އުނގޫފާރާއި މަނަދޫ ބަނދަރު ރަސްމީކޮށް ހުޅުވައިދެއްވައިފި

ފަރަންސޭސި ވިލާތުގެ ލޯނުއެހީގެ ދަށުން މަރާމާތު ކުރެވުނު ރ. އުނގޫފާރު ބަނދަރާއި ނ. މަނަދޫ ބަނދަރު ރަސްމީކޮށް ހުޅުވައިފިއެވެ.

ދެ ރަށުގެ ބަނދަރު އިއްޔެ ހުޅުއްވައިދެއްވީ ފަރަންސޭސިވިލާތުން ސްރީލަންކާއާއި ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު މިސްޓަރ ޖޯން ޕޯލް މޮންޗައު އެވެ.

އުނގޫފާރު ބަނަދަރަކީ ދިގުމިނުގައި 750 ފޫޓް އަދި ފުޅާމިނުގައި 350 ފޫޓް ހުންނަ ބަނދަރެކެވެ. މި ބަނދަރު ނިންމުމަށް 41.6 މިލިއަން ރުފިޔާ ހަރަދުވެފައިވާކަމަށް ހައުސިން މިނިސްޓްރީންބުނެއެވެ. މަނަދޫ ބަނދަރަކީ 1200 ފޫޓް ދިގު 350 ފޫޓް ފުޅާ ބަނދަރެކެވެ. ބަނަދަރުގެ މަސައްކަތަށް 60.1 މިލިއަން ރުފިޔާ ހަރަދުވެފައިވާކަމަށް ވެސް ހައުސިން މިނިސްޓްރީން ހާމަކުރައްވާފައިވެއެވެ. މި ދެ ބަދަނރަކީ 2004 ވަނަ އަހަރު ސުނާމީގައި ހަލާކުވެފައިވާ ދެ ބަނދަރެވެ. ދެ ބަނދަރު އަލުން ހެދުމަށް ފަރަންސޭސި ސަރުކާރުން އެއްބަސްވެފައިވަނީ 2011 ވަނަ އަހަރުއެވެ.