މާލޭގެ ބައެއް ސަރަހައްދުތައް އޮތީ "ގުރޫޕުތަކެއްގެ" ބާރު ދަށުގައި: ފުލުހުން
6 އޯގަސްޓް 2014 15:23
މާލޭގައި ފުލުހުން އޮޕަރޭޝަނެއް ހިންގަނީ: ފޮޓޯ ޕޮލިސް މީޑިއާ
ފުލުހުން ބުނީ މާލޭގެ ބައެއް ސަރަހައްދުތަކުގައި އަޅާފައިވާ ހަޓުތަކާއި، ކުޅިވަރު ކުޅޭ ދަނޑުތައް އޮތީ "ގުރޫޕުތަކެއްގެ" ބާރުގައި ދަށުގައި ކަމަށް ފުލުހުން ހާމަކޮށްފިއެވެ.
ގުރޫޕުތަކުގެ ބާރުގެ ދަށުގައި އޮންނަ ސަރަހައްދު ތަކަށް ވަދެވެނީ އެ ގުރޫޕުތަކުގެ މަސްލަހަތު އޮންނަ ބަޔަކަށް ކަމަށް ވެސް ފުލުހުން ބުނެއެވެ. ކުޅިވަރު ކުޅޭ ދަނޑު ފަދަ ތަންތަން ގުރޫޕުތަކުން ކުއްޔަށްދީ އެތަންތަނުން މަންފާ ހޯދަމުން އަންކަމަށް ވެސް ފުލުހުން ހާމަކުރެއެވެ. ނަމަވެސް އެ ސަރަހައްދުތައް ފުލުހުންގެ ބާރުގެ ދަށަށް ގެނައުމަށް މަސައްކަތް ކުރަމުން އަންނަކަމަށް ފުލުހުން ބުނެއެވެ.
"މީގެ އިތުރުން ބައެއް ސަރަޙައްދުތަކުގައި ކުޅިވަރު ދަނޑުތައް ހަދައިގެން ވަކި ބަޔަކު އެތަންތަނުގައި ބާރުގަދަކޮށް ކުއްޔަށްދީގެން މަންފާ ހޯދަމުންދާކަން ފުލުހުންނަށް ފާހަގަ ކުރެވިފައިވާތީ އެފަދަ ދަނޑުތަކާއި ކޯޓުފަދަ ތަންތަނަކީވެސް ކޮންމެ ޒުވާނަކަށްވެސް އަދި ކޮންމެ ޢުމުރުފުރާއެއްގެ މީހަކަށްވެސް ބޭނުންކުރުމުގެ ފުރުޞަތު އޮންނަ ތަނަކަށް ހަދަންބޭނުންވާކަންވެސް ހުރިހާ ފަރާތްތަކުން ފާހަގަ ކުރެއްވި،"
މާލޭގެ ސަރަހައްދުތަކަކަށް އަތްގަދަ ކޮށްފައިވާ ގުރޫޕުތަކަކީ ކޮބައިކަމެއް ފުލުހުން ހާމައެއް ނުކުރެއެވެ. އަދި އެ ގުރޫޕުތަކުން ކޮންޓްރޯލް ކުރަނީ ކޮން ސަރަހައްދުތަކެއްކަމެއް ވެސް ފުލުހުން ހާމައެއް ނުކުރެއެވެ. ނަމަވެސް މާލެގައި މިދިޔަ ޖުލައި މަހުގެ 28 ވަނަ ދުވަހުން ފެށިގެން ހިންގަމުން އަންނަ މާރާމާރީތައް ހިނގަމުން އަންނަނީ ވެސް އެފަދަ ތަންތަން ކައިރީގައި ކަމަށް ފުލުހުން ވަނީ ހާމަކޮށްފައިއެވެ.
އެފަދަ ތަންތަން ނައްތާލުމުގެ މަޝްވަރާތައް މާލޭ ސިޓީ ކައުންސިލާ، ހައުސިންގ މިނިސްޓްރީއާއި، މިނިސްޓްރީ އޮފް ޔޫތު އެންޑް ސްޕޯޓްސްއާއި ކޮށްފައިވާކަމަށް ފުލުހުން ބުނެއެވެ. ފުލުހުންގެ މަސައްކަތަށް އެއްބާރުލުން ދޭނެކަމުގެ ޔަގީންކަން އެ މުއައްސަސާތަކުން ދީފައިވާކަމަށް ވެސް ފުލުހުން ބުނެއެވެ.
"އެފަދަ ތަންތަން ނައްތާލައި އެތަންތަނަކީ ޒުވާނުން ފައިދާހުރި ގޮތުގައި ކުޅިވަރު ކުޅުމަށާއި އެއްވެ އުޅުމަށް ބޭނުންކުރާ ސަރަޙައްދުތަކަށް ހެދުމަށް ފުލުހުން ފަށާ މަސައްކަތުގައި އެފަރާތްތަކުގެ ފުރިހަމަ އެއްބާރުލުން ދެއްވާނެކަމަށް ވަނީ ވިދާޅުވެފަ. އަދި އެމަސައްކަތް ކުރުމުގައި އެފަރާތްތަކުގެ އެއްވެސް ހުރަސްއެޅުމެއް ނޯންނާނެކަމުގެ ޔަޤީންކަންވެސް ފުލުހުންނަށް ވަނީ ދެއްވާފަ. އަދި އެމަސައްކަތް ކުރުމުގައި އެފަރާތްތަކުގެ އެއްވެސް ހުރަސްއެޅުމެއް ނޯންނާނެކަމުގެ ޔަޤީންކަންވެސް ފުލުހުންނަށް ވަނީ ދެއްވާފަ،" ފުލުހުންގެ ވެބްސައިޓުގައި ޝާއިއު ކޮށްފައިވާ ލިއުމެއްގައި ބުނެފައިވެއެެވެ.
ކިޔުންތެރިންގެ ހިޔާލު