ޖަރުމަނުގެ ބޯޓުން ރާއްޖޭގައި ތެލާގުޅޭ ސާވޭއެއް ނުކުރާނެ: ރައީސް ނަޝީދު
8 އޯގަސްޓް 2014 15:13
ޖަރުމަނުވިލާތު ސާވޭ ބޯޓް "ސޮންނޭ'
ފަންސަވީސް ސައިންސު ވެރިންނާއި އެކު މިހާރު ރާއްޖެއައިސް އޮތް ޖަރުމަނުވިލާތު ސާވޭ ބޯޓް "ސޮންނޭ' އައިސް އުޅެނީ ތެލާއި ގުޅޭ ސާވޭއެއް ކުރުމަށް ނޫންކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ ޖަރުމަނުގެ އެމްބެސެޑަރާއި ހަވާލައިދެއްވައި އިއްޔެ އެމަނިކުވާނު ކުރެއްވެވި ޓްވީޓެއްގައިއެވެ. އެ ޓްވީޓުގައި ވިދާޅުވެފައިވަނީ ރައްޔިތުންނަށް އޮޅުވާލުމަކީ ރައްޔިތުންނަށް ދެވޭ ނިކަމެތިކަމެއްކަމަށެވެ.
ރައީސް ނަޝީދު މިހެން ވިދާޅުވިނަމަވެސް ސަރުކާރުން ބުނެފައިވަނީ ރާއްޖެއިން ތެޔޮ ފެނޭތޯ އެ ބޯޓުން ބަލާނެކަމަށެވެ. އެނގިފައިވާގޮތުން އެ ބޯޓް ރާއްޖެ އައިސްފައިވަނީ ތަފާތު ގިނަގުނަ ދިރާސާތަކެއް ރާއްޖޭގެ ކަނޑުގެ ސަރަޙައްދުގައި ކުރުމަށެވެ. އަދި މި ބޯޓްގެ ސައިންސްވެރިން އެމީހުންގެ މަސައްކަތްތައް މާދަމާ ފަށާނެކަމަށްވެސް މަޢުލޫމާތު ލިބެއެވެ.
ބޯޓުން ކުރާ ދިރާސާއިން ލިބޭ މަޢުލޫމާތު 2015 ވަނަ އަހަރުގެ ފުރަތަމަ ތިންމަސް ދުވަހުގެ ތެރޭގައި ރާއްޖެއާއި ހިއްސާކުރާނެކަމަށް ސަރުކާރުން ވަނީ ބުނެފައިއެވެ. އަދި އެ މަޢުލޫމާތު އިތުރު ތިންވަނަ ފަރާތަކާއި ހިއްސާ ނުކުރާނެކަމަށްވެސް ސަރުކާރުން ވަނީ ބުނެފައިވެއެވެ.
ބޯޓްގެ ދަތުރުގައި ރާއްޖޭގެ އެކްސްޕާޓަކާއި ދިވެހި ސިފައިންނާއިގެ ބޭފުޅެއްވެސް ބައިވެރިވެލެއްވުމަށް ވެސް ހަމަޖެހިފައިވެއެވެ. އަދި ބޯޓުން ތެޔޮ ފެނޭތޯ ބެލުމަށް ހަމަޖެހިފައިވަނީ ލ. އަތޮޅާއި ތ. އަތޮޅާއި ދެމެދުން އިރަށް 100 މޭލު ބޭރުން ކަމަށްވެސް ސަރުކާރުން ބުނެއެވެ.
ކިޔުންތެރިންގެ ހިޔާލު