މަޑުއްވަރީ ގިރާ ސަރަހައްދު ހިމާތަޔް ކުރުމުގެ މަސައްކަތް ދެ ހަފްތާ ތެރޭގައި ފެށޭނެ: ކައުންސިލް
8 އޯގަސްޓް 2014 16:18
ރ. މަޑުއްވަރީ ގިރާ ސަރަޙައްދު ހިމާޔަތް ކުރުމުގެ މަޝްރޫޢު މިނިސްޓަރ އޮފް އެންވަޔަރަންމަންޓް އެންޑް އެނަރޖީ، ޠާރިޤު އިބްރާހިމް އިފްތިތާޙް ކޮށްދެއްވަނީ
މާޅޮސްމަޑުލު އުތުރުބުރީ މަޑުއްވަރީ ގިރާ ސަރަޙައްދު ހިމާޔަތް ކުރުމުގެ މަޝްރޫއު ދެ ހަފްތާ ތެރެގައި ފަށައިގަނެވޭނެ ކަމަށް މަޑުއްވަރީ ކައުންސިލްގެ ނައިބު ރައީސް އިބްރާހިމް .ތަލްސީމް ވިދާޅުވެއްޖެއެވެ
ސަރުކާރުން އިއްޔެ ވަނީ މަޑުއްވަރީ ގޮނޑުދޮށް ހިމާޔަތް ކުރުމުގެ މަޝްރަޫއެއް ފަށައިފައެވެ. ރ. މަޑުއްވަރީގައި އޮތް ރަސްމިއްޔާތެއްގައި މި މަޝްރޫޢު އިފްތިތާހު ކޮށްދެއްވީ މިނިސްޓަރ އޮފް އެންވަޔަރަންމަންޓް އެންޑް އެނަރޖީ ޠާރިޤް އިބްރާހީމެވެ.
މި ޕްރޮޖެކްޓުގެ ދަށުން އެރަށު ހޭޅި ފަރާތުގެ ގޮނޑުދޮށުގައި 15 ފޫޓަށް ބޮޑުހިލަ ޖަހާނެކަމަށް އެރަށު ކައުންސިލްގެ ނައިބު ރައީސް ވިދާޅުވިއެވެ. ބޮޑު ހިލަޖެހުމުގެ މަސައްކަތް ކުރުމަށް ބޭނުންވާ ވެހިކަލްތައް ގެނެސްފައިވާ ކަމަށްވެސް އޭނާ ވިދާޅުވިއެވެ. ކުރިއަށް އޮތް ދެ ހަފްތާ ތެރޭގައި މަސައްކަތްތައް ފެށޭނެކަމަށް އޭނާވިދާޅުވިއެވެ.
"މީގެ ކުރިން ވެސް ތިން ފަހަރެއްގެ މަތިން ރަށުގެ ގޮނޑުދޮށް ހިމާޔަތްކުރުމަށް ވަނީ މަސައްކަތްކޮށްފައި. އެހެން ނަމަވެސް އަމަލީ މަސައްކަތް ފެށިފައެއް ނުވޭ. މިފަހަރު މަސައްކަތްތައް ފެށޭނެކަމަށް ކައުންސިލުން އުންމީދުކުރޭ،" ތަސްލީމް ވިދާޅުވިއެވެ.
މަޝްރޫއު ކުރިއަށް ގެންދަނީ އެމްޓީސީސީއާ ހަވާލުކޮށްގެންނެވެ. މިމަސައްކަތް އެކުންފުންޏާ ހަވާލުކޮށްފައިވަނީ 33 މިލިއަން ރުފިޔާ އަށެވެ. މަޝްރޫއުގެ ދަށުން މަޑުއްވަރީގެ 890 މީޓަރުގެ ގޮނޑުދޮށް ހިމާޔަތް ކުރެވޭނެ ކަމަށް އެންވަޔަރަންމަންޓް މިނިސްޓްރީން ހާމަކުރެއެވެ.
ކިޔުންތެރިންގެ ހިޔާލު