ޣައްޒާ ފަންޑަށް އައްޑޫން ދެ ލައްކަ ރުފިޔާ ލިބިއްޖެ

ފަލަސްތީނުގެ ރައްޔިތުންނަށް އެހީވުމަށް އައްޑޫސިޓީގައިބެހެއްޓި ފަންޑް ފޮށްޓަށް ދެ ލައްކަ ރުފިޔާއަށް ވުރެގިނަ ފައިސާ ލިބިފައިވާ ކަމަށް ނޫރުލް އިސްލާމް ޖަމިއްޔާއިން ހާމަކޮށްފިއެވެ.

އައްޑޫގައި ޣައްޒާ ފަންޑު ފޮށީގެ ކަންކަން އިންތިޒާމްކޮށްފައި ވަނީ ވެސް އެ ޖަމިއްޔާއިންނެވެ. އައްޑޫއިން ލިބުނު ފައިސާ އަދާލަތު ޕާޓީން ހުޅުވާ "ޣައްޒާ ފަންޑު މޯލްޑިވިސްގެ" އެކައުންޓަށް ޖަމާކޮށްފައިވާކަމަށް ވެސް އެ ޖަމިއްޔާއިން ބުނެއެވެ.

ޣައްޒާއަށް އިޒްރޭލުން ދެމުން އަންނަ ލާއިންސާނީ ހަމަލާތަކުގެ ސަބަބުން ހާލުގައި ޖެހިފައިވާ އެގައުމުގެ ރައްޔިތުންނަށް އެހީވުމުގެ ގޮތުން އަދާލަތު ޕާޓީން އިސް ނަގައިގެން ވަނީ މިދިޔަ ޖުލައި މަހުގެ 17 ވަނަދުވަހު ފަންޑު ފޮށްޓެއް ހުޅުވައިފައެވެ.

ފިތުރު އީދު ދުވަހު އަދާލަތު ޕާޓީން ހާމަކޮށްފައިވަނީ އެ ޕާޓީގެ ފަންޑު ފޮށްޓަށް ޖުމްލަ 3.33 މިލިއަން ރުފިޔާ މާލެއިން އެކަނިވެސް ލިބިފައިވާކަމަށެވެ. އަދި އަތޮޅުތަކުންވެސް ޣައްޒާ ފަންޑަށް ރަނގަޅު ތަރުހީބެއް ލިބެމުން އަންނަކަމަށް އެ ޕާޓީން ވަނީ ހާމަކޮށްފައިއެވެ.

އިޒްރޭލުން ޣައްޒާގައި ހިންގާ ޖަރީމާއަށް27 ދުވަސް ވަނީވެފައެވެ. މިމުއްދަތުގައި 1655 މީހުން ވަނީ މަރުވެފައެވެ. އަދި އޭގެ އިތުރުން 8،900 ޒަހަމްވެފައިވާކަމަށް "އަލް ޖަޒީރާއިން" ބުނެއެވެ.