ކުޅުދުއްފުށީ ހޮސްޕިޓަލުގެ ހިދުމަތްތައް އަދިވެސް ރަނގަޅެއް ނުވޭ: އަތޮޅު ކައުންސިލް

ތިލަދުން މަތީ ދެކުނުބުނީ ކުޅުދުއްފުށީ ރީޖަނަލް ހޮސްޕިޓަލްގެ ހިދުމަތް އަދިވެސް މުޅިން ރަނގަޅު ނުވާ ކަމަށް ހދ. އަތޮޅު ކައުންސިލުން ހާމަ ކުރަށްވައިފިއެވެ.

ހދ. އަތޮޅު ކައުންސިލްގެ ރައީސް އާދަމް ނާސިރު 7 މަސް ދުވަހަށްފަހު އެކްސްރޭ މެޝިން ހަލާކު ވެފައި ހުރުމަށް ފަހު މިމަހުގެ 3 ވަނަ ދުވަހު ބޭނުން ކުރެވެން ފެށި ނަމަވެސް ހޮސްޕިޓަލުން ދެވެން އޮންނަ ފަރުވާ އެންމެ ރަނގަޅުނޫން ކަމަށް އޭނާ ވިދާޅުވިއެވެ. ކައުންސިލުން ބުނި ގޮތުގައި ހޮސްޕިޓަލުގެ ހާލަތު ރަނގަޅު ކުރުމަށްޓަކައި އަތޮޅު ކައުންސިލުން އަންނަނީ ގިނަ މަސައްކަތް ތަކެއް ކުރަމުން ކަމަށެވެ.

ނާސިރު ވިދާޅުވީ ހޮސްޕިޓަލުގެ ފެންވަރު ރަނގަޅުކުރުމަށް ކައުންސިލުން ކުރަމުން އަންނަ މަސައްކަތްތަކުގެ ދަށުން ކުޅުދުއްފުށީ ހޮސްޕިޓަލަށް ބޭނުންވާ ސާމާނު ހޯދުމަށްޓަކައި އެސްޓީ އާއި އެކު އެއްބަސް ވުމެއްގައި އެ ކައުންސިލުން ސޮއި ކޮށްފައިވާ ކަމަށެވެ.

ކުޅުދުއްފުށީ ހޮސްޕިޓަލް ގައި އެތެރެ ހަށީގެ ހާއްސަ ޑޮކްޓަރެއް ނެތް ކަމަށް ވެސް ވިދާޅުވިއެވެ.

"ހެލްތު މިނިސްޓުރީން ވިދާޅުވީ އީދު ބަންދުގެ ފަހުން ދިހަ ދުވަސް ތެރޭގައި ފިޒީޝަނެއް ހޯދައި ދެއްވާނެކަމަށް. ނަމަވެސް އަދިވެސް (އެތެރެ ހަށީގެ) ޑޮކްޓަރެއް ނުލިބޭ. ޑެންޓަލް ޗެޔާ ވެސް ހުރީ ހަލާކުވެފައި،" ނަސީރު ވިދާޅުވިއެވެ.

މިއަހަރުގެ ޖޫން މަހުގެ ތެރޭގައި ހދ. ކައުންސިލުން ވަނީ ކުޅުދުއްފުށީ ހޮސްޕިޓަލްގެ ހިދުމަތްތަކާއި މެދު ހިތް ހަމަ ނުޖެހުން ފާޅުކޮށް ނޫސް ބަޔާނެއްވެސް ނެރިފައެވެ.

އަތޮޅުކައުން ސިލުގެ މެމްބަރުން މިއަދު ހެލްތް މިނިސްޓަރ ޑރ. މަރިޔަމް ޝަކީލާއި ބައްދަލުކުރެއްވުމަށް ވަނީ ނިންމައިފައެވެ. އެ ބައްދަލުވުމުގެ ތަފްސީލު އަދި ނުލިބެއެވެ. 

މި މައްސަލައިގައި އެހޮސްޕިޓަލްގެ މެނޭޖަރ މުހައްމަދު ހަސަން އިއްޔެ ވިދާޅުވީ ހޮސްޕިޓަލުގެ ފެންނަވަރު ރަނަގަޅު ކުރުމަށް ސަރުކާރާއި، އަތޮޅު ކައުންސިލާއި ގުޅިގެން ގިނަ މަސައްކަތްތަކެއް ކުރަމުން އަންނަކަމަށެވެ. ނަތީޖާއެއްގެ ގޮތުން އެހޮސްޕިޓަލުގެ އެކްސްރޭ މެޝިނު ގިނަ ދުވަސްތަކެއް ވަންދެން ހަލާކުވެފައި ހުރުމަށްފަހު އިއްޔެ އަލުން ހިދުމަތް ދޭން ފަށާފައިވާކަމަށެވެ. 

"ހަތް މަސް ދުވަސް ވަންދެން އެކްސްރޭ މެޝިނު ހަލާކުވެފައި އޮތުމުން ހޮސްޕިޓަލުން ހިދުމަތް ހޯދުމަށް ދުރުވާ ބޭފުޅުންނަށް ވަރަށް ބޮޑެތި ދަތިތަކާ ދިމާވި. އެހެން ކަމުން އަޅުގަނޑުމެން ހޮސްޕިޓަލުން ދިޔައީ ކޮންމެ ދުވަހަކުހެން ކެނޑި ނޭޅި މަސައްކަތް ކުރަމުން މައްސަލަ ހައްލުކުރުމަށް. އެކްސްރޭ ނެގުމަށް ފާއިތުވީ ހަތް މަސް ދުވަހުގެ ތެރޭގައި އަޅުގަނޑުމެން ބޭނުން ކުރަމުން ދިޔައީ މޯބައިލް ޑިވައިސްއެއް،" މުހައްމަދު ހަސަން ވިދާޅުވިއެވެ.