އެބޯލާ ބަލި ރާއްޖެއަށް އައުމުގެ ފުރުސަތު ކުޑަ- ހެލްތު

ހުޅަނގު އެފްރިކާގެ ބައެއް ގައުމުތަކުގައި ފެތުރެމުންދާ އެބޯލާ ބަލި ރާއްޖެއަށް އައުމުގެ ފުރުސަތު ކުޑަކަމަށް ހެލްތު މިނިސްޓްރީން ހާމަކުރައްވައިފިއެވެ.

އެމިނިސްޓްރީން މިކަން ހާމަ ކުރައްވާފައިވަނީ "އެބޯލާ ވައިރަސް" އާ ގުޅިގެން ދިވެހިރާއްޖެއަށް އެބަލީގެ ނުރައްކާތެރިކަން އޮތް މިންވަރު އަންދާޒާކޮށް، ދިމާވެދާނެ ޞިއްޙީ ނުރައްކަލަކުން ދިވެހި ރައްޔިތުން ރައްކައުތެރި ކުރުމަށްޓަކައި އަޅާނެ ފިޔަވަޅުތަކާ ބެހޭގޮތުން ކަމާ ބެހޭ މާހިރުުންނާ މަޝްވަރާ ކުރެއްވުމަށްފަހުގައެވެ.

ރާއްޖެއަށް މިބަލި އައުމުގެ ފުރުސަތު ކުޑަކަމަށް ނިންމަވާފައިވަނީ ބަލި ފެތުރޭ ސަރަޙައްދާއި، ފެތުރެމުން އަންނަ މިންވަރަށް ރިއާޔަތް ކުރެއްވުމަށްފަހު ކަމަށްވެސް ހެލްތު މިނިސްޓްރީން ހާމަކުރައްވާފައިވެއެވެ.

މިބަލި ރާއްޖެ އެތެރެވިޔަ ނުދިނުމަށް ކުރެވެން ހުރި ކަންކަމާއި، ބަލި ފެނިއްޖެނަމަ އަމަލުކުރާނެ އުސޫލުތަކާ ބެހޭ ގޮތުންވެސް މިމަޝްވަރާ ބައްދަލުވުމުގައިވަނީ ވާހަކަ ދައްކަވާފައެވެ. އަދި ބަލި ކޮންޓްރޯލް ކުރުމަށާއި ބަލި ޖެހިފައިވާ މީހުންނަށް ފަރުވާ ދިނުމަށްޓަކައި ބޭނުންވާނެ މުހިއްމު އާލާތްތަކާއި ވަސީލަތްތައް ހޯދާނެ ގޮތާ ބެހޭގޮތުންވެސް މަޝްވަރާ ކުރައްވާފައިވެއެވެ. މީގެ އިތުރަށް ދުރާލައި ވާންޖެހޭ ތައްޔާރީތައް ވުމަށްޓަކައި ކުރަންޖެހޭ ކަންތައްތަކާއި، މުހިއްމު މަސައްކަތްތަކާ ބެހޭގޮތުން ވެސް މި ބައްދަލުވުމުގައި ފަންނީ ލަފާ ހޯއްދެވި ކަމަށް ހެލްތު މިނިސްޓްރީން ހާމަކުރައްވާފައިވެއެވެ.

މިދިޔަ ބުދަދުވަހު ބޭއްވި މި މަޝްވަރާ ބައްދަލުވުމުގައި މިނިސްޓަރ އޮފް ހެލްތު ޑރ. މަރިޔަމް ޝަކީލާ ބައިވެރިވެ ވަޑައިގެންނެވިއެވެ. އެކަމަނާގެ އިތުރަށް ތަޖްރިބާކާރު ޑަކްޓަރުންގެ ޓެކްނިކަލް ޓީމަކާއި، ހެލްތު ޕްރޮޓެކްޝަން އެޖެންސީގެ ކަމާބެހޭ އިސް މުވައްޒަފުންވެސް ބައިވެރިވެ ވަޑައިގެންނެވިއެވެ. އަދި ރާއްޖޭގައި ހުންނަ ޑަބް.ލިޔު.އެޗް.އޯ އޮފީހުގެ ކަމާބެހޭ ބޭފުޅުންވެސް ބައިވެރިވެ ވަޑައިގެންނެވި ކަމަށް ހެލްތު މިނިސްޓްރީން ވަނީ ހާމަ ކުރައްވާފައެވެ.

މިބަލި ފެތުރެމުންދަނީ ހުޅަނގު އެފްރީކާގެ ޤައުމުތައް ކަމުގައިވާ ގިނީއާއި، ސިއެރަލިއޯނާއި، ނައިޖީރިއާއި، ލައިބީރިއާ ގައެވެ.

މިމަހުގެ 6 ވަނަ ދުވަހާ ހަމައަށް 1711 މީހުންނަށް ވަނި މިބަލި ޖެހިފައެވެ. އޭގެ ތެރެއިން 932 މީހުން ވަނީ މަރުވެފައެވެ. މިއީ 1976 ވަނަ އަހަރުގެ ފަހުގެ ތާރީޚެއްގައި އެންމެ ގިނަ އެބޯލާ ބަލީގެ މީހުން ފެނުނު ފަހަރު ކަމަށްވެސް ހެލްތު މިނިސްޓްރީން ވަނީ ހާމަކުރައްވާއެވެ.