ފުލުހުންނަށް އަމުރުކޮށްގެން މައްސަލަތައް ބެލުމުގެ ބާރެއް މިހާރު ހޯމް މިނިސްޓަރަކަށް ނެތް: އުމަރު ނަސީރު
4 އޯގަސްޓް 2014 12:03
ހޯމް މިނިސްޓަރ އުމަރު ނަސީރު
ހޯމް މިނިސްޓަރުގެ ބާރުތައް ހަނިކުރައްވާ ކަމަށް ދެކެވޭ ވާހަކަތަކަށް އުމަރު ނަސީރު އެއްބަސްވެ ވަޑައިގެންފިއެވެ.
އުމަރު މިކަމަށް އެއްބަސްވެ ވަޑައިގަނެފައިވަނީ، ރައްޔިތުން މަޖިލީހުގައި އެ މަޖިލީހުގެ މެމްބަރަކު ކުރެއްވި ސުވާލަކަށް ޖަވާބު ދެއްވަމުންނެވެ. އުމަރު ވިދާޅުވީ ރައީސް އަށް ލިބިވަޑައިގަންނަވާ ބާރުގެ ދަށުން ހޯމް މިނިސްޓްރީގެ މެންޑޭޓަށް ބަދަލުތަކެއް ގެނެސްފައިވާ ކަމަށެވެ. އެގޮތުން ހޯމް މިނިސްޓަރު ފުލުހުންނަށް އަމުރުކޮށްގެން ތަހުގީގު ކުރުމުގެ ބާރު މިހާރު ނެތް ކަމަށް ވިދާޅުވި އެވެ.
"ނަމަވެސް އަޅުގަނޑުގެ ވަޒީރުކަމުގައި މިހާތަނަށް އެއްވެސް މައްސަލައެއް އައިސްފައިވާނަމަ އެމައްސަލައެއް ބަލަމުން މިދަނީ. އެއްވެސް މައްސަލައެއް ނުބަލާ ދޫކޮށްލާފައި ނުވާނެ،" އުމަރު ވިދާޅުވިއެވެ.
މިއަދުގެ މަޖިލީސް ޖަލްސާގައި އެމްޑީޕީ ގެ ގިނަ މެންބަރުތަކެއް ވަނީ ހޯމް މިނިސްޓަރ އުމަރާ ސުވާލުކުރައްވައިފައެވެ.
ގަލޮޅު ދެކުނު ދާއިރާގެ މެންބަރ އީވާ އަބުދު ﷲ ވަނީ ޕީޕީއެމްގެ 2013 ވަނަ އަހަރުގެ ރިޔާސީ ޕްރައިމަރީގައި ރައީސުލްޖުމްހޫރިއްޔާ އަބުދުﷲ ޔާމީން އަކީ ދިވެހިރާއްޖޭގެ މަސްތުވާތަކެތީގެ ބޮޑުންނާއި ގާތްގުޅުމެއް އޮންނަ ބޭފުޅެއް ކަމަށް އުމަރު ވިދާޅުވުމާއި ގުޅިގެން އެކަން ތަހުގީގު ކޮށްފައިވޭތޯ ވެސް ސުވާލުކުރައްވައިފައެވެ.
ޖަވާބު ދެއްވަމުން މިނިސްޓަރު ވިދާޅުވީ އެކަމަކީ މިނިސްޓަރު ކަމާއި ހަވާލުވެވަޑައިގަތުމުގެ ކުރިން ދައްކާފައިވާ ވާހަކަތަކެއް ކަމަށް ވިދާޅުވެފައެވެ. އީވާގެ ސުވާލަކީ ވަޒީރުންނާ ސުވާލުކުރުމުގެ ގާނޫނުގެ ދަށުން ކުރެވޭނެ ސުވާލެއް ނޫން ކަމަށްށާއި އެ ސުވާލަކީ ގާނޫނު އަސާސީއާ ހިލާފަށް ކުރާ ސުވާލެއްކަމަށް ވެސް ވިދާޅުވިއެވެ.
އެހެންނަމަވެސް މިސުވާލުގެ ޖަވާބުގައި އުމަރު ވިދާޅުވީ ރައީސް ޔާމީން އަކީ މަސްތުވާތަކެއްޗާއި ގުޅުމެއް ހުރި ބޭފުޅެއް ނޫން ކަމަށާއި އެހެންނަމަވެސް މަސްތުވާތަކެއް ގުޅުންހުރި މީހުންގެ މިގައުމުގެ ވެރިކަން ކޮށްފައިވާ ކަމަށެވެ.
"މިހާރު ކުޑަކަމުދާ ތަކެތި ޓެސްޓް ކުރިޔަސް ޕޮޒިޓިވް ވާނެ،" ކުރީގެ ރައީސް މުހައްމަދު ނަޝީދަށް ތުހުމަތު ކުރައްވައި އުމަރު ނަސީރު ވިދާޅުވިއެވެ.
މިއަދުގެ ޖަލްސާގައި އެމްޑީޕީގެ މެންބަރުން ކުރެއްވި ސުވާލު ތަކަށް އުމަރު ޖަވާބު ދިނުމުގައި ގެންގުޅެވި އުސޫލާއާއި މެދު އެމްޑީޕީގެ މެންބަރުން ވަނީ ހިތްހަމަނުޖެހުން ފާޅުކޮށްފައެވެ. އެހެންމަވެސް ޕީޕީއެމްގެ މެންބަރުން ވަނީ އުމަރަށް ތައުރީފު ކުރަށްވާ ވާކަދައްކަވައިފައެވެ.
ކިޔުންތެރިންގެ ހިޔާލު