މިއަހަރުގެ އެންމެ އަލިގަދަ ތަރިއަކަށް ލޯފަން ހާފިޒެއް

އެންމެ ރީތިކޮށް ޤުރުއާން ކިޔެވޭ މީހަކު ހޮވުމަށް ކޮންމެ ރޯދަމަހަކު ވެސް މޯލްޑިވިސް ބްރޮޑްކާސްޓިން ކޯޕަރޭޝަން (އެމްބީސީ) އިން ބާއްވަމުން އަންނަ އެންމެ އަލިގަދަ ތަރިއަކަށް ށ. ފޭދޫ ވަވަތި، އަބްދުއްރަޝީދު ހޮވައިފިއެވެ.

އަބްދުއްރަޝީދަކީ ލޯފަން މީހެކެވެ. އެހެން ނަމަވެސް އޭނާއަކީ ޤުރުއާން ހިތުދަސް ހާފިޒެކެވެ. މުބާރާތުގެ އެއްވަނަ ހޯދުމުން އޭނާއަށް ވަނީ އިނާމެއްގެ ގޮތުގައި އެއް ލައްކަ ރުފިޔާ އާއި އުމުރާ ދަތުރެއް ދީފައިއެވެ.

އަބްދުއްރާޝީދު ވިދާޅުވީ މިއީ އޭނާށް ލިބިލެއްވި ވަރަށް ބޮޑު އުފަލެއް ކަމަށެވެ. އަދި ކީރިތި ޤުރުއާނުގެ އިލްމުގައި ހިފައިގެން ކުރިއަށް ދިއުމަށް އޭނާ ވަނީ އިލްތިމާސް ކުރައްވައިފައެވެ.

"ކީރިތި ޤުރުއާނަކީ ވަކި މީހަކަށް ބާވާލެއްވި އެއްޗެއް ނޫން. އެއީ ހުރިހާ އިންސީންނާއި ޖިންނީންގެ މައްޗަށް ވެސް ބާވާލައްވާފައިވާ ފޮތެއް. ކީރިތި ޤުރުއާނުގައި ހިފައިގެން ކުރިއަށް ދިއުމަށް އަޅުގަނޑު ވަސިއްޔަތްކުރަން،" އޭނާ ވިދާޅުވިއެވެ. 

ރޭ އެމްބީސީ ގައި ބޭއްވި މުބާރާތުގެ ފައިނަލުގައި ހާފިޒު އަބްދުއް ރަޝީދާއި ވާދަކުރީ ދެ އަންހެނުންނެވެ. އެތަނުން ދެ ވަނައަށް ހޮވާފައިވަނީ ފ. ނިލަންދޫ، ފަތިސް، އައިމިނަތު އިސްމާއިލެވެ. އޭނާއަށް އިނާމެއްގެ ގޮތުގައި ހަތްދިހަ ފަސް ހާސް ރުފިޔާ ލިބިފައިވެއެވެ. ތިން ވަނައަށް ހޮވާފައިވަނީ ގދ. ތިނަދޫ ގުލައްމާގޭ ޝިފާޒާ ނައީމެވެ. ޝިފާއާޒަށް އިނާމެއްގެ ގޮތުގައި ލިބިފައިވަނީ ސާޅިސް ފަސްހާސް ރުފިޔާއެވެ. 

މި މުބާރާތަކީ މިދިޔަ އަހަރުން ފެށިގެން ކޮންމެ އަހަރަކުވެސް ރޯދަ މަހުގައި އެމްބީސީން ބާއްވަމުން އަންނަ މުބާރާތެކެވެ.