވުމަށް ބިދޭސީ ޑްރައިވަރުން ބޭނުންކުރާ މައްސަލައާއި، ދުއްވަން ޖެހޭ މިންވަރަށް ވުރެ ބާރަށް ބަސްތައް ދުއްވާ މައްސަލަށްވެސް ފާހަގަ ކުރެވިފައިވާކަމަށް އޭނާ ވިދާޅުވިއެވެ. އަދި އެ މައްސަލަތައް ސިޓީ ކައުންސިލަށް އަންގާފައިވާނޭކަމަށް ވެސް އޭނާ ވިދާޅުވިއެވެ.
"ސަރުކާރުގެ ޕަބްލިކް ޓްރަންސްޕޯޓު ނިޒާމް ހަރުދަނާ ކުރުމަކީ ސަރުކާރުގެ ވަރަށްބޮޑު އަމާޒެއް. ބަހުގެ ހިދުމަތުގެ އިތުރުން ޓެކްސީގެ ހިދުމަށް ފުޅާކުރުމަށް ވެސް ގިނަ މަސައްކަތްތަކެއް ސަރުކާރުން އަންނަނީ ކުރަމުން. ޕަބްލިކް ޓްރާންސް ޕޯޓު ނިޒާމާމެދު ރައްޔިތުންގެ އިތުބާރު ދެމެހެއްޓުމަށްވެސް ގިނަ މަސައްކަތްތަކެއް ކުރަމުން މިއަންނަނީ،" ނާފިޒް ވިދާޅުވިއެވެ.
މާލެއަށް ބަހުގެ ޚިދުމަތް ދިނުމަށް އެމްވީކޭއައި އެކު ވެފައިވާ އެއްބަސްވުން އުވާލުމަށް އަދި ނުނިންމާކަމަށް މާލޭ ސިޓީގެ މޭޔަރު މުހައްމަދު ޝިހާބު ވަނީ ވިދާޅުވެފައެވެ. މިދިޔަ ހަފްތާގައި ބޭއްވި ނޫސްވެރިންގެ ބައްދަލުވުމެއްގައި މޭޔަރު ވިދާޅުވީ އެމްވީކޭއަތުން އެމަސައްކަތް ވަކިކުރުމުގެ ބަދަލުގައި މާލޭ ސިޓީކައުންސިލުން މަސައްކަތް ކުރަނީ އެކުންފުންޏާ އެކު ކުރެވިފައިވާ އެގްރީމެންޓާ އެއްގޮތަށް ކަންތައްތައް ކުރެވޭތޯ މަސައްކަތް ކުރުން ކަމަށެވެ.
ކިޔުންތެރިންގެ ހިޔާލު