ޣައްޒާގެ ރައްޔިތުންނަށް އެހީވުމަށް ކަސްޓަމާއި، އެމްޕީއެލް އިން ނިންމައިފި

ފަލަސްތީނުގެ ޣައްޒާއަށް ޔަހޫދީ ދައުލަތުން ދެމުން ގެންދާ ހަމަލާތަކުގައި ހާލުގައި ޖެހި ބިކަވެފައިވާ މީހުންނަށް އެހީވުމަށް މޯލްޑިވްސް ކަސްޓަމްސް ސަރވިސް އާއި މޯލްޑިވްސް ޕޯޓްސް ލިމިޓެޑްގެ މުވައްޒަފުން ނިންމައިފިއެވެ.

މިދެ މުއައްސަސާއިން މިއަދުވަނީ މި މަސައްކަތް ރަސްމީކޮށް ފަށައިފައެވެ. މިމަސައްކަތް ފަށައިފައިވަނީ "އަޅުގަނޑުގެ މަސައްކަތުގެ އެއްދުވަހުގެ އުޖޫރަ ޣާޒާއަށް" މިނަމުގައެވެ. މިނަމުގައި ފެށި ކަމަށްވިޔަސް އެއްދުވަހުގެ މުސާރަށްވުރެ މަދުންވެސް އަދި އިތުރަށްވެސް އެހީވެވޭނެ ކަމަށް ކަސްޓަމްސްއިން ހާމަކުރައްވާފައިވެއެވެ.

މި ދެ މުއައްސަސާގެ މުވައްޒަފުންގެ އިތުރަށް މިކަމަށް ތަރުހީބު ދެއްވަން ބޭނުންފުޅުވާ އެންމެހާ ބޭފުޅުންނަށްވެސް މިފަންޑަށް އެހީވުމުގެ ފުރުސަތު އޮންނާނެ ކަމަށް ކަސްޓަމްސްއާއި އެމްޕީއެލްއިން ހާމަކުރައްވާފައިވެއެވެ.

މިފަންޑަށް އެހީވުމުގެ ހަރަކާތްތައް މާލޭ ކޮމާޝަލް ހާބަރު ސަރަހައްދާއި، އައްޑޫ ސިޓީއާއި ހދ.ކުޅުދުއްފުށީގައި ހުރި ރީޖަނަލް ސީޕޯޓްތަކުގައާއި، ކަސްޓަމްސްގެ އެންމެހާ އޮފީސްތަކާއި ސަރަހައްދުތަކެއްގައި ކުރިއަށް ދާނެއެވެ. މިއީ އެއް ހަފްތާގެ މުއްދަތަށް ހިންގާ ހަރަކާތެވެ.

މިޙަރަކާތް ފައްޓަވާދެއްވީ ކޮމާޝަން ހާބަރު ސަރަހައްދުގައި މިއަދު ބޭއްވި ރަސްމިއްޔާތެއްގައި، ކޮމިޝަނަރ ޖެނެރަލް އޮފް ކަސްޓަމްސް އަޙުމަދު މުހަންމަދާއި، މޯލްޑިވްސް ޕޯޓްސް ލިމިޓެޑް ޗީފް އެގްޒެކެޓިވް އޮފިސަރ މަހުދީ ޢިމާދެވެ.

މި ރަސްމިއްޔާތުގައި ކޮމިޝަނަރ ޖެނެރަލް އަޙުމަދު މުޙަންމަދު ވިދާޅުވީ ރާއްޖެ ފަދަ ޖާޒީރާ ގައުމަކަށް ފަލަސްތީނުގެ ރައްޔިތުންނަށް މައިގަނޑު ދެ ގޮތަކަށް އެހީދެވިދާނެ ކަމަށެވެ. އެއްގޮތަކީ އިޒްރޭލުގެ ޢުދުވާނުން ޣައްޒާގެ ރައްޔިތުން ސަލާމަތް ކޮށްދެއްވުމަށް އެދި ދުޢާ ދެންނެވުން ކަމަށެވެ. ދެވަަނަ ގޮތަކީ ތަނަވަސްކަންހުރި މިންވަރަކުން ޣައްޒާގެ ރައްޔިތުންނަށް ފައިސާގެ އެހީ ފޯރުކޮށްދިނުން ކަމަށެވެ.

މިރަސްމިއްޔާތުގައި ވާހަކަ ދައްކަވަމުން މަހުދީ ޢިމާދު ވިދާޅުވީ މިހަރަކާތް އިންތިޒާމް ކުރި މީހުންނަށް ޝުކުރު ދަންނަވާ ކަމަށެވެ. މިއީ ފަލަސްތީނުގެ ރައްޔިތުންނަށްޓަކައި ކުރަން ފެށި ވަރަށް ރަނގަޅު ކަމެއް ކަމަށްވެސް ވިދާޅުވިއެވެ.