ކުޑަކުއްޖަކާއެކު ބަދުއަޚުލާޤީ އަމަލު ހިންގި މީހަކު ހައްޔަރުކޮށްފި

ކުޑަކުއްޖަކާއެކު ގަދަކަމުން ބަދުއަޚުލާޤީ އަމަލު ހިންގި ކަމުގެ ތުހުމަތުގައި މީހަކު ހައްޔަރުކޮށްފި ކަމަށް ފުލުހުން ހާމަކުރައްވައިފިއެވެ.

އުމުރުން 29 އަހަރުގެ އެމީހާ ހައްޔަރުކޮށްފައިވަނީ ގދ.ތިނަދޫއިން ކަމަށްވެސް ފުލުހުން ހާމަކުރައްވާފައިވެއެވެ.

އާންމު ފަރާތަކުން ލިބުނު މައުލޫމާތަކާ ގުޅިގެން ކޯޓު އަމުރުގެ ދަށުން އޭނާ ހައްޔަރު ކޮށްފައިވަނީ މިމަހުގެ 7 ވަނަ ދުވަހު ރޭގެ ވަގުތެއްގައެވެ.މިހާތަނަށް ބެލި ބެލުމުން އޭނާ މިކުއްޖާއާއި މެދު ތަކުރާރުކޮށް ބަދުއަޚުލާޤީ އަމަލު ހިންގަމުން ދިޔަ ކަމަށް ބެލެވޭ ކަމަށް ފުލުހުންވަނީ ހާމަކުރައްވާފައެވެ.

މިމައްސަލާގައި ފުލުހުންގެ ބެލުމުގެ ދަށަށް ގެނައި މީހާއަކީ ތަފާތު މައްސަލަތަކުގައި ފުލުހުންގެ ބެލުމުގެ ދަށަށް ގެނެސްފައިވާ މީހެއް ކަމަށްވެސް ފުލުހުން ހާމަކުރައްވާފައިވެއެވެ.