ކުޅުދުށްފުށީގައި މިއަދު ހިނގި އެކްސިޑެންޓެއްގައި ބޯފަޅައިގެންދިޔަ މީހަކު މާލެ ގެންނަނީ
5 އޯގަސްޓް 2014 16:35
މުހައްމަދު އާދަމްގެ އާއިލާގެ މީހުން ކުޅުދުށްފުށީ ހޮސްޕިޓަލުގައި ހަރަކާތްތެރިވަނީ
ތިލަދުންމަތީ ދެކުނުބުރީ ކުޅުދުށްފުށީގައި މިއަދު ހެނދުނު ހިނގި ނުރައްކާތެރި އެކްސިޑެންޓެއްގައި ބޯފަޅައިގެންދިޔަ މީހަކަށް ފަރުވާ ދިނުމަށް މާލެ ފޮނުވަން އެރަށު ހޮސްޕިޓަލުން ނިންމައިފިއެވެ.
މިއެކްސިޑެންޓްގައި ބޯފަޅައިގެންދިޔަ އެރަށު ފިޔާތޮށިގޭ އާދަމް މުހައްމަދަށް މިހާރު ފަރުވާ ދެމުން ގެންދަނީ ކުޅުދުއްފުށީ ރީޖަނަލް ހޮސްޕިޓަލުގެ އައީސީޔޫ ގައެވެ.
އުމުރުން 45 އަހަރުގެ އާދަމް މުހައްމަދާ ބެހޭ ގޮތުން އެހޮސްޕިޓަލުގެ މެނޭޖަރ މުހައްމަދު ހަސަން ވިދާޅުވީ، އާދަމް މުހައްމަދުގެ ބޯ ފަޅައިގެން ގޮސް ސިކުނޑިއަށް ލޭ އެޅެމުންދާ ކަމަށެވެ. އެހެންކަމުން އޭނާއަށް އިތުރު ފަރުވާ ދިނުމަށް މާލެ ފޮނުވުމުގެ މަސައްކަތް ކުރައްވަމުން ގެންދަވާ ކަމަށެވެ. "މިބަލަނީ ވީހާވެސް އަވަހަށް އޭނާ މާލެ ފޮނުވޭތޯ" މެނޭޖަރ ވިދާޅުވިއެވެ.
މި އެކްސިޑެންޓް ހިގާފައިވަނީ މިއަދު ހެނދުނު 8:30 އެހައިކަންހާއިރު އެ ރަށު ބަދަރު ސަރައްދުގައިއެވެ. މި އެކްސިޓެންޑް ހިނގީ މުހައްމަދު އާދަމް ދުއްވަމުން ދިޔަ ސައިކަލް އޯވަޓޭކް ކުރަން އުޅުމުގެ ތެރޭގައި ޕިކަޕެއްގައި ޖެހިގެން ކަމަށް މައުލޫމާތު ލިބިފައިވެއެވެ.
މި އެކްސިޑެންޓްގައި ސައިކަލްވަނީ ޕިކަޕްގެ ބަފަރު ދަށުވެފައި ކަމަށްވެސް މައުލޫމާތު ލިބިފައިވެއެވެ. މިއެކްސިޑެންޓްގައި "އޭނާގެ ބޯފަޅައިގެން ދިޔައީ ކޮންތާކު ޖެހިފައި ކަމެއް ނޭނގޭ" އެރަށުން ވާހަކަ ދެއްކި މީހަކު ބުންޏެވެ.
ކިޔުންތެރިންގެ ހިޔާލު