ސަރުކާރުގެ އެންމެ މުހިންމު އަމާޒަކީ ޒުވާނުން ބާރުވެރިކުރުވުން: ރައީސް ޔާމިން

ސަރުކާރުގެ އެންމެ މުހިންމު އެއްއަމާޒަކީ، ޒުވާނުން ބާރުވެރިކުރުވައި، ޒުވާނުންނަށް އެކި ކަހަލަ ފުރުޞަތުތައް ތަނަވަސްކޮށްދީ، ހަމަޖެހޭ ދިރިއުޅުމެއް ޒުވާނުންނަށް ހޯދައިދިނުން ކަމުގައި ރައީސުލްޖުމްހޫރިޔާ އަބްދުﷲ ޔާމިން ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ، ޓްރާންސް މޯލްޑިވިއަން އެއާވޭސްއިން، ޕައިލެޓުން ތަމްރީން ކުރުމަށް ތަޢާރަފްކުރި ސްކޮލަޝިޕް "ޒުވާނާ" ހަވާލު ކުރުމުގެ ރަސްމިއްޔާތުގައި ވާހަކަ ދައްކަވަމުންނެވެ. 

ރައީސް ވިދާޅުވީ، ރާއްޖެ ފަދަ ކުޑަ ޤައުމެއްގައި، ޒުވާނުންނާ ނުލައި ދިރުމެއް ނެތްކަމަށެވެ. ޒުވާނުންގެ ހުވަފެންތަކާއި އުއްމީދުތައް ހާސިލްކުރުމަށް މަގުފަހިކޮށް ނުދީ ޤައުމަށް ދިރުމެއް ނާންނާނެކަމުގައި ވިދާޅުވިއެވެ.

"ރާއްޖެއަކީ ޤައުމެއްގެ ގޮތުގޮތުންނާއި، އާބާދީއެއްގެ ގޮތުންނާއި، ސަރުކާރެއްގެ ގޮތުގައި، ޒުވާނުންނަށް ފާގަތިކަން ހޯދައިދިނުމަށް ވަރަށް ބޮޑު އަހަންމިއްޔަތު ކަމެއްދޭ ޤައުމެއް. މިޤައުމުގެ އެންމެ މުހިންމު އެއްއަމާޒަކީ، ޒުވާނުން ބާރުވެރިކުރުވައި، ޒުވާނުންނަށް އެކި ކަހަލަ ފުރުޞަތުތައް ތަނަވަސްކޮށްދީ، ހަމަޖެހޭ ދިރިއުޅުމެއް ޒުވާނުންނަށް ހޯދައިދިނުން،" ރައީސް ވިދާޅުވިއެވެ. 

ރާއްޖެއަކީ ހަމައެކަނި ޤުދުރަތީ ރީތިކަމުގެ އަޖައިބެއް ނޫން ކަމުގައި ވިދާވެ ރައީސް ޔާމިން ވާހަކަ ދެއްކެވިއެވެ. އެމަނިކުފާނު ވިދާޅުވީ ރާއްޖޭގެ ތަރައްޤީއަށްޓަކައި އިޤްތިޞާދީ އެހެން ދާއިރާތައް ފުޅާކުރުމަށް ތަފާތު އެކި މަސައްކަތްތައް މިހާރު ސަރުކާރުން ކުރައްވަމުން ގެންދަވާކަން ރައީސުލްޖުމްހޫރިއްޔާ ހާމަ ކުރެއްވިއެވެ. މިގޮތުން، އިޤްތިޞާދީގޮތުން ޓޫރިޒަމަށް ބަރޯސާވުމުގެ ބަދަލުގައި، އިންވެސްޓްކުރާނެ އެހެން ސިނާޢާތްތައް ތަޢާރަފްކޮށް ތަރައްޤީކުރުމަށް ސަރުކާރުން ވަރަށް ބޮޑު އިސްކަމެއް ދެއްވާކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

"އަޅުގަނޑު އެންމެ ބޮޑު އިސްކަމެއް ދެނީ ރާއްޖޭގެ ރައްޔިތުންގެ ދިރިއުޅުން ބާއްޖަވެރިކުރުމަށް. މިއަދުގެ ސަރުކާރަކީ ރައްޔިތުންގެ ތާއީދު އޮތް، ހަރުދަނާ ސަރުކާރެއް. ރައްޔިތުންނަށް ފާގަތި ދިރިއުޅުމެއް ހޯދަވައިދެއްވަން މަސައްކަތް ކުރައްވާ ސަރުކާރެއް މިއީ،" ޔާމިން ވިދާޅުވިއެވެ.