ކާމީނީ ހުޅަނގު ގެއިން ފުލުހުން އަތުލައިގަތް ބަނގުރާގެ މަގުމަތީ އަގު ބައްތިރީސް ހާހަށް އަރާ: ފުލުހުން

ކާމީނީ ހުޅަނގު ގެއިން ފުލުހުން އިއްޔެ އިރުއޮއްސުނުއިރު އަތުލައިގެންފައިވާ ބަނގުރާގެ މަގުމަތީ އަގު 32000 ރުފިޔާއަށް އަރާ ކަމަށް ފުލުހުން މިއަދު ހާމަކުރައްވައިފިއެވެ.

ފުލުހުންނަށް ލިބުނު މައުލޫމާތަކާ ގުޅިގެ ފުލުހުން އެގެއަށް ވަދެފައިވަނީ އިއްޔެ ހަވީރު 6.00 އެހައިކަންހާ އިރުއެވެ. ކޯޓު އަމުރެއްގެ ދަށުން އެގެއަށް ވަދެ ފާސްކުރުމުން މަސްތުވާތަކެތި ކަމަށް ޝައްކުކުރެވޭ އެއްޗެއްހުރި ދެ ރަބަރު ޕެކެޓް ފެނިފައިވެއެވެ.

އޭގެ އިތުރަށް ބަނގުރާ އަޅާފައިހުރި 20 ލީޓަރުގެ 19 ހަމާއި 5 ލީޓަރުގެ ފުޅިއަކާއި، 500 އެމްއެލްގެ 14 ފުޅި ފެނިފައިވާ ކަމަށް ފުލުހުން ހާމަކުރައްވާފައި ވެއެވެ.

މި އޮޕަރޭޝަނުގައި ފުލުހުންގެ ބެލުމުގެ ދަށަށް ގެނެސްފައިވަނީ 50 އަހަރު ފިރިހެނަކާއި 46 އަހަރުގެ ފިރިހެނެކެވެ. 50 އަހަރުގެ މީހާއަކީ ސްރީލަންކާ ރައްޔިތެކެވެ. 46 އަހަރުގެ މީހާއަކީ ދިވެއްސެއް ކަމަށް ފުލުހުން މިއަދުވަނީ ހާމަކުރައްވާފައެވެ.

މިމައްސަލަ ފުލުހުން ގެންދަވަނީ ތަހުގީގު ކުރައްވަމުންނެވެ.

ދުވަސް ނޫހުގައި ރޭ މިޚަބަރު ލިޔުނުއިރު މިކަމާ ގުޅިގެން ހައްޔަރު ކޮށްފައިވަނީ ދެ ބިދޭސީން ކަމަށް ލިޔެފައިވަނީ އެވަގުތު ލިބިފައިވާ މައުލޫމާތަށް ބިނާ ކޮށެވެ.