ސަރުކާރުން 34 ރަށެއްގައި ފުޓްސެލް ދަނޑު އަޅަން ނިންމައިފި

މި އަހަރު ނިމުމުގެ ކުރިން 34 ރަށެއްގައި ފުޓްސެލް ދަނޑު އަޅާނެކަމަށް މިނިސްޓްރީ އޮފް ޔޫތް އެންޑް ސްޕޯޓްސް އިން މިއަދު ހާމަކުރައްވައިފިއެވެ.

ޔޫތް މިނިސްޓްރީގެ މީޑިއާ ކޯޑިނޭޓަރ ހުސެން އަމީން ނަސީރު މިއަދު ވިދާޅުވީ ފުޓްސެލް ދަނޑުތަކަކީ މީހުން ދިރިއުޅޭ ކޮންމެ ރަށެއްގައި ކުޅިވަރު އެރީނާއެއް އެޅުމުގެ ސިޔާސަތުގެ ދަށުން ސަރުކާރުން ކުރާ މަސައްކަތެއް ކަމަށެވެ.

"އަޅުގަނޑުމެން އެންމެ ފުރަތަމަ މި ފަށައިގަންނަނީ ފުޓްސެލް ދަނޑުތަކަކުން. އެތަންތަން އެންމެ ފުރަތަމަ މި ފަރުމާކުރަނީ ކުޅިވަރު އެކުވެނިތަކެއްގެ ގޮތުގައި. ފަސް އަހަރު ނިމޭއިރު އެރީނާ އެޅިގެން ދާނެ،" "ދުވަސް" ނޫހާއި ވާހަކަ ދައްކަވަމުން އަމީން ވިދާޅުވިއެވެ.

މިހާރުވެސް ބައެއް ރަށްރަށުގައި ފުޓް ސެލް ދަނޑު އަޅާފައިވާނޭކަމަށް އޭނާ ވިދާޅުވިއެވެ. އޭގެ ތެރޭގައި މާލެ، ފުވައްމުލައް، އައްޑޫއާއި ހދ. ކުޅުދުއްފުށި ހިމެނޭކަމަށެވެ. 

ކުޅިވަރު އެރީނާތަކުގައި ފުޓްބޯޅަ ދަނޑު، ބަށި ކޯޓު، ވޮލީ ކޯޓަކާއި އިންޑޯ ކުޅިވަރުތައް ވެސް ކުޅެވޭނެ އިންތިޒާމް ހަަމަޖެހިގެން ދާނެ ކަމަށް ޔޫތު މިނިސްޓްރީއިން ހާމަކުރެއްވިއެވެ.

އެނެމް ފަހުން ސަރުކާރުން ފުޓްސަލް ދަނޑެއް ހުޅުވާފައިވަނީ ހދ. ކުޅުދުއްފުށީގައިއެވެ. އެއީ މި ހުސްވި ޖުލައިމަހުގެ ތެރޭގައިއެވެ. އެ ދަނޑު އަޅާފައިވަނީ ސިފައިންނާއި، ފުޓްބޯލް އެސޯސިއޭޝަން އޮފް މޯލްޑިވިސް (އެފްއޭއެމް) ގުޅިގެނެވެ. 

މީހުން ދިރިއުޅޭ ކޮންމެ ރަށެއްގައި ކުޅިވަރު އެރީނާއެއް އެޅުމަށް ރައީސް ޔާމީން ވަނީ 2013 ވަނަ އަހަރުގެ ރިޔާސީ އިންތިހާބުގެ ކެމްޕޭނު ތެރޭގައި ވައުދުވެ ވަޑައިގަނެފައިއެވެ.