ގިނައަދަދެއްގެ ރަލާއެކު މާލޭގެ ގެއަކުން ދެ ބިދޭސީއަކު ހައްޔަރު ކޮށްފި

ގިނައަދަދެއްގެ ރަލާއެކު މާލޭގެ ގެއަކުން ދެ ބިދޭސީއަކު މިރޭ ހައްޔަރުކޮށްފި ކަމަށް ފުލުހުން ހާމަކުރައްވައިފިއެވެ.

ފުލުހުން ހާމަކުރެއްވި ގޮތުގައި އެގެއިންވަނީ ބަނގުރާ އަޅާފައިހުރި 20 ލިޓަރުގެ 19 ހަމާއި، 5 ލީޓަރުގެ ހަމެއް ފެނިފައެވެ. އޭގެ އިތުރަށް 500 މިލިލީޓަރުގެ 14 ފުޅި ރާ ވެސް ވަނީ ފެނިފައެވެ. އަދި މަސްތުވާތަކެތި ކަމަށް ބެލެވޭ ބްލެޓް ސައިޒުގެ ރަބަރު ޕެކެޓެއްވެސް ވަނީ ފެނިފައެވެ.

މިމައްސަލާގައި ހައްޔަރު ކޮށްފައިވަނީ ސްރީލަންކާގެ ދެ މީހުންނެވެ. އެއީ އުމުރުން 46 އަހަރުގެ މީހަކާއި، 50 އަހަރުގެ މީހެއް ކަމަށްވެސް ފުލުހުންވަނީ ހާމަކުރައްވާފައެވެ.

ފުލުހުން މިތަކެތި މިރޭ އަތުލައިފައިވާ ގެއެއްގެ ނަން ހާމައެއް ނުކުރެއްވިއެވެ. "އެތަކެތި އަތުލައިގެންފައިވަނީ ގެއަކުން ބަޔަކު ކުއްޔަށް ހިފައިގެން އުޅޭ ބައިން. އެހެން ކަމުން އެގޭ މީހުން ބަދުނާމުވެދާނެތީ އެމީހުންގެ އެދުުމުގެ މަތިން އެއީ ކޮން ގެއެއްކަން ހާމަކުރެވެންނެތް" ފުލުހުންގެ މީޑިއާއިން ވާހަކަ ދެއްކެވި ބޭފުޅާ ވިދާޅުވިއެވެ.

މަވެސް "ދުވަސް" އަށް އެނގިފައިވާ ގޮތުގައި މިތަކެތި އަތުލައިގެންފައިވަނީ ކާމިނީގެ ހުޅަނގު ބައިންނެވެ. ފުލުހުން މިހާރުވެސް ގެންދަވަނީ މިމައްސަލަ ބައްލަވަމުންނެވެ.