މެންބަރުންނާއި، ނޫސްވެރިންނަށް މަރުގެ އިންޒާރުދެނީ މަސައްކަތަށް ހުރަސް އެޅުމަށް: މެމްބަރު އިމްތިޔާޒް

ރައްޔިތުން މަޖިލީހުގެ މެންބަރުންނަށާއި ނޫސްވެރިންނަށް މަރުގެ އިންޒާރު ދެމުން ގެންދަނީ މަސައްކަތަށް ހުރަސްއެޅުމުގެ ގޮތުން ކަމަށް މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ވިދާޅުވެއްޖެއެވެ.

"ދުވަސް" ނޫހަށް ދެއްވި އިންޓަވިއުއެއްގައިއިންތި ވިދާޅުވީ، މިފަދަ ފިނޑި އަމަލުތަކުގެ ސަބަބުން އެމްޑީޕީއަށް ނިސްބަތްވާ އެއްވެސް މެންބަރަކު ފަހަތަކަށް ނުޖެހޭނެ ކަމަށެވެ. އަދި މިކަން ހަރުކަށި އިބާރާތުން ކުށްވެރިކުރާ ކަމަށްވެސް އޭނާ ވިދާޅުވިއެވެ.

އިމްތިޔާޒު ވިދާޅުވީ އިންޒާރުގެ މެސެޖުތައް އަންނައިރު އެއަށް ބަލަހައްޓައިގެން ނުތިބެވޭނެ ކަމަށެވެ. ސަރުކާރުން މިމައްސަލަ އެންމެ މަތީދަރަޖައިން ތަކުގީގު ކުރަންޖެހޭނެކަމަށެވެ. މިހާރު މިކަން ބަލައިދިނުމަށް ފުލުހުންނަށް ހުށަހަޅާފައިވާނެ ކަމަށްވެސް އޭނާ ވިދާޅުވިއެވެ.

"މިފަދަ މެސަޖަކުން އެމްޑީޕީގެ އެއްވެސް މެންބަރެއް ފަހަތަކަށް ނުޖެހޭނެ. ނަމަވެސް މަރުގެ އިންޒާރު ދެމުން އަންނައިތު އެއަށް ބަލަން ތިބެވޭކަށް ނެތް. މި މައްސަލަ ސަރުކާރުން އެބަޖެހޭ އެންމެމަތީ ދަރަޖައިން ބަލަން. މިއީ ވަރަށް ބިރުވެރި ކަމެއް. ވަކިން ޚާއްސަކޮށް މަޖިލީހުގެ މެންބަރުންނަށް މީގެ ކުރިންވެސް ވަނީ މިކަންތަކާ ކުރިމަތިލާންޖެހިފަ،" އިންތި ވިދާޅުވިއެވެ.

އިންތި ވިދާޅުވީ މަޖިލީހުގެ މެންބަރުންނަށް ހިމާޔަތާއި ރައްކާތެރިކަން ދޭން ޖެހޭނެ ކަމަށް ޤާނޫނުން ލާޒިމު ކޮށްފައިވާކަމަށެވެ އެހެންނަމަވެސް އެ އިންތިޒާމް އެމްޑީޕީގެ މަޖިލިސް މެމްބަރުންނަށް ހަމަޖެހިފައި ނުވާކަމަސް ވެސް ވިދާޅުވިއެވެ.

ނޫސްވެރިންނަށާއި މަޖިލީހުގެ ބައެއް މެންބަރުންނަށް އަންނަނީ ގޮތްނޭގޭ ނަންބަރުތަކުން މަރުގެ އިންޒާރުދީ މެސެޖުތައް ފޮނުވަމުންނެވެ.